استانادا تۇرمەدەن شىققان جانە پروباسيا قىزمەتىنىڭ ەسەبىندە تۇرعان ازاماتتاردى الەۋمەتتىك وڭالتۋدىڭ كەشەندى ستراتەگياسى تانىستىرىلدى. ق ر ىشكى ىستەر مينيسترلىگىنىڭ قىلمىستىق اتقارۋ جۇيەسى كوميتەتى ءتوراعاسىنىڭ ورىنباسارى مەيرام ايۋبايەۆتىڭ ايتۋىنشا، ستراتەگيا اياسىندا سوتتالعانداردى ومىرگە بارىنشا بەيىمدەۋ كوزدەلىپ وتىر. ول ءۇشىن جاۋاپقا تارتىلعان ادامدى الەۋمەتتىك وڭالتۋ جۇمىسىن سوتقا دەيىن باستاپ، تۇرمەدەن كەيىنگى ۋاقىتتا ومىرگە تولىعىمەن بەيىمدەلىپ كەتپەيىنشە جۇرگىزۋ قاراستىرىلعان. ءتىپتى، عالامتور مەن ۇيالى تەلەفون پايدالانۋعا رۇقسات بەرۋى مۇمكىن. سونداي-اق حالىقتىڭ وسى ساناتتاعى ازاماتتارعا دەگەن كوزقاراسىن وزگەرتۋ شارالارىنا باسىمدىق بەرۋ قاراستىرىلعان. اتالعان ستراتەگيانى ءالى قابىلداعان جوق. ازىرشە، ونى تالقىلاۋعا شىعارىپ وتىر، - دەپ حابارلايدى Qamshy.kz Baq.kz ءتىلشىسى.
ستراتەگيا جوباسىنا سايكەس، سوتتالعانداردى الەۋمەتتىك وڭالتۋ جۇمىسىن ءۇش كەزەڭ بويىنشا ىسكە اسىرۋ جوسپارلانعان. ءبىرىنشى كەزەڭگە سايكەس، سوتقا دەيىنگى تەرگەۋ امالدارى بارىسىندا ول ادامنىڭ الەۋمەتتىك پورترەتى جاسالادى. سونىڭ نەگىزىندە تۇزەۋ مەكەمەسى تاڭدالادى. ەكىنشى كەزەڭ تۇرمە قىزمەتكەرلەرىنىڭ تاربيە جۇمىستارىمەن جالعاسۋى ءتيىس.
«تۇرمەدە ءبىلىم الۋ ءۇشىن بارلىق جاعدايلاردى جاساۋ قاجەت. سوسىن ونداعى تالاپتار كادىمگىدەي ەڭبەك نارىعىنىڭ تالاپتارىنا ساي بولعانى دۇرىس. ادامنىڭ ويلاۋ قابىلەتىن دامىتىپ، دىتتەگەن ماقساتتى شەشۋگە دەگەن ىنتاسىن ۇشتاعان ءجون. ءبىلىم بەرۋدى ءداستۇرلى تۇردە عانا ەمەس، قاشىقتان وقىتۋ نەگىزىندە دە جۇرگىزۋ كەرەك. تۇرمە اكىمشىلىگى بولسا، جۇمىسپەن قامتۋ ماسەلەسىن ءجىتى باقىلاۋدا ۇستاۋى ءتيىس. ال وتباسى، تۋعان-تۋىستار مەن دوستار سياقتى الەۋمەتتىك بايلانىستاردى ۇزبەۋ كەرەك. قازىرگى اقپاراتتىق تەحنلوگيالاردى پايدالانىپ، ول بايلانىستاردى تۇرمەگە قامالعان ۋاقىتتان باستاپ، شىققانعا دەيىن ساقتاپ وتىرۋعا بولادى. ماسەلەن، سكايپ، عالامتور، ۇيالى تەلەفون جانە تاعى باسقا بايلانىس قۇرالدارىن پايدالانۋعا بولادى. ءبىراق ونىڭ بارلىعىن ىنتالاندىرۋ شاراسى رەتىندە پايدالانعان دۇرىس»، - دەيدى م.ايۋبايەۆ.
ونىڭ سوزىنە قاراعاندا، سكايپ ارقىلى تۇرمەدە وتىرعان ادام بۇكىل وتباسى مۇشەلەرىمەن سۇحباتتاسا الادى. اتالعان باستامانىڭ تاعى ءبىر ارتىقشىلىعى، سوتتالعان ازاماتتاردىڭ تۋعان-تۋىستارى ارى-بەرى ءجۇرىپ، جول شىعىندارىن شىعارمايدى. عالامتور ارقىلى بارلىعى بىردەي جازاسىن وتەپ جۇرگەن اداممەن سويلەسە الادى. وسى باستاما قولداۋ تاپسا، قىلمىستىق اتقارۋ جۇيەسىنە ارنايى تەحنيكالىق قۇرالدارىن ساتىپ الۋعا تۋرا كەلەدى. سونىڭ بارلىعى بيۋدجەتتىڭ ەسەبىنەن وتەلەدى.
ال ستراتەگيانىڭ ءۇشىنشى كەزەڭى بارىسىندا تۇرمەدەن شىققان جانە پروباسيا قىزمەتىنىڭ ەسەبىندە تۇرعان ازاماتتاردى الەۋمەتتىك وڭالتۋ شارالارى قاراستىرىلعان. وعان جەرگىلىكتى بيلىك ورگاندارى مەن قوعامىق ۇيىمدار بەلسەنە اتسالىسۋى قاجەت.
ق ر ىشكى ىستەر مينيسترلىگىنىڭ قىلمىستىق اتقارۋ جۇيەسى كوميتەتى ءتوراعاسىنىڭ ورىنباسارى مەيرام ايۋبايەۆتىڭ ايتۋىنشا، ءقازىردىڭ وزىندە تۇرمەگە تۇسكەن ازاماتتى ومىرگە بارىنشا بەيىمدەۋ شارالارى اتقارىلىپ كەلەدى. پسيحولوگ ماماندار سوتتالعان ادامدارمەن تىعىز جۇمىس جاسايدى. ءبىلىم بەرۋ شارالار دا جوق ەمەس. اتاپ ايتقاندا، بۇگىندە قىلمىستىق اتقارۋ جۇيەسىندە 57 جالپى ءبىلىم بەرەتىن مەكتەپتەر بار. ول جەردە جىل سايىن شامامەن 3،5 ادام ءبىلىم الادى. بۇدان بولەك، 47 كاسىبي كوللەدج جۇمىس ىستەيدى. وندا دانەكەرلەۋشى، اعاش ۇستاسى، سىلاقشى جانە تاعى باسقا ماماندىقتار بويىنشا 3،5 مىڭ ادام وقىپ جاتىر. جالپى، قازاقستان تۇرمەلەرىندە 40 مىڭعا جۋىق ادام جازا وتەپ ءجۇر. دەگەنمەن، اتالعان مەحانيزم ارقىلى بارلىق ماقسات-مىندەتتەرگە جەتۋ مۇمكىن بولماي وتىر. سول سەبەپتى تۇرمەدەن شىققان ازاماتتاردى الەۋمەتتىك وڭالتۋ بويىنشا كەشەندى ستراتەگيانى ازىرلەۋ جۇمىسى قولعا الىندى.
