ايەلدەر تۇرمەسىن گارەمگە اينالدىرعان! تەرگەۋ قاپاسىندا زورلانىپ، ءقازىر سوتى بولىپ جاتقان ناتاليا سلەكيشينامەن بىرگە وتىرعان كەلىنشەك اباقتىداعى سوراقىلىقتى سوتتا ايتىپ بەردى، - دەپ حابارلايدى Qamshy.kz كتك ارناسىنا سىلتەمە جاساپ.

تەرگەۋ قاپاسىندا قىز-قىرقىنعا تىنىشتىق جوق دەيدى بۇرىن سوتتالعان ايەل. مۇنداعى قىزمەتكەرلەر ولاردى تۇنىمەن توسەككە سۇيرەيتىن كورىنەدى. تەمىر توردىڭ ار جاعىنداعى قىز-كەلىنشەك تۇرمەدە ءجۇرىپ-اق جۇكتى بولىپ جاتاتىنى سودان ەكەن.

مارينا – قاپاستا كورەسىنى كورگەندەردىڭ ءبىرى. ءبىراق تولىق كەلىنشەكتى قۇداي ساقتاپ تەرگەۋ اباقتىسى قىزمەتكەرلەرى توپەلەپ ۇرعاننان ارىعا بارماپتى. الايدا ونىمەن بىرگە وتىرعان باسقا قىزدارعا تۇنىمەن تىنىشتىق جوق ەكەن.        

مارينا:

-ولار تۇڭگى ەكىدە بىردە كەلىپ قىزداردى شىعارىپ الىپ كەتەدى. سوسىن كوبى جىلاپ ورالادى.

تەرگەۋ قاپاسىنىڭ قىزمەتكەرلەرى وسىلايشا سوتىن كۇتكەن كەلىنشەكتەرگە كۇن كورسەتپەيدى ەكەن. كۇزەتشىسىنەن باستاپ، قالتا تەكسەرۋشىسىنە دەيىن كەزەكشىلىك اتقارعان ءتۇنى كىلتتەۋلى ەسىكتى اشاتىن كورىنەدى. وندا دا توسەكتەس بولاتىن سوتتالۋشىنى جاسىنا قاراپ تاڭدايدى. 

مارينا:

-كىل جاس قىزداردى زورلايدى. كوبىنە 18-دەن 28 جاسقا دەيىنگىلەر.

وسى سوراقىلىقتىڭ ءبارى ەندى سلەكيشينانىڭ تەرگەۋ قاپاسىندا زورلانۋىنا قاتىستى سوتتا اشىق ايتىلۋدا. اباقتىدا اياعى اۋىر بوپ قالعانداردىڭ سانى ازىرگە ون شاقتى. ال بالا كوتەرمەگەنى قانشاما. جازاسىن ءقازىر وتەپ جاتقان 32 جاستاعى ناتاليا سلەكشينانى ءتورت بىردەي قىزمەتكەر زورلادى دەلىنگەنىمەن، سوتتا تەك بىرەۋى جاۋاپ بەرىپ جاتىر. ول تۇرمەدە تۋىلعان ءسابيدىڭ اكەسى دەپ تانىلعان مايور رۋسلان حاكيموۆ. قالعانى تەك كۋاگەر رەتىندە قاتىسۋدا.  

ايمان وماروۆا، ن.سلەكيشينانىڭ ادۆوكاتى:

-سوتقا شاقىرىلعان قىزمەتكەرلەر جاپپاي جالعان كۋالىك بەرىپ جاتىر. ءوز سوزدەرىنە وزدەرى قارسى شىعۋدا. ودان قالدى، كوپتەگەن ساۋالدار جاۋاپسىز قالدى. ماسەلەن، سلەكيشينانىڭ اباقتىدا زورلانعانى تۋرالى پروكۋرورعا جازعان قاعازىنىڭ قايدا كەتكەنىن تۇسىندىرە المادى. وسىلايشا ءىستى جابۋعا بارىنشا تىرىسىپ باعۋدا.

ناتاليانىڭ ءسابيىنىڭ اكەسى ەكەنى راستالعانىنا قاراماستان، حاكيموۆ سوتتا ءوزىن بارىنشا اقتاپ جاتىر. ايتۋىنشا، سلەكيشينانىڭ ءوزى توسەكتەس بولۋعا ىقىلاس ءبىلدىرىپتى. وسىلاي دەگەن كۇدىكتىنىڭ الەۋمەتتىك جەلىدەگى پاراقشاسى سەكسۋالدىق سيپاتتاعى سۋرەتتەرگە تولىپ تۇر. قىزدار ونىڭ ەسىمىن توسىنە دەيىن جازىپتى. ال سوتتالۋشىلار مەن تۇرمە قىزمەتكەرلەرى اراسىنداعى تەكەتىرەستىڭ ازىرگە نەمەن اياقتالارى بەلگىسىز. سوت جابىق وتۋدە.