قالا تۇرعىندارى مىرزابەك جانە روزا شىمىربەكوۆتەر كوپقاباتتى ۇيدە تۇرسا دا، شاعىن اۋلاسىندا الما، ءجۇزىم، جاڭعاق جانە ورىك سەكىلدى اعاشتاردى ءوسىرىپ، جەمىسىن كورىپ وتىر. سونداي-اق، اينالاسىن كورىكتەندىرىپ، ۇلكەندەرگە قالانىڭ قىم-قۋىت تىرلىگىنەن ءبىر ءسات بولسا دا دەمالۋىنا جانە بالاقايلاردىڭ جازدىڭ اپتاپ ىستىعىندا كولەڭكەدە ويناۋى ءۇشىن ىڭعايلاستىرعان.
قوس زەينەتكەر «ءنۇرسات» شاعىناۋدانىنداعى №101 ۇيدە تۇرادى. ولار مۇندا وسىدان توعىز جىل بۇرىن كوشىپ كەلىپتى. العاشىندا قۇرىلىس قارقىندى ءجۇرىپ جاتقاندىقتان، اينالادا بىردە-بىر جاسىل جەلەك بولماعان ەكەن. سودان، اۋلاسىنا راۋشان گۇل وتىرعىزىپ، اعاش ەكتى. سونداي-اق، مىرزابەك شىمىربەكوۆ ءوز قولىمەن ەككەن ءجۇزىم اعاشتارى ءۇيدىڭ كىرە بەرىسىنە كۇننەن قورعايتىن پانا بولۋمەن قاتار، جەمىسىن دە بەرە باستادى. 

– قول قۋسىرىپ وتىرماي، ءۇيدىڭ اينالاسىنا ءبىر ءسات كوڭىل بولۋگە دەن قويدىم. الدىمەن اۋلانى رەتتەپ، گۇل ەكتىك. اعاشتان جاسالعان ۇلكەن ۇستەل قويدىق. وندا وسى ءۇيدىڭ تۇرعىندارى، اسىرەسە ءوزىمىز سەكىلدى زەينەتكەرلەر شاحمات پەن ناردى وينايدى. ماقتان تۇتار كورشىمىزدىڭ ءبىرى – فيلولوگيا عىلىمدارىنىڭ دوكتورى، پروفەسسور مەكەمتاس مىرزاحمەتوۆ. جازدىگۇنى ءجۇزىم كەرەمەت كولەڭكە بەرىپ تۇرادى. اينالامىزدى جاسىل جەلەكپەن كومكەرەيىك دەگەن ماقساتتا جوسپارلاعان ويلارىمىز بىرتىندەپ جۇزەگە اسا باستادى. ءقازىر اۋلاعا ءۇش ءتۇپ جاڭعاق اعاشىن ەكتىم. كۇن سايىن تاڭەرتەڭ تۇرىپ، ولاردى شەلەكتەپ سۋارامىن. ال ءۇيدىڭ ارتىندا ءۇش ءتۇپ الما مەن ورىك اجەپتەۋىر سايا. ولاردىڭ جەمىس بەرگەنىنە ءۇش جىل بولدى. ءدال قازىرگى ۋاقىتتا الما ۋىلجىپ ءپىسىپ تۇر، – دەيدى زەينەتكەر. 
شىمىربەكوۆتەر وتباسى اۋلاسىن كورىكتەندىرىپ قانا قويماي، ونىڭ تازالىعىنا دا اسا ءمان بەرەدى. ءۇيدىڭ اينالاسىن تازا ۇستاۋ تۋرالى كورشىلەرىنە ۇنەمى ەسكەرتۋ جاساپ وتىرادى. ولار مۇنى تەك ءسوز جۇزىندە عانا ەمەس، ءىس جۇزىندە دە كورسەتە ءبىلدى. ماسەلەن، ءۇيدىڭ كىرە بەرىسىنە قوقىس تاستايتىن جاشىك ورناتىپ قويعان. ءتىپتى جاس بالاعا دەيىن قوقىستى سوندا تاستاۋ كەرەكتىگىن جاقسى تۇسىنەدى. قازىرگى كەزدە كوپقاباتتى ۇيلەردىڭ ەسىكتەرى ەرىكسىز جارناما ورنىنا اينالعان. ءتۇرلى-تۇستى قاعازدار جابىستىرىلىپ، كىرە بەرىستىڭ اجارىن كەتىرىپ تۇر. ال بۇل ءۇيدىڭ ەسىگىنەن ونداي بىردە-بىر جارناما قاعازىن كورمەيسىز. بۇل ماسەلەنى شەشۋ ءۇشىن 

مىرزابەك شىمىربەكوۆ ەسىكتىڭ ەكى جانىنا ارنايى تاقتا ءىلىپ قويعان. جۇمىس ۇسىنىپ، حابارلاندىرۋ ىلگىسى كەلگەندەر ءۇشىن تاقتالار كەرەمەت مۇمكىندىك بولدى. 
مىرزابەك اعا مەن روزا اپاي الداعى ۋاقىتتا بالالار وينايتىن الاڭشانى كورىكتەندىرسەك دەپ وتىر.