جاقىندا عانا ەرەكشە داۋىسىمەن، اسەم انىمەن الەمدى تامساندىرعان جۇڭگو قىزى ينتەرنەت جۇلدىزىعا اينالعان ەدى. كوپتەگەن ينتەرنەت باسىلىمدار ورىنداۋشى مەن ءاننىڭ تاريحىنا توقتالىپ، جارىسا جازدى. الايدا، اتالمىش ءاننىڭ قازاق ەستراداسىندا دا شىرقالىپ جۇرگەنىن بايقادىق.

سونىمەن ول قاي ءان؟

الدىمەن قىتايلىق تان جيڭ جىن ەسىمدى كىشكەنتاي قىزدىڭ ورىنداۋىنداعى "تاڭ اتتى..." ءانىن ۇسىنامىز.

ەندى قازاقستاندىق ءانشى فاريدا جولداسوۆانىڭ ورىنداۋىنداعى "جارالى اققۋ" ءانىن تىڭداپ كورىڭىز.

ۇقساستىق بار ما؟

ەندى وسى كەزدە كىم كىمنەن ۇرلادى دەگەن سۇراقتىڭ تۋىنداۋى زاڭدىلىق. قىتايلىق ءاننىڭ تاريحىنا ۇڭىلسەك، جوعارىداعى "تاڭ اتتى..." ءانى 1999 جىلى قايعىلى وقيعاعا بايلانىستى حان حوڭ ەسىمدى كومپوزيتوردىڭ جۇرەگىنەن شىققان ەكەن. سول سەبەپتى قازاقستاندىق ورىنداۋشى فاريدا جولداسوۆانىڭ اكەسى ۇلىقپان جولداسوۆقا حابارلاسىپ، "جارالى اققۋ" ءانىنىڭ اۆتورلارىن سۇرادىق.

-"جارالى اققۋ" ءانىنىڭ ءسوزىن جازعان اۆتور ەسىمە تۇسپەي تۇر. ءبىراق ءانى بىزدىكى ەمەس. جۇڭگو ءانى. بەرتىندە ول ءاننىڭ ارانجيروۆكاسىن قايتا جاساپ، جازىپ شىققانبىز. كەيىن بۇل ءاندى فاريدانىڭ ءوزى جەكە دە، "داۋىس KZ" توبىمەن بىرگە دە ورىندادى، - دەدى ۇلىقپان جولداسوۆ.