ۇلتتىق ەكونوميكا ءمينيسترى قۋاندىق بيشىمبايەۆ قازاقستان پارلامەنتى ماجىلىسىندە وتكەن ۇكىمەت ساعاتى بارىسىندا اعىمداعى ەكونوميكالىق جاعداي تۋرالى، «نۇرلى جول» مەملەكەتتىك باعدارلاماسىنىڭ 9 قىركۇيەكتە ۇكىمەتتىڭ كەڭەيتىلگەن وتىرىسىندا مەملەكەت باسشىسى بەرگەن تاپسىرمالاردىڭ ىسكە اسىرىلۋى تۋرالى باياندادى.
مينيسترلىكتىڭ دەرەكتەرى بويىنشا، تۇرعىن ءۇيدىڭ بارلىق تۇرلەرىن، ونىڭ ىشىندە جەكە تۇرعىن ءۇي قۇرىلىسىن دامىتۋ ءۇشىن «نۇرلى جول» مەملەكەتتىك باعدارلاماسىندا جاپپاي قۇرىلىس سالۋ اۋداندارىندا ينجەنەرلىك-كوممۋنيكاسيالىق ينفراقۇرىلىم سالۋ كوزدەلگەن، - دەپ جازادى Qamshy.kz Turkystan.kz - كە سىلتەمە جاساپ.

«بۇل ماقساتتارعا 2015-2016 جىلدارى 151،8 ملرد. تەڭگە ءبولىندى. 2016-2017 جىلدارى ءبىز جەكە تۇرعىن ءۇي قۇرىلىسىنا ارنالعان 100،9 مىڭ ۋچاسكەنى قاجەتتى ينجەنەرلىك ينفراقۇرىلىممەن قامتاماسىز ەتەمىز. ينفراقۇرىلىم بۇگىنگى كۇنى بەرىلگەن 57،4 مىڭ جەر ۋچاسكەسىنە جانە جاڭا 43،5 مىڭ ۋچاسكەگە جۇرگىزىلەتىن بولادى. 2017 جىلى قاجەتتى ينجەنەرلىك ينفراقۇرىلىممەن قامتاماسىز ەتۋ ءۇشىن 84 ملرد. تەڭگە جۇمساۋ جوسپارلانۋدا» دەپ مالىمدەدى بيشىمبايەۆ.

ۇكىمەتتىڭ كەڭەيتىلگەن وتىرىسىندا ايتىلعان، مەملەكەت باسشىسى بەرگەن تاپسىرمالاردىڭ ىسكە اسىرىلۋى تۋرالى بايانداما جاساي وتىرىپ، مينيستر الەۋمەتتىك-ەكونوميكالىق ساياساتتىڭ باستى مىندەتتەرىنىڭ ءبىرى حالىقتى ءونىمدى جۇمىسپەن قامتۋدى قامتاماسىز ەتۋ جانە ءوزىن ءوزى جۇمىسپەن قامتۋ پروبلەماسىن شەشۋ بولىپ تابىلاتىنىن اتاپ كورسەتتى.

«ءبىزدىڭ مىندەتىمىز – ءوزىن ءوزى جۇمىسپەن قامتىعانداردى ءونىمدى جۇمىسپەن قامتۋعا كوپتەپ تارتۋ جانە ولاردىڭ تابىسىن ۇلعايتۋ» — دەدى مينيستر.
2017 جىلدان باستاپ «جالپىعا ارنالعان تەگىن كاسىپتىك-تەحنيكالىق ءبىلىم بەرۋ» جوباسى ىسكە قوسىلاتىن بولادى. ودان باسقا، ميكروكرەديتتەۋدى دامىتۋ جولىمەن جاپپاي كاسىپكەرلىكتى ىنتالاندىرۋ كوزدەلگەن.

مينيستر «قالالاردا ءبىز بانك سەكتورى ينفراقۇرىلىمىن تارتۋدى، اۋىلدىق جەرلەردە – ميكروكرەديتتەۋ جونىندەگى ءبىرىڭعاي وپەراتور قۇرۋدى جوسپارلاپ وتىرمىز» — دەپ اتاپ ءوتتى.

ماكروەكونوميكالىق تۇراقتىلىقتى قامتاماسىز ەتۋ ماقساتىندا ينفلياسيا دەڭگەيىن تومەندەتۋ جانە باعا تۇراقتىلىعىن ودان ءارى قامتاماسىز ەتۋ بولجانىپ وتىر. ورتا مەرزىمدى پەرسپەكتيۆادا ۇلتتىق بانكتىڭ اقشا-كرەديت ساياساتى ينفلياسيانى 3–4%-عا دەيىن تومەندەتۋگە باعىتتالادى. سونداي-اق مەملەكەتتىك بورىشتىڭ وسۋىنە جول بەرمەۋ شارالارى دا قابىلداناتىن بولادى.

«2017–2019 جىلدارى مەملەكەتتىك بورىشتى قولايلى دەڭگەيدە ۇستاپ تۇرۋ ءۇشىن رەسپۋبليكالىق بيۋدجەت تاپشىلىعىن 2019 جىلعا قاراي جىو-گە قاتىستى 1،0 %-عا دەيىن كەيىننەن تومەندەتە وتىرىپ، 2017 جىلى جىو-گە قاتىستى 1،2 %-عا ازايتۋ جوسپارلانىپ وتىر» — دەپ اتاپ ايتتى بيشىمايەۆ.
ول مۇناي باعاسىنىڭ تومەن دەڭگەيدە ساقتالۋى جاعدايىندا كەلەشەك ۇرپاق ءۇشىن ۇلتتىق قوردىڭ ساقتالۋىن قامتاماسىز ەتۋ ماڭىزدى ەكەنىن اتاپ كورسەتتى.
«ۇلتتىق قوردان قوسىمشا قاراجات تارتىلمايتىن بولادى. ءبىز ەكونوميكانىڭ جەكە ينۆەستيسيالار مەن كاسىپكەرلىكتى دامىتۋعا نەگىزدەلگەن ىشكى مۇمكىندىكتەرىن پايدالانامىز» — دەدى بيشىمبايەۆ.

ول «نۇرلى جول»، يندۋستريالاندىرۋ باعدارلامالارىن، اگروونەركاسىپتىك كەشەندى، جاپپاي كاسىپكەرلىكتى دامىتۋ جونىندەگى مەملەكەت باسشىسى اتاعان جاڭا باعىتتاردى، بانكتىك سەكتوردىڭ ينۆەستيسيالىق بەلسەندىلىگىن قالپىنا كەلتىرۋدى، جەكە ينۆەستيسيالار تارتۋدى، سالىق جۇيەسىن رەفورمالاۋدى ءتيىمدى ىسكە اسىرۋ جىل سايىن ورتا مەرزىمدى پەرسپەكتيۆادا ەكونوميكانىڭ 3،5-4% دەڭگەيىندە ءوسۋىن قامتاماسىز ەتۋگە مۇمكىندىك بەرەدى» – دەپ مالىمدەدى.