ءبىلىم جۇيەسىن جاھاندىق رەفورما كۇتىپ تۇر. 

بۇگىندە الەمدە بىرنەشە ميلليون بالا مەكتەپ قابىرعاسىن كورمەي ءومىر سۇرۋدە. ەگەر قازىرگى ءبىلىم جۇيەسىن رەفورمالاماسا باستاۋىش بىلىممەن تولىقتاي قامتۋ ۇردىسىنە تەك 2042 جىلى قول جەتكىزۋگە بولادى ەكەن. ال ادام بالاسىنىڭ تولىقتاي ورتا ءبىلىمدى يگەرۋىنە تەك 50 جىلدان كەيىن عانا مۇمكىن بولادى. بۇل تۋرالى يۋنەسكو باستاماسىمەن جاسالعان دۇنيەجۇزىلىك ءبىلىم مونيتورينگى تۋرالى باياندامادا ايتىلعان.  

دۇنيەجۇزىلىك ءبىلىم جۇيەسىن رەفورمالاۋ تۋرالى باياندامانىڭ اۆتورلارى 2030 جىلعا دەيىنگى تۇراقتى دامۋ كۇنتارتىبىندە تۇرعان جاھاندىق ماقساتتارعا ءبىلىمنىڭ قانداي اسەرى بارىن سارالاعان. ناتيجەسىندە جەر بەتىندەگى بارشا حالىقتىڭ ءبىلىم جۇيەسىن رەفورمالاۋ قاجەت دەگەن قورىتىندىعا كەلگەن. «ءبىلىم پلانەتا جانە ادامدار ءۇشىن» دەپ اتالاتىن باياندامادا ءبىلىم سالاسىنداعى باعدارلامالاردا ەكولوگيا ماسەلەلەرىنە كوبىرەك ورىن بەرىلۋى كەرەكتىگى دە ايتىلعان.  

«بىزگە جاھاندىق دامۋ ۇردىسىندەگى ءبىلىمنىڭ ورنىنا قاتىستى كوزقاراستى تۇبەگەيلى وزگەرتۋ كەرەك. ويتكەنى ول جەكەلەگەن ادامداردىڭ ءال-اۋقاتىنا دا، پلانەتانىڭ بولاشاعىنا دا ۇلكەن اسەر ەتەدى» — دەدى، يۋنەسكو-نىڭ باس ديرەكتورى يرينا بوكوۆا، پاريجدە وتكەن جيىندا.

يرينا بوكوۆانىڭ ويىنشا، جالپى ءبىلىم جۇيەسى از ۇلتتاردىڭ مادەنيەتى مەن ءتىلىن قورعاۋدى قامتاماسىز ەتۋى ءتيىس. باياندامادا اتاپ كورسەتىلگەندەي، الەمدەگى وقۋشىلار مەن ستۋدەنتتەردىڭ 40 پايىزى وزدەرى تۇسىنبەيتىن تىلدە ءبىلىم الادى ەكەن. سونداي-اق جاڭا قۇجات ارقىلى الەمدەگى ەكونوميكالىق تالاپتارعا ساي، اسىرەسە قارقىندى اۆتوماتيزاسيامەن بايلانىستى جوعارى دارەجەدە دايىندالعان ماماندار ماسەلەسى دە كوتەرىلدى.  «قازىرگى قارقىنمەن 2020 جىلعا قاراي ءتيىستى جوعارى ءبىلىمى بار جۇمىسشىلاردىڭ جەتىسپەۋشىلىگى 40 ميلليون ادامعا جەتەدى»  — دەيدى، بايانداما اۆتورلارى.

شارافات جىلقىبايەۆا