الەمدىك نارىقتى جاۋلاعان  Apple الپاۋىتى جاڭا ونىمدەرى – iPhone 7 مەن 7 Plus سمارتفوندارىنىڭ تانىستىرىلىمىن وتكىزدى.

كورپۋسى شىنى مەن اليۋمينييدەن جاسالعان جايا «ايفونداردا» ەكى ستەرەوديناميكا مەن IP67 ستاندارتى بويىنشا سۋ وتكىزبەيتىن قورعانىش بولادى. «ايفوننىڭ» ءتۇر-تۇسىن ءتۇرلى-تۇستى ەتىپ شىعارىپ جاتقان كومپانيا بۇل جولى، سونىمەن قاتار، سىمسىز قۇلاققاپتارىن دا تانىستىردى.

حوش دەلىك.

بۇل اتاقتى «ايفونداردى» الۋعا نەمەسە ەسكى «ايفوندارىن» جاڭاسىنا اۋىستىرۋعا قازاقستاندىقتاردىڭ قالتاسى كوتەرە مە؟ جالپى قازاقستاندىقتار بۇل قىمبات ونىمگە قالاي قول جەتكىزىپ ءجۇر. بۇگىن وسىعان توقتالساق.

تانىستىرىلىمى كەشە عانا وتكەن  iPhone 7 ەلىمىزگە ءالى كەلە قويعان جوق. الايدا ءدال وسى ءونىمنىڭ 4، 5، 5 s، 6، 6 Plus، 6s سياقتى بار ءتۇرى كەڭىنەن تارادى.

بىزگە سوڭعى كەلگەن «ايفون 6» ونىمدەرىنىڭ باعاسى وسى ۋاقىتقا دەيىن ءوز قۇنىن ساقتاپ كەلەدى. ماسەلەن، «كاسپيي ماگازيندە» بۇل تاۋاردىڭ قۇنى (ونىڭ ىشىندە Space Gray،Gold، Rose Gold، Silver سياقتى تۇرلەرى مەن سمارتفوننىڭ جادىنىڭ كولەمىنە بايلانىستى) 200 مىڭ تەڭگەدەن باستاپ، 335 مىڭ تەڭگەگە دەيىن بارادى.

ال «تەحنودوم»، «سۋلپاك» سياقتى ساۋدا ورىندارىندا دا بۇدان تومەندەي قويمايدى. وسى شامادا: 200-330 مىڭ تەڭگە ارالىعىندا.

مۇنداي سوممانى قالتاڭىز كوتەرمەسە، ساۋدا ماركەتينگى دامىعان. كەڭەسشىلەر الۋشىعا كرەديتكە الۋ جولىن ۇسىنا باستايدى.

سونىمەن، ستاتيستيكالىق مالىمەتتەرگە سۇيەنسەك، وتكەن جىلعى ەسەپ بويىنشا، ەلىمىزدە ورتاشا جالاقى 118 638 مىڭ تەڭگەگە تەڭ.  ساالالىق قۇرىلىمدا ەڭ ۇلكەن جالاقى كەن ءوندىرۋ ونەركاسىبى مەن كارەرلەردى قازۋدا - 266،1 مىڭ تەڭگە (ورتاشا رەسپۋبليكالىق دەڭگەيدەن 2،2 ەسەگە استى)، كاسىبي، عىلىمي جانە تەحنيكالىق قىزمەتتە - 231،2 مىڭ تەڭگە (1،9 ەسەگە استى)، قارجى جانە ساقتاندىرۋ قىزمەتىندە 208،9 مىڭ تەڭگە (1،8 ەسەگە استى) بەلگىلەنگەن.

ال، ەڭ تومەنگى جالاقى اۋىل، ورمان جانە بالىق شارۋاشىلىعى قىزمەتكەرلەرىندە بەلگىلەندى - 58،0 مىڭ تەڭگە، بۇل ەل بويىنشا ورتا كورسەتكىشتەن 51،1 پايىزعا تومەن دەلىنگەن.

ەلدىڭ ءبارىنىڭ كەن ورىندارىندا، تەحنيكالىق قىزمەت پەن قارجى جانە ساقتاندىرۋ سالالارىندا جۇمىس ىستەمەيتىنىن ەسكەرسەك، جالپىلاما قاراپايىم جۇرتتىڭ ورتاشا جالاقسى 80-100 مىڭ تەڭگەنىڭ كولەمىندە ەكەنى بەلگىلى.

بايقاساڭىز، «ايفون» سمارتفونىن قولدانۋشىلاردىڭ دەنى – جاستار. ونىڭ ىشىندە وقۋشىلار دا، ستۋدەنتتەر دە، جاس ماماندار دا بار.

سونىمەن وقۋشىلار مەن ستۋدەنتتەر بۇل قىمبات سمارتفونعا قالاي قول جەتكىزەدى؟

جاۋاپ بەلگىلى.

وقۋشىلارعا اتا-انالارى الىپ بەرەدى. ءبىر عانا سەبەپ: بالام قاتارىنان قالماسىن. ءبىر عانا جول: كرەديت.

ستۋدەنتتەر وزدەرى الادى. ارينە، كرەديتكە. ءبىر عانا جۇبانىشى: شاكىرتاقىدان تولەۋ.

مارجان، ستۋدەنت:

-نەگىزى ايفوندى ءبىر ۇستاساڭ، كەيىن باسقا تەلەفون ۇستاعىڭ كەلمەي قالادى. بۇل سمارتفوننىڭ مۇمكىندىگى كوپ. مىسالى مەن فوتو-فيدەو تۇسىرۋمەن اۋەستەنەم. كاسىبي فوتواپپاراتتار مەن ءۇشىن ارتىق. قالتامدا جۇرگەن ايفون ارقىلى قالاعان فوتومدى، قالاعان ۆيدەومدى تۇسىرەمىن. سوندىقتان شىعار، ماعان ىڭعايلى. باسىنان باستاپ الىپ كەلەم. مەندە 5 تە، 6 دا بولدى. ءقازىر 6 s ۇستاپ ءجۇرمىن. ارينە، بارلىعىن كرەديتكە الدىم. جاڭاسىنا اۋىستىراتىن كەزدە، باستاپقى قۇنىنان ءسال-اق تومەن باعاعا ساتىپ جىبەرەمىن.

ەرسۇلتان، وقۋشى:

-مەن ەكى جىلدان بەرى ۇستاپ ءجۇرمىن وسى تەلەفونىمدى. سىنىپتاستارىم جاپپاي العاندا مەن دە اكەمە ءوتىنىش ايتقام. ول تۋعان كۇنىمە سىيلادى.

جانسايا، (الماتى)

-وتكەن جىلى ءسىڭىلىم وقۋعا تۇسكەندە سىڭىلىمە الىپ بەردىم. ءتۇر-تۇسىن تاڭداپ جۇرسەم، ساتۋشىلار «ساقتاندىرۋ قوساسىز با، قانشا جىلعا الاسىز» دەپ راسىمدەۋگە دايىندالىپ ءجۇر. مەن كرەديتكە ەمەس، قولما-قول ساتىپ الاتىنىمدى ايتقاندا، «ايفوندى كرەديتسىز، 200 مىڭ تەڭگەگە ساتىپ الۋشىلار سيرەك كەلەدى بىزگە» دەپ كۇلدى ساتۋشىلار.

سونىمەن، قوماقتى قارجىلاي، تۇرمىستىق تەحنيكاعا ارنالعان تاۋارلار جانە باسقا جولمەن كرەديت الىپ، از ايلىعىنىڭ جارتىسىن سوعان تولەپ جۇرگەن ازاماتتاردان وزگە، iPhone ءۇشىن كرەديتكە بايلانعان قازاقستاندىقتاردىڭ سانىن بولجاۋ مۇمكىن ەمەس.

ينديرا قۋات