وڭتۇستىك قازاقستان وبلىسىنداعى ماقتاارال اۋدانىنىڭ ديقاندارى باۋ-باقشادان بۇرىن-سوڭدى بولماعان مول ءونىم الىپ جاتىر.

شارۋالار كۇنى بۇگىنگە دەيىن 126 مىڭ توننادان استام قاربىز بەن قاۋىن جيناعان. ودان 7،8 ملرد تەڭگە تابىس تاۋىپتى. مىرزاشولدىك ديقاندار ءونىمنىڭ كوپ بولىگىن رەسەي مەن بەلارۋس ەلدەرىنىڭ نارىعىنا ەكسپورتتاعان. «قارا كۇزگە دەيىن القاپتاعى ەكىنشى رەت ەگىلگەن قاۋىن-قاربىز دا ءپىسىپ قالادى»، - دەيدى ولار.

ءدامى ءتىل ۇيىرەتىن قاۋىننىڭ العاشقى پىسكەنىن ءوز قولىمەن جۇلعان ديقاننىڭ كوڭىلى توق. ويتكەنى كوكتەم قولايلى بولىپ، ەرتە قيمىلداعان شارۋا مول ءونىمىن الىپ جاتىر. نامازباي بۇعان دەيىن 10 گەكتارعا ەگىلگەن قاربىزىنان 500 توننا ءونىم العان. ونى رەسەي نارىعىنا جىبەرىپتى. ەندى ءمىرزاشول قاۋىنىن ىشكى جانە سىرتقى نارىققا جونەلتىپ جاتىر.

نامازباي كۋۆاتوۆ، ديقان:

- رەسەيدەن سۇرانىس بولدى. ۆاگونداپ جىبەردىك. ول جاقتا دەلدالىمىز بار. تاپسىرىس بولادى، سوعان قاراي جىبەرىپ جاتىرمىز. جىلدا ىستەپ جۇرگەن تىرلىگىمىز وسى.
ادەتتە ماقتا وسىرۋمەن عانا اينالىساتىن ماقتاارالدىق شارۋالار سوڭعى جىلدارى باۋ-باقشا ونىمدەرىنە كوپتەپ دەن قويا باستادى. «ويتكەنى جىلىنا ەكى رەت ءونىم الۋعا بولادى، وعان قوسا پايداسى دا اق التىننان كەم ەمەس»، - دەيدى ديقاندار. ال، بيىل شارۋالار ءۇشىن ءتىپتى قولايلى بولدى. اقپاننىڭ سوڭىندا جەر جىرتىلىپ، ناۋرىزدا العاشقى ءدان سەبىلدى. ديقاندار جالپى سوڭعى جىلدارى جەر-انا مۇنداي ءونىم بەرمەگەنىن ايتادى.

جامانتاي بەيسەنبايەۆ، ماقتاارال اۋدانىنىڭ اكىمى:

- ماقتاارال اۋدانى بويىنشا بۇگىنگى تاڭدا 23 مىڭ گەكتار جەرگە باۋ-باقشا ەگىلگەن. 91،500 تونناسىن بەلارۋس، رەسەيگە جىبەردىك. وندىرگەن ءونىمنىڭ قۇنى 4،8 ملرد بولاتىن ءونىمدى شەتەلگە جىبەردىك. شىمكەنت، الماتى، استانا، سولتۇستىك اۋدانداردى قامتىدىق. بۇل جەرلەرگە 2،8 ملرد تەڭگەنىڭ ءونىمىن جىبەردىك.

شارۋالار ەرتە كوكتەمدە 1،5 مىڭ گەكتارعا ەگىلگەن قىرىققاباتتى ساتىپ ۇلگەرگەن. ول جەرلەرگە قايتا ەگىلگەن باقشا ونىمدەرى قارا كۇزدە پىسەدى. قاۋىن-قاربىز القاپتان تىكەلەي سۇرىپتالىپ ارتىلادى. ونى نارىققا تۇسپەي تۇرىپ ارنايى سانيتار ماماندار تەكسەرۋدەن وتكىزەدى. وبلىستىق تۇتىنۋشىلار قۇقىعىن قورعاۋ دەپارتامەنتىنىڭ ماماندارى بيىل باقشا ونىمدەرىنەن ۋلانىپ ءتۇسۋ جاعدايى تىركەلمەگەنىن ايتىپ وتىر.

جۇماعالي مۋزافاروۆ، وبلىستىق تۇتىنۋشىلار قۇقىعىن قورعاۋ دەپارتامەنتى تەحنيكالىق رەتتەۋ ءبولىمى باسشىسىنىڭ مىندەتىن اتقارۋشى:

- بىزگە نيتراتتان ۋلانۋ جونىندەگى شۇعىل حابارلاما كەلىپ تۇسكەن جوق. بۇل بويىنشا ءتىپتى شاعىم دا جوق. قاۋىندا رۇقسات ەتىلگەن نيترات كورسەتكىشى 90 بولسا، ءقازىر 87-85-كە دەيىن تومەن كەلىپ جاتىر. ءتىپتى 40-تى دا كورسەتكەندەرى بار. ال، باسقا كوكونىستەر، مىسالى، پياز، بولگار بۇرىشى جانە تاعى باسقالارىندا كورسەتكىش وتە تومەن.

ديقانداردىڭ الدى قاۋىن-قاربىزدىڭ ءار گەكتارىنان 15-20 توننادان ءونىم العان. بيىل وبلىس بويىنشا 1 ملرد 500 مىڭ توننا باۋ-باقشا ونىمدەرىن جيناۋ جوسپارلانىپ وتىر. بۇل – رەكوردتىق كورسەتكىش. وسىلايشا جىلداعىمەن سالىستىرعاندا ەسەلەپ ءونىم الىپ جاتقان شارۋالار الا جازدايعى ەڭبەكتەرىنىڭ اقتالعانىنا قۋانىشتى.