وڭتۇستىك قازاقستان وبلىسىندا ءتورت تۇلىكتىڭ ەتىنە باقىلاۋ كۇشەيتىلدى.

ءتىپتى ۆەتەرينارلار شالعاي اۋىلدارداعى مال سويۋ بەكەتتەرىنە دەيىن ءجىتى قاداعالاۋعا العان. ال قالا ءىشى اۋداندارداعى بازارلار مەن ارنايى مال سوياتىن بەكەتتەردە زەرتحانا جۇمىس ىستەپ تۇر. ولار ەتكە انىقتامانى ءۇش كۇنگە عانا بەرەدى. «تۇتىنۋشى سول انىقتاماعا قاراپ، ەتتى تاڭداپ الۋىنا بولادى»، - دەيدى مال دارىگەرلەرى.

وڭىردە مال اۋرىنىڭ اسا ءقاۋىپتى دەگەن 9 تۇرىنە قارسى ەگۋ جۇمىستارى جۇرگىزىلەدى. ءتورت تۇلىك جىلىنا ەكى رەت تەكسەرىلەدى. كوكتەمدە 475 مىڭنان استام ءىرى قارادان قان الىنىپ، ونىڭ 454-ىنەن برۋسەللەز انىقتالعان. ال 1 ميلليوننان استام ۋاق مالدىڭ ىشىنەن 919-ى وسى دەرتكە شالدىعىپتى. ولاردىڭ ءبارى زالالسىزداندىرىلدى، - دەيدى ماماندار.

قۋانىش مىرزاتايەۆ، وبلىستىق اۋىل شارۋاشىلىعى باسقارماسى ءبولىمىنىڭ باس مامانى:

- وبلىس بويىنشا قازىرگى جاعداي تۇراقتى.بىزدە 2003 جىلدان بەرى وبلىس اۋماعىندا اسا ءقاۋىپتى اۋرۋ، ونىڭ ىشىندە ءسىبىر جاراسى تىركەلمەگەن. ەت ونىمدەرىنىڭ بارلىعى بازارلارعا، دۇڭگىرشىكتەر مەن دۇكەندەرگە ۆەتەرينار ماماندارىنىڭ تەكسەرۋىنسىز تۇسپەيدى. ويتكەنى ماماندار تاڭەرتەڭنەن كەشكە دەيىن وسى جەرلەردە جۇمىس ىستەۋدە.

بەگلان ابدىحايەۆ، قالالىق اۋىل شارۋاشىلىعى جانە ۆەتەريناريا ءبولىمىنىڭ سەكتور مەڭگەرۋشىسى:

- بىزدە 12 ءىرى بازار بار. ول جەرلەردە ساراپتامالىق زەرتحانا جۇمىس ىستەيدى. قالعاندارى سوندا بارىپ، ونىمدەرىن تەكسەرتىپ تۇرادى. ونىڭ بارىنە ءبىزدىڭ ماماندار قالادان بەكىتىلگەن. ەشقانداي دا اۋرۋ ەت، كۇدىكتى ەت دەگەن ءوتىپ كەتۋى مۇمكىن ەمەس.