ورالدا ءوز كوڭىلدەسىن ولتىرۋگە تاپسىرىس بەرگەن ەكس-اكىمگە قاتىستى سوت ۇكىمى شىقتى. تەرەكتى اۋدانىنىڭ بۇرىنعى اكىمى جەڭىس سەرىكقالييەۆ قاتاڭ رەجيمدەگى كولونيادا 11 جىل بويى جازاسىن وتەيتىن بولدى، - دەپ حابارلايدى Qamshy.kz 31-ارناعا سىلتەمە جاساپ.

ەكس-اكىم جەڭىس سەرىكقالييەۆتەن بولەك، تەرەكتى اۋدانىنىڭ تۇرعىن ءۇي كوممۋنالدىق شارۋاشىلىعىنىڭ بۇرىنعى باسشىسى مەن ونىڭ كولىك جۇرگىزۋشىسىنە دە ۇكىم شىقتى. شارۋاشىلىق باسشىسى قاجىمۇراتوۆقا ون ءبىر جىل جانە ەسىرتكىگە تاۋەلدىلىكتەن كۇشتەپ ەمدەلۋ، ال ىسماعامبەتوۆكە ون جىل باس بوستاندىقتارىنان ايىرۋ جازاسى كەسىلدى. بيىلعى جىلدىڭ 23 اقپانىندا ەكى ازامات تەرەكتى اۋدانى ەكس-اكىمىنىڭ كوڭىلدەسىنە بىرنەشە پىشاق جاراقاتىن سالادى. تەرگەۋ بارىسىندا جەڭىس سەرىكقالييەۆتىڭ ءوز دوسىنا كوڭىلدەسىن ولتىرۋگە تاپسىرىس بەرگەنى بەلگىلى بولعان. ويتكەنى ايەل ەكس-اكىمدى ورتاق قىزدارىمەن قورقىتىپ كەلگەن. ال تاپسىرىس العان قاجىمۇراتوۆ 500 مىڭ تەڭگەگە ايەلدى ءولتىرۋدى ءوزىنىڭ جۇرگىزۋشىسىنە تاپسىرىپتى.