قۇقىق قورعاۋ ورگاندارى مەن اسكەريلەرگە قارسى جاسالعان جازداعى لاڭكەستىك شابۋىلداردان كەيىن بۇل مەكەمەلەردە قاۋىپسىزدىك شارالارى كۇشەيتىلۋدە! پوليسيا عيماراتتارىنىڭ ماڭايىنا كادىمگى بەكىنىس سياقتى بيىك قورشاۋلار ورناتىلىپ، جاڭا قاقپالار قويىلىپ جاتىر. بۇعان قوسا، سىرتقى قاقپاسىندا باقىلاۋ پۋنكتتەرى پايدا بولعان، - دەپ حابارلايدى Qamshy.kz كتك ارناسىنا سىلتەمە جاساپ.

جازدا اقتوبە مەن الماتىدا بولعان قاندى وقيعالار ءالى دە ەل ەسىندە. قوس جاعدايدا دا لاڭكەستەر كۇش قۇرىلىمدارىن نىساناسىنا الدى. پوليسيا مەن باسقا دا شۇعىل قىزمەتتەر وتىرعان عيماراتتاردىڭ سودىرلارعا توتەپ بەرۋگە جارامسىز ەكەنى سول كەزدە ايتىلعان بولاتىن. ءسويتىپ سىرتقى قورشاۋلاردى بەكىتۋ شۇعىل قولعا الىنىپتى. ءقازىر ەلىمىزدەگى مۇنداي عيماراتتاردىڭ داربازالارى جاپپاي نىعايتىلىپ جاتىر.

اسىرەسە، لاڭكەستەر شابۋىل جاساعان نىساندار باستى نازاردا. سودىرلار اۆتوبۋسپەن بۇزىپ وتكەن اقتوبەدەگى اسكەري ءبولىمنىڭ قاقپاسى جاڭارتىلعان. تەك قاڭىلتىردىڭ ورنىنا قايتادان قاڭىلتىر قويىلىپتى. ۇزىندىعى دا ادام بويىنان اسپايدى. ال قاسكويلەر باسا كوكتەپ كىرگەن الماتىداعى المالى اۋدانى ىشكى ىستەر باسقارماسىنىڭ عيماراتى تاسپەن قالانىپ قورشالۋدا.

ء-قازىر بيىك قورشاۋ مەن باقىلاۋ پۋنكتى تۇرعىزىلىپ جاتىر. ەندى عيماراتقا تەك قولىندا ءتولقۇجاتى بار ادامدار كىرە الادى. نەمەسە قىزمەتكەرلەر ونى شىققانشا باقىلاپ جۇرەدى. جىل سوڭىنا دەيىن الماتىداعى بارلىق اۋداندىق پوليسيا بولىمدەرىندەگى قاۋىپسىزدىك شارالارى كۇشەيتىلەدى

ەلىمىزدىڭ وزگە وڭىرلەرىندە دە ءدال وسىنداي جاعداي. الايدا ءقاۋىپ جاڭا قورشاۋ قويۋمەن سەيىلمەيتىنى انىق. 

دوسىم ساتبايەۆ، ساياساتتانۋشى:

- جانكەشتىلەرمەن بۇلايشا كۇرەسۋدىڭ ەش پايداسى جوق. ءبارى قۇقىق قورعاۋ سالاسى قىزمەتكەرلەرىنىڭ شەبەرلىگىنە بايلانىستى. كەز-كەلگەن جاعدايدا شاپشاڭ جۇمىس ىستەي ءبىلۋ قاجەت. ال تاستان قالانعان قورشاۋدى تەرروريستەردىڭ بۇزىپ ءوتۋى قيىن بولماس. قايتا قارۋ-جاراق ساتاتىن دۇكەندەردى باقىلاۋعا الۋ كەرەك.

بۇعان قوسا، قۇقىق قورعاۋ ورگانى عيماراتتارىنىڭ سىرتقى قاقپاسىندا باقىلاۋ پۋنكتتەرى پايدا بولعان. ياعني وعان كىرىپ-شىققان ادامدار ەندى بۇرىنعىدان دا قاتاڭ تەكسەرىلمەك.