ەلباسى نۇرسۇلتان نازاربايەۆتىڭ «100 ناقتى قادام» ۇلت جوسپارىن جۇزەگە اسىرۋعا باعىتتالعان بەس ينستيتۋتتىق رەفورماسىنىڭ ورىندالۋ بارىسىن ناسيحاتتاۋ جانە ءتۇسىندىرۋ ماقساتىندا الماتى قالالىق دەموكراتيالىق كۇشتەر كواليسياسىنىڭ كەزەكتى وتىرىسى ءوتتى، - دەپ حابارلايدى Qamshy.kz aikyn.kz - كە سىلتەمە جاساپ.
باسقوسۋدا «يندۋسترياليزاسيا جانە ەكونوميكالىق ءوسۋ» باعىتىنىڭ العاشقى ناتيجەلەرى تالقىلاندى.
جيىندى اشقان الماتى قالاسى دەموكراتيالىق كۇشتەر كواليسياسى ءتوراعاسىنىڭ ورىنباسارى احمەتجان شاردينوۆ:
– قازىرگى ۋاقىتتا الماتى قالاسىندا مەملەكەتتىك يندۋستريالدى-يننوۆاسيالىق دامۋ، 2020 جىلدارعا دەيىنگى قالانى وركەندەتۋ باعدارلاماسى سياقتى ءبىرقاتار ناقتى قۇجاتتار قابىلداندى. سونىڭ ناتيجەسىندە وڭتۇستىك مەگاپوليستە قارقىندى ءوسۋ بار، وركەندەۋ بار. شاعىن جانە ورتا بيزنەس تە دامىپ كەلەدى. وسىنىڭ ءبارى ەڭ باستىسى – قاراپايىم تۇرعىنداردىڭ ءال-اۋقاتىن كوتەرۋگە باعىتتالعان، – دەپ اتاپ ءوتتى.
«اۋىل»، «اقجول» دەموكراتيالىق پارتياسى، قازاقستان كوممۋنيستىك حالىقتىق پارتياسى، «بىرلىك» پارتياسى مەن جەرگىلىكتى مەملەكەتتىك ورگاندارىنىڭ وكىلدەرى، عالىم ساراپشىلار ەل ومىرىندە جۇزەگە اسىرىلىپ جاتقان اۋقىمدى جەتىستىكتەر مەن ەلەۋلى ناتيجەلەردىڭ از ەمەس ەكەنىن جەتكىزدى.
– «100 ناقتى قادام» ۇلت جوسپارى ەلىمىزدەگى يندۋستريالدى-يننوۆاسيالىق دامۋدى قامتاماسىز ەتە وتىرىپ، قازاقستانداعى باستاۋ العان ەكونوميكالىق رەفورمالاردى تەرەڭدەتۋ ارقىلى الەمدىك قۋاتتى ەكونوميكالىق جۇيەگە قوسىلۋعا بەت العان ەرەكشەلىگىمەن قۇندى، – دەپ باعا بەردى ق ر ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ.
جىبەك جولى بويىندا ورنالاسقان الماتى شاھارىنىڭ ورتا ازياداعى قارجىلىق، ەكونوميكالىق، ونەركاسىپتىك ءىرى ورتالىق ەكەنىن ايتا كەلىپ، قالالىق كاسىپكەرلىك جانە يندۋستريالدى-يننوۆاسيالىق دامۋ باسقارماسى باسشىسىنىڭ ورىنباسارى عانيبەك اۋباكىروۆ ءوز سوزىندە سول ارتىقشىلىقتىڭ ارقاسىندا باسەكەلەستىككە لايىقتى ءوندىرىس ورىندارى مەن كاسىپكەرلىك نىساندارىنىڭ كوپتەپ اشىلىپ جاتقاندىعىنا كەڭىنەن توقتالدى.
«وسىعان بايلانىستى شاعىن جانە ورتا بيزنەستى دامىتۋ، ينۆەستورلاردى تارتۋ ماقساتىندا مەملەكەت وڭىرلىك كاسىپكەرلەر پالاتاسى ارقىلى جاڭا كاسىپ يگەرۋشىلەرگە ايرىقشا جاعداي تۋعىزىپ، قولداۋ كورسەتىپ وتىر»دەپ پىكىر قوستى الماتى قالالىق كاسىپكەرلەر پالاتاسى ديرەكتورىنىڭ ەكونوميكالىق ماسەلەلەر جونىندەگى ورىنباسارى تيمۋر حاكيموۆ.
جيىن قورىتىندىسىندا قالالىق دەموكراتيالىق كۇشتەر كواليسياسىنىڭ مۇشەلەرى ۇلت جوسپارىنىڭ «يندۋسترياليزاسيا جانە ەكونوميكالىق ءوسۋ» باعىتىنىڭ قازىرگە دەيىنگى ناتيجەلەرىن وڭ باعالاي وتىرىپ، بۇل سالاداعى جۇمىستاردىڭ تابىستى جۇرگىزىلۋىنە بارلىق جاعىنان قولداۋ كورسەتەتىندەرىنە سەنىم ءبىلدىردى.
