تۇركيانىڭ وڭتۇستىك-شىعىسىندا توي ۇستىندە بولعان جارىلىستان قازا بولعاندار سانى 53 ادامعا جەتتى، ونىڭ 22ء-سى 14 جاسقا تولماعان بۇلدىرشىندەر، دەپ حابارلايدى Reuters اگەنتتىگى.
جەرگىلىكتى «ا حابەر» تەلەارناسىنىڭ مالىمدەۋىنشە، جارىلىستان 69 ادام جارالانعان. ازىرگە ەشقانداي لاڭكەستىك ۇيىم جارىلىستى ءوز موينىنا العان جوق. پرەزيدەنت ەردوعاننىڭ ويىنشا، مۇنى دايش لاڭكەستىك ۇيىمى جاساعان بولۋى مۇمكىن.
تۇركياداعى لاڭكەستىك اكتىنى رەسەي، ءازىربايجان، اقش جانە فرانسيا سىندى ءبىرقاتار مەملەكەت قاتاڭ ايىپتادى. مەملەكەت باسشىسى نۇرسۇلتان نازاربايەۆ تۇركيا پرەزيدەنتىنە كوڭىل ايتۋ جەدەلحاتىن جولدادى.
