قازاق تەليەۆيزياسىنا قاتىستى سىن از ايتىلىپ جۇرگەن جوق. قانشا جەردەن «ءوز قازاعىمىز عوي، جامان جەرىن جاسىرا تۇرايىق» دەسەك تە ونداعىلار قازاق قوعامىنا ءتۇرلى توسىنسىي ۇسىنۋىن قويار ەمەس. سوڭعى ۋاقىتتا ونسىز دا ارزان كۇلكى مەن شۋىلداققا تولىپ كەتكەن وتاندىق ارنالاردىڭ بىرىندە، دالىرەك ايتساق، ۇلتتىق ارنا مارتەبەسىنە يە «قازاقستاننان» بۇرىن (قازاق تەليەۆيزياسىنان) كوز كورىپ، قۇلاق ەستىمەگەن باعدارلاما كوردىك. تانىمال جۇرگىزۋشى ءلايلا سۇلتان قىزى جۇرگىزەتىن «ايەل باقىتى» جوباسى باسقا تاقىرىپ تاپپاعانداي ءتورىن ترانسۆيستيتكە (جىنىسىن اۋىستىرعان ادام) ۇسىنىپتى.
بۇل جەردە «ءتورىن ۇسىندى» دەگەندى ءسوزدىڭ ادەمىلىگى، تارتىمدى تىركەس ءۇشىن قولدانىپ وتىرعان جوقپىز. باعدارلاماعا قوناق رەتىندە قوستانايدان قالاپ الدىرعان الگى ترانسۆيستيت ءبىر ءوزى باعدارلاما جۇرگىزۋشىسى بار، ارنايى ساراپشى رەتىندە شاقىرىلعان پسيحولوگى بار، ۋرولوگ-اندرولوگى بار، ۇلاربەك نۇرعالىمداي اقىنى بار، بارلىعىنىڭ اۋزىن جاۋىپ وتىردى. ءتىپتى، قازاقستانداعى جىگىتتەردىڭ پالەنباي پايىزى ترانسۆيستيت بولعىسى كەلەدى دەگەندەي ستاتيستيكا ايتىپ، الەك قىلدى.
باعدارلاما ۇيىمداستىرۋشىلارىنىڭ الگى «قوناقتىڭ» ترانسۆيستيتتەردى پسيحولوگيالىق اۋىتقۋى بار ناۋقاسقا تەڭەگەن مامانعا شاپتىققانىنا قاراپ شاقىرۋداعى ماقساتى ورىندالدى دەي المايمىز. تەلەباعدارلامالار اراسىنداعى رەيتينگى جوعارى وتباسىلىق باعدارلاماعا قاتىسقان الگى اداسقان رەسپۋبليكالىق ەفيردەن ءوز مۇددەسىن تاراتىپ كەتتى. ءسويتىپ، «ايەل باقىتى» ارتىق قىلامىن دەپ، تىرتىق قىلدى.
ءلايلا سۇلتان قىزى، تەلەارنا باسشىلىعى قىز-كەلىنشەكتەرگە باعىتتالعان باعدارلاماعا تاقىرىپ تاپپاي قينالىپ ءجۇر دەي المايمىز. قوعامدا ايەلدەردىڭ، قىز-كەلىنشەكتەردىڭ قانشاما قيىن تاعدىرىنا كۋا بولىپ ءجۇرمىز. كۇيەۋلەرى قۇمار وينايتىن، پارا العانى ءۇشىن دۇنيەسى تاركىلەنىپ، تەمىر تورعا توعىتىلعان ايەلدەردى جۇزدەپ تابۋعا بولادى. بۇگىندە كۇيىپ تۇرعان ءدىني ەكسترەميزم، راديكالدىق اعىمداردىڭ «جاڭالىقتارى»، كونستيتۋسيا مەن ەل زاڭدارىن مويىنداۋى قيىن سالافيلەر اراسىندا كەڭ تاراپ بارا جاتقان تالاق ماسەلەسى، ءدىن نەگىزدەرىن قاتە ءتۇسىنۋدىڭ سالدارىنان قىسقا ۋاقىت ىشىندە قىرىق بايعا تيگەن كەلىنشەكتەر تاعدىرىنىڭ ءوزى ءبىراز اڭگىمەگە ارقاۋ بولماي ما؟
«ايەل باقىتىن» كورىپ وتىرىپ، وسىنداي ويعا قالدىق. باعدارلاما جيىركەنىش تۋعىزاتىن مۇنداي نەگاتيۆتى ەلەكتەن وتكىزبەي ەل نازارىنا ۇسىنعانى دۇرىس بولمادى. وسى حابارعا ارنايى شاقىرىلعان اقىن ۇلاربەك نۇرعالىم ۇلىنىڭ «جاعامدى ەمەس، كەڭىردەگىمدى ۇستادىم!» دەگەنىنەن اسىپ ەشتەڭە ايتا الماسپىز. بۇلاي كەتە بەرسە، تەلەارنالارىمىزدىڭ سۋيسيد جاساۋعا وقتالىپ، امان قالعانداردىڭ «تاجىريبەسىمەن» دە «تاڭ قالدىرۋى» عاجاپ ەمەس.
زاۋرە توڭبولات قىزى
