وڭتۇستىك قازاقستان وبلىسىنا جۇمىس ساپارى اياسىندا كارىم ءماسىموۆ «پەتروقازاقستان ويل پروداكتس» جشس-نە باردى.

قازاقستاننىڭ مۇناي وڭدەۋ زاۋىتتارىن جاڭعىرتۋدىڭ ۇكىمەتتىك باعدارلاماسىنا ەنگەن اۋقىمدى جوبانى جۇزەگە اسىرۋ بارىسى تۋرالى پرەمەر-مينيسترگە كاسىپورىن پرەزيدەنتى س. شي مەن ءبىرىنشى ۆيسە-پرەزيدەنتى ا. تۇرىسبەكوۆ باياندادى، - دەپ جازادى Pm.kz.

«شىمكەنت مۇناي وڭدەۋ زاۋىتىن جاڭعىرتۋ جانە جوندەۋ» جوباسى 2011 جىلى باستالدى، بارلىق جۇمىستاردى 2017 جىلدىڭ سوڭىندا اياقتاۋ جوسپارلانعان.

2016 جىلدىڭ قاڭتار-مامىرىندا ءشموز وندىرگەن ءونىم كولەمى اقشالاي ماندە 22 ملرد تەڭگەدەن استى. جاڭعىرتۋدان كەيىن ك5 ەكولوگيالىق كلاستىڭ (ەاەو ەلدەرىندەگى ەۋرو-5 بالاماسى) تالاپتارىنا سايكەس زاۋىت جوعارى وكتاندى بەنزين شىعارادى. زاۋىتتاعى وڭدەۋ قۋاتتىلىعى 90%-عا دەيىن تازارتۋ تەرەڭدىگىمەن شيكى مۇناي 5،2-دەن 6 ملن تونناعا دەيىن وسەدى دەپ كۇتىلۋدە.

بۇگىنگى تاڭدا قازاقستاندا ءۇش ءموز - پاۆلودار، اتىراۋ جانە وڭتۇستىك قازاقستان وبلىستارىندا جۇمىس جاسايدى. دەگەنمەن، ىشكى نارىقتىڭ سۇرانىسىن ولار قامتي المايدى.

وتاندىق وتىن-ەنەرگەتيكالىق نارىقتى دامىتۋ ماسەلەلەرىنە ۇكىمەت ەلباسىنىڭ تاپسىرماسى بويىنشا ەرەكشە كوڭىل بولەدى. وڭىرلەرگە جۇمىس ساپارى بارىسىندا پرەمەر-مينيستر پاۆلودارداعى جانە اتىراۋداعى ءموز-نا بارىپ، قازاقستان ءۇشىن ماڭىزدى ءوندىرىستى جاڭعىرتۋ جانە جوندەۋ بارىسىمەن تانىستى. بۇدان وزگە، اتىراۋدا كارىم ءماسىموۆ وتاندىق مۇناي سەرۆيسىنىڭ وزەكتى ماسەلەلەرى بويىنشا كەڭەس وتكىزدى. كەڭەس قورىتىندىسى بويىنشا پرەمەر-مينيستر ەكى جۇمىس توبىن قۇرۋدى تاپسىردى، ولار ءبىر ايلىق مەرزىمدە وزەكتى ماسەلەلەردى جيناقتاپ، ولاردى شەشۋدىڭ ناقتى ۇسىنىستارىن ازىرلەۋلەرى ءتيىس.  

قازاقستاننىڭ بارلىق ءۇش ءموز-ىن جاڭعىرتۋ 2018 جىلعا قاراي ق ر اۆتوكولىك وتىنى نارىعىندا يمپورت الماستىرۋدى قامتاماسىز ەتەدى.

ايتا كەتەيىك، ۇلتتىق ەكونوميكا مينيسترلىگىنىڭ مالىمەتىنشە، قازاقستاندا 2016 جىلعى قاڭتار-ماۋسىمدا 1،527 ميلليون توننا بەنزين (2015 جىلدىڭ سايكەس كەزەڭىنەن 13،6%-عا ارتىق)، 2،370 ميلليون توننا ديزەل وتىنى (10،6%-عا ءوسۋ)، 1،408 ميلليون توننا جاعىلاتىن مازۋت (13،5%-عا تومەندەۋ) ءوندىرىلدى.

ءبىرىنشى جارتىجىلدىقتا قازاقستان ءموز الدىڭعى جىلعا قاراعاندا 13،6%-عا ارتىق بەنزين جانە 10،6%-عا ارتىق ديزەل ءوندىردى.

2014 جىلى 29،4%-عا جانە 2015 جىلى 15،8%-عا تومەندەۋدەن كەيىن اعىمداعى جىلدىڭ ءبىرىنشى جارتىسىنداعى وڭ ترەند سالاعا جىگەر بەردى.