نۇرجان تولەندييەۆ – مويىندالعان تالانت. ءبۇتىن حالىقتى مويىنداتىپ، ساحنادان ويىپ ورىن الا ءبىلۋ كوپ ونەرپازعا بۇيىرا بەرمەيتىن ب ا ق. حالىقتىڭ سىنى قاي كەزدە دە قاتال. حالىقتى جاي، بولماشى جىلتىراقپەن الداۋ مۇمكىن ەمەس.

نۇرجان تولەندييەۆ – قازاقتىڭ قازىرگى زامانعى ساتيرا ونەرىنە، كومەديا جانرىنا سىلكىنىس اكەلىپ، قازاقى قالجىڭعا ادەمى لەپ بەرىپ جاسقا دا، جاسامىسقا دا تانىمال بولعان جان.

بويىنا بىتكەن ەرەكشە ارتىستىك قابىلەتى، شەشەندىگى، بايقامپازدىعى، قاراپايىمدىلىعى، ەڭبەكقورلىعى جيناقتالا، شىڭدالا كەلە حالىقتىڭ ۇلىنا اينالدى.

زامان وزگەرىسى ادامنىڭ كاسىبىنە دە وزگەرىس اكەلەدى. راس، ءانشى، ءارتىس، ءبيشى، ءتىلشى، اقىنداردىڭ كوبىسىن تويدا كەزدەستىرەتىن بولعانىمىز دا راس. بۇل ءبىر جاعىنان حالىقتىڭ قالاۋى. وزدەرى قۇرمەتتەيتىن ونەر ادامدارىمەن ەتەنە جاقىن بولعىسى كەلەتىن قازاقى مىنەز دە وسىنى قاجەت ەتەدى. ءتىپتى تويلارىنا شەتەلدىكتەردى دە مىڭداعان، ميلليونداعان دوللارمەن شاقىراتىندار دا بار عوي. ول ەندى باسقا تاقىرىپ.

ءوز تاقىرىبىمىزعا ورالساق، 15.08.2016 كۇنگى «زامانا» گازەتىنە گ.حالىق قىزى دەگەن اۆتوردىڭ  «تويعا جالداعان اساباڭىز العان اقشاسىن اقتادى ما؟» دەگەن تاقىرىپتاعى ماقالاسى جارىق كوردى. نۇرجان تولەندييەۆتىڭ جەكە باسىنا تيىسۋگە ارنالعان تاپسىرىستى ماقالا ونىڭ قول جەتكىزگەن جەتىستىكتەرىن، حالىق الدىنداعى ابىرويىن كورە المايتىن باقىراشتاردىڭ تاراپىنان جاسالعان كەزەكتى جول توسۋ ارەكەتى دەگەننەن باسقا ايتارىمىز جوق. نۇرجاننىڭ اتىن قارالاۋ ارقىلى وزدەرىنىڭ اتىن شىعارعىسى كەلگەندەردىڭ دە پەيىلى انىق كورىنىپ تۇر.

 اقىن مۇحتار شاحانوۆتىڭ وسى تۇرعىدا:

...اتىڭدى، داڭقىڭدى شىعارعىڭ كەلسە وسى زاماندا،

جەردەن اپ، جەرگە ساپ اتاقتى تۇلعانى جاماندا.

زورلىعىڭ ەرلىككە تەلىنىپ، زورايىپ باعاڭ دا،

ءبىر كۇندە-اق بەلگىلى بولاسىڭ قوعامعا... دەگەنى اينىماي كەلىپ تۇر.

سەنبى كۇنى «ەكى جۇلدىز» سالتانات سارايىندا ۇيلەنۋ توي وتكىزگەن توي يەسى مەن سول تويدا باستان-اياق قاتىسقان كۋاگەردىڭ دە سويلەگەن ۆيدەوسى «مەديادا ن.تولەندييەۆكە قارسى جاسالعان ارانداتۋلاردى توي يەلەرى مەن كۋاگەرلەر جوققا شىعارۋدا» دەگەن تاقىرىپتا عالامتورعا جۇكتەلىپتى.

(https://www.youtube.com/watch؟v=4Nm75GEW9a0&feature=youtu.be)، (https://www.youtube.com/watch؟v=70z0iD1neUw). «جاپتىم جالا، جاقتىم كۇيەلەرىنە» ەلدىڭ كوزى ناقتى ايعاقتى كورە سالا جەتەدى. بۇدان كەيىن ەندى اۆتور – گ.حالىق قىزى مەن ماقالانى جاريالاردان بۇرىن ءىستىڭ اق-قاراسىن اجىراتىپ الماعان گازەت رەداكسياسى قانداي ءۋاج ايتار ەكەن.

ءباسپاسوزدىڭ، مەديانىڭ كەيدە «بوياۋشى، بوياۋشى دەسە ساقالىن بوياپتى» دەگەندەي، «تۇيمەدەيدى تۇيەدەي ەتىپ، بولماعاندى بولدىعا» جاتقىزىپ جىبەرەتىن تۇسى بار. جەل ءسوزدى دەر كەزىندە توقتاتپاسا، اۋا جايىلا تەز تاراپ، وزگەلەردى يلاندىرا تۇسەتىنى دە راس. سوندىقتان نۇرجان تولەندييەۆ ءوزىنىڭ ازاماتتىق قۇقىعىن قورعاي وتىرىپ، نەگىزسىز قارالاۋ ماقالانى جاريالاعانى ءۇشىن رەداكسيادان جانە اۆتوردان گازەت بەتىندە كەشىرىم سۇراۋدى تالاپ ەتۋى كەرەك.

نۇرجان تولەندييەۆتىڭ تالانتىنىڭ ولشەمى مەن ونەرپازدىق باعاسىن جالعان پيارشىلار ەمەس، حالىق الدەقاشان بەرىپ قويعانىن كەيبىرەۋلەر ءالى دە بىلمەي جۇرگەن سياقتى. ايتپەسە، بۇدان بۇرىن دا قانشاما تويدى جۇرگىزىپ جۇرگەن تاجىريبەسى بار، ءوز كاسىبىندە كەمەلدەنگەن نۇرجان تولەندييەۆ ءدال ونداي سوراقى سوزدەردى قولدانىپ، وسپادار قالجىڭ ايتتى دەگەنگە كىم سەنەدى. ولاي بولاتىن بولسا «ەل قۇلاعى – ەلۋ» باياعىدا-اق ونىڭ وعاش قىلىقتارى تۋرالى جاريا بولار ەدى.

«جاقسىنىڭ ارتىنان ءسوز ەرەدى» دەگەن ءسوز بار حالىقتا. قاڭقۋ، وسەك-اياڭ، قارالاۋ، اياقتان شالۋدىڭ كەزەگى نۇرجان تولەندييەۆكە جەتىپتى. ءبىراق مۇنداي ۇساقتىق، جالعان جالا ونىڭ ساعىن سىندىرا المايتىنىنا سەنىمدىمىز.

ايدار ناۋرىزبايەۆ

تۇركىستان قالالىق سازدى-دراما تەاترىنىڭ اكتەرى، رەجيسسەرى.

«م.شوقايدىڭ 120 جىلدىعى»، رف-نىڭ «ادال ەڭبەگى ءۇشىن» توسبەلگىلەرىنىڭ يەگەرى