شقو باسشىسى دانيال احمەتوۆ «لك گەس» جشس-دا بولدى، قۇرىلىس جانە اۋىل شارۋاشىلىعى نىساندارىن ارالادى، ورمان شارۋاشىلىعى جانە تۋريزم سالالارىنداعى جوبالارمەن تانىستى، جەكە سۇراقتار بويىنشا ازاماتتاردى قابىلدادى جانە ريددەردەگى ءۇي قۇرىلىسى ماسەلەسى بويىنشا جيىن وتكىزدى، دەپ حابارلادى وبلىستىق اكىمدىكتىڭ باسپا ءسوز قىزمەتى.

وبلىس اكىمى دانيال احمەتوۆ الدىمەن ريددەردەگى «لك گەس» جشس-عا سوقتى. ءۇلبى وزەنىندەگى گيدروقۇرىلىمدى قالىپقا كەلتىرۋ جۇمىستارى قىزۋ ءجۇرىپ جاتىر. كاسىپورىن باسشىلىعىنىڭ جوسپارىنا قاراي جىل سوڭىنا دەيىن ەكى تۋربينا ىسكە قوسىلادى. ولار  24 مۆت  ەلەكتر ەنەرگياسىن وندىرمەك.

كەيىن ءوڭىر باسشىسى «ورمان شارۋاشىلىعى جانە اگروورمانمەليوراسياسى قازاق عىلىمي-زەرتتەۋ ينستيتۋتى» ج ش س التايلىق فيليالىندا بولدى. مۇندا ورمان ونىمدەرىن قايتا وڭدەۋ سالاسىنداعى جوبالار تانىستىرىلدى. دانيال احمەتوۆ بيزنەس-جوسپارلار ازىرلەۋدى تاپسىردى.

ريددەر قالاسىندا ميچۋرين كوشەسىنىڭ بويىندا سالىنىپ جاتقان 280 ورىندىق بالاباقشا ۇزاق مەرزىمدى قۇرىلىستاردىڭ قاتارىندا. وبلىس باسشىلىعى اتالعان نىسانعا بولىنگەن قارجىنى قايتارىپ، وزگە نىساندارعا ۇيلەستىرۋ ماسەلەسىن كوتەرگەن. الايدا ونىڭ قۇرىلىسىن وزگە مەردىگەر قولعا الدى. ول وبلىس اكىمىنە بالاباقشا جىل سوڭىنا دەيىن قولدانىسقا بەرىلەتىنىن ايتىپ سەندىردى.

«نۇر وتان» پارتياسىنىڭ ريددەرلىك فيليالىنىڭ عيماراتىندا دانيال احمەتوۆ جەكە ماسەلەلەر بويىنشا ازاماتتاردى قابىلدادى جانە ريددەر قالاسىنداعى ءۇي قۇرىلىسى ماسەلەسى بويىنشا جيىن وتكىزدى.  جيىن قورىتىندىسى بويىنشا ەكى ءۇيدىڭ قۇرىلىسى ءۇشىن قاراجاتتى وبلىستىق بيۋدجەتتەن ءبولۋ شەشىمى قابىلداندى.  پاتەرلەر قازاقستاننىڭ تۇرعىن ءۇي قۇرىلىس بانكى جەلىسى بويىنشا تاپسىرىلادى.

ريددەردە اكىم حوككەي ءمودۋلىن قايتا قۇرىلىمداۋ جۇمىستارىمەن تانىستى، «دۋدكين س.ن.» شارۋا قوجالىعىنىڭ 400 باس مال ۇستايتىن ءسۇتتى-تاۋارلى فەرماسىندا بولدى.

جۇمىس ساپارىنىڭ سوڭىندا وبلىس اكىمى «سينەگورە» دەمالىس بازاسىنا سوقتى. مۇندا تۋريزم بويىنشا جوبالار تانىستىرىلدى. «Arman Village» جوباسى بويىنشا دانيال احمەتوۆ بيزنەس-جوسپار قۇرىپ، ونى قاراستىرۋدى تاپسىردى.