گۋربانگۋلى بەردىمۋحامەدوۆ ەلدىڭ نەگىزگى زاڭىنا ەكى وزگەرتۋ ەنگىزۋ ارقىلى پرەزيدەنت تاعىندا ماڭگىلىك وتىرۋعا مۇمكىندىك الدى. جۋىردا تۇرىكمەنستاندا جاڭا اتا زاڭ كۇشىنە ەندى. سوعان ساي قازىرگى ەل باسشىسى گۋربانگۋلى بەردىمۋحامەدوۆ حالقىن ماڭگىلىك باسقاراتىن بولدى. سوڭعى رەت بۇل ەلدە پرەزيدەنت سايلاۋى 2012 جىلى وتكەن. ال كەلەسى سايلاۋ 2017 جىلعا جوسپارلانعان. 

بۇعان دەيىنگى زاڭ بويىنشا ەل پرەزيدەنتى بولىپ جاسى 70-كە تولماعان ادام سايلانا الاتىن. بەردىمۋحامەدوۆ جاسقا شەكتەۋدى الىپ تاستادى. ونىڭ جاسى ءقازىر 59-دا. زاڭعا ەنگىزىلگەن ەكىنشى وزگەرىس پرەزيدەنت وكىلەتتىگىن بەس جىلدان جەتى جىلعا ۇزارتۋ.  

بۇل وزگەرتۋدى تۇرىكمەنستان پارلامەنتى ءبىر اۋىزدان قابىلدادى. داۋىس بەرۋ پرەزيدەنتتىڭ قاراماعىنداعى اقساقالدار كەڭەسىندە وتكەن. وسى وتىرىستا بەردىمۋحامەدوۆ زاڭعا قول قويدى. 

"رابيو سۆوبودا"-عا سەنسەك، تۇرىكمەنستان باسشىسىنىڭ 12 جاسار نەمەرەسىن مۇراگەرلىككە دايىنداپ جاتقانى تۋرالى اقپاراتتار تاراعان كورىنەدى. Foreign Policy جۋرنالى تۇرىكمەنستان پرەزيدەنتىن جاھانداعى ەڭ ناشار 23 ديكتاتوردىڭ تىزىمىندە بەسىنشى ورىنعا قويعان. 

اتالمىش اقپارات كوزى گۋربانگۋلى بەردىمۋحامەدوۆتىڭ سوڭعى ءجۇز جىلدا بولماعان بيلەۋشى ديناستيا قۇرۋدى ۇيعارعانىن جازادى. ونىڭ 12 جاسار نەمەرەسى كەريمگۋلى جۇرتتىڭ نازارىنا ىلىككەن ءجاسوسپىرىم. بىلتىر اشحابادتا احالتەكە سايگۇلىكتەرىنىڭ بايگەسى بولىپتى. وسى جارىستا كەريمگۋلى بەردىمۋحامەدوۆ ءبارىن باسىپ وزىپ، مارەگە 1 مينۋتۋ 18،4 سەكۋندتا جەتىپ، جۇرتتى تاڭ قالدىرىپتى.  بايگە اياقتالعاندا اۋەدە ۇشاقتار قالىقتاعان. كەريمگۋلىنىڭ اتاسىنىڭ ءوزى بوس ۋاقىتىن ات سپورتىنا ارنايدى ەكەن.  

بۇل بالا سوڭعى ءۇش-تورت جىلدا ەل باسشىسىمەن بىرگە القالى جيىندارعا قاتىسىپ، ءتىپتى سايلاۋ ۋچاسكەلەرىنە دە بارادى. "حرونيكا تۋركمەنيستانا" ينتەرنەت باسىلىمىنىڭ باس رەداكتورى فاريد تۋحباتۋلليننىڭ ايتۋىنشا، بەردىمۋحامەدوۆتىڭ سەردار ەسىمدى ءبىر ۇلى مەن ەكى قىزى بار. كەريمگۋلى بەردىمۋحامەدوۆ — پرەزيدەنتتىڭ بەس نەمەرەسىنىڭ ۇلكەنى. 

دانا قامشىبەك