استانا قالاسىنىڭ مامانداندىرىلعان اۋدانارالىق اسكەري سوتىندا بۇرىنعى بيزنەسمەن توقتار تولەشوۆكە  قاتىستى العاشقى سوت وتىرىسى باستالدى. قىلمىستىق ءىس جابىق تۇردە قارالىپ جاتىر. بۇقارالىق اقپارات قۇرالدارى سوت ءدالىزىن كۇزەتۋدە، - دەپ حابارلايدى Qamshy.kz قازاقپاراتقا سىلتەمە جاساپ.

توقتار تولەشوۆ «شىمكەنتسىرا» زاۋىتىنىڭ بۇرىنعى يەسى ەدى. 2016 جىلدىڭ قاڭتارىندا شىمكەنتتە كۇش قۇرىلىمدارى ارنايى وپەراسيا جۇرگىزىپ، ونى قولعا تۇسىرگەن بولاتىن. ارادا التى اي وتكەن سوڭ، ياعني، ماۋسىم ايىندا ۇلتتىق قاۋىپسىزدىك كوميتەتى رەسمي مالىمدەمە جاساي وتىرىپ، توقتار تولەشوۆكە قاراجاتى مەن لاۋازىمىن پايدالانا وتىرىپ، بيلىكتى كۇشپەن باسىپ الۋعا ارەكەتتەندى دەگەن ايىپ تاقتى. بۇل ويىن جۇزەگە اسىرۋ ءۇشىن توقتار تولەشوۆ قۇزىرلى ورگاندار مەن اسكەري سالاداعى ۆەدومستۆولاردان سىبايلاستار تاپقان ەكەن. جالپى، وسى قىلمىستىق ىستە 25 فيگۋرانت بار.

ەل بيلىگىن كۇشپەن باسىپ الۋعا ارەكەتتەندى دەگەن ايىپتان باسقا، توقتار تولەشوۆكە ادام ۇرلادى، بيلىكتى باسىپ الۋعا ۇگىت-ناسيحات جاسادى، زاڭسىز قارۋ-جاراق ساقتادى دەگەن تاعى ونداعان باپ بويىنشا كىنا تاعىلىپ وتىر.

ايتىپ وتكەنىمىزدەي، سوت جابىق تۇردە ءوتىپ جاتىر. ويتكەنى، قىلمىستىق ىستە مەملەكەتتىك قۇپيالارعا قاتىستى دەرەكتەر بار. سوت ءتوراعاسى - ەربول احمەتجانوۆ.