پاۆلودار وبلىسىنىڭ ەرتىس اۋدانىنا قاراستى قىزىلقاق اۋىلى تۇرعىندارى پوليسيا قىزمەتكەرلەرىنىڭ زاڭسىز ارەكەتىنە شاعىم ايتىپ، نارازىلىق ءبىلدىردى، - دەپ حابارلايدى Qamshy.kz حابار24 ارناسىنا سىلتەمە جاساپ.

تۇرعىنداردىڭ ايتۋىنشا، شۇعىل ارەكەت ەتۋ جاساعى ارىز يەلەرىن جاپپاي ساباعان. جابىرلەنۋشىلەردىڭ اراسىندا 15 جاستاعى ءجاسوسپىرىم دە بار. ءىىد-نىڭ جەدەل ارەكەت ەتۋ توبى ءتۇن اۋعان شاقتا اۋىلعا كەلىپ، تەرگەۋ جۇمىستارىن جۇرگىزسە كەرەك. ال، ۇيىمداسقان قىلمىسقا قارسى كۇرەس باسقارماسى "پوليسياعا قارسى شىققان جاعدايدا كۇش قولدانۋ ەرەجەلەسى بار" ەكەنىن العا تارتىپ وتىر. ءتارتىپ ساقشىلارىنان تاياق جەگەن اۋىل تۇرعىندارىنىڭ ءبىرى - جىلقىشى ەربول قابىلبەكوۆ. قۇربان ايتقا شاقىرعان اۋىلداسىنىڭ ۇيىنە قوناققا بارا جاتقان جولدا تاياق جەپتى. ايتۋىنشا ارنايى فورما كيگەن ادامدار ەر-ازاماتتاردى ۇرىپ سوققان. ءقازىر ميى شايقالىپ، قابىرعاسى سىنىپ اۋرۋحانادا جاتىر.

ەربول قابىلبەكوۆ، جابىرلەنۋشى:

- ەندى مەن ايتقا بارا جاتقان جەرىمنەن قوناققا، موتوسيكلمەن كەلە جاتىپ ۇستاپ الدى. تۇسە سالا تەپكىلەدى. قولمەن دە ۇردى. سوسىن جاتقىزىپ قويىپ ۇردى. دارىگەر كەلدى سوسىن ۇيگە الىپ كەتتى.

بۇگىن تاعى 4 اۋىل تۇرعىنى دارىگەرلەردىڭ كومەگىنە جۇگىنىپتى. اكەسىن ۇرىپ جاتقاندارعا تويتارىس بەرەم دەپ ءجابىر كورگەن ون بەس جاسار تەمىرلان احمەتوۆتىڭ كەۋدە قۋىسىنا زاقىم كەلگەن.

تەمىرلان احمەتوۆ، جابىرلەنۋشى:

- مەن مەكتەپتەن كەلە جاتتىم. كوشەدە اكەمدى ۇرىپ جاتىر. نە ىستەپ جاتىرسىڭدار دەسەم مەنى مىنا جەرىمنەن ءبىر پەرىپ قۇلاتتى، تەۋىپ سالدى. ۇشەۋى ماسكادا بولدى، اۆتوماتپەن.

اۋسەن الكەيەۆ، ەرتىس اۋداندىق اۋرۋحاناسىنىڭ حيرۋرگى:

- جالپى ناۋقاستار قىزىلقاق اۋىلىنان كەلدى. جابىرلەنۋشى 5 ناۋقاس بولعان. ونىڭ ءبىرى اۋرۋحاناعا جاتقىزىلدى. سول جاعىنان سەگىزىنشى قابىرعاسى سىنعان.

اۋىل يمامى، تاريح ءپانىنىڭ ءمۇعالىمى، كاسىپكەر، مەكتەپ وقۋشىسى ۇزىن سانى 11 ادام زارداپ شەككەن. شۇعىل ارەكەت ەتۋ توبىمەن ۇيىمداسقان قىلمىسقا قارسى كۇرەس ءبولىمى قىزىلقاق اۋىلىنا ارتەميا-سالينا شاياندارىن اۋلايتىن كولدى كۇزەتۋگە بارعان. تۇرعىندار تۇزدى كولدەن قۇندى جاندىكتەردى اۋلاۋعا بولمايتىنىن بىلسە دە، بۇل جەردى كاسىپكە اينالدىرعان. قانشا رەت ەسكەرتىلگەنمەن اۋىلدىقتار بۇل ادەتىن قويماپتى. پوليسياعا قارسى شىعىپ، زاڭعا باعىنباعان سوڭ وسىنداي جاعدايعا باردىق دەپ وتىر.

ناريمان الييەۆ، وبلىستىق ءىىد ۇيىمداسقان قىلمىسقا قارسى كۇرەس ءبولىمىنىڭ باسشىسى:

- قىزمەتكەرلەر «قۇقىق قورعاۋ جونىندە» قولدانىستاعى زاڭ بويىنشا ارەكەت جاسادى. وندا قانداي دا ءبىر وقيعا بولعاندا كۇش قولدانۋعا بولادى دەلىنگەن. بۇل جاعدايدا ءبىزدىڭ قىزمەتكەرلەر سامبونى قولداندى.

ءقازىر وسى وقيعا بويىنشا قىلمىستىق كودەكستىڭ 362 بابىمەن قىزمەتتىك وكىلىتتىگىن اسىرا پايدالانۋ دەرەگى بويىنشا قىلمىستىق ءىس قوزعالىپ، تەرگەۋ جۇمىستارى باستالىپ كەتتى.