ەل تاۋەلسىزدىگىنىڭ 25 جىلدىعىن اتاپ ءوتۋ اياسىندا اقمولا وبلىستىق تاريحي-ولكەتانۋ مۋزەيىندە ءۇش يننوۆاسيالىق جوبانىڭ تۇساۋكەسەرى ءوتتى، - دەپ حابارلايدى Qamshy.kz anatili.kazgazeta.kz سايتىنا سىلتەمە جاساپ.
وبلىستىق مادەنيەت باسقارماسىنىڭ ۇيىمداستىرۋىمەن وتكەن شارا بارىسىندا جۇرتشىلىق الاشتىڭ ارىسى ءاليحان بوكەيحانوۆتىڭ ءومىر جانە ەڭبەك جولىمەن، قازاقتىڭ ۇلتتىق كيىمدەرىنىڭ ۇلگىسىمەن جانە تاۋەلسىز قازاقستاننىڭ اقشا بەلگىلەرىنىڭ تاريحىمەن تانىستى.
وبلىستىق مادەنيەت باسقارماسىنىڭ مالىمەتى بويىنشا، ەل تاۋەلسىزدىگىنىڭ 25 جىلدىعىنا ارنالعان مادەني شارالار 15 قىركۇيەك پەن 15 جەلتوقسان ارالىعىندا وتكىزىلمەك. تاريحي-ولكەتانۋ مۋزەيىندە وتكىزىلىپ وتىرعان يگى ءىس سول ءۇش ايلىق باعدارلامانىڭ باستاۋى بولىپ تابىلادى. شاراعا قاتىسىپ، ءسوز سويلەگەن تاريح عىلىمىنىڭ دوكتورى، قازاقستاننىڭ ەڭبەك سىڭىرگەن مادەنيەت قايراتكەرى قادىرجان ءابۋوۆ مۋزەي ۇيىمداستىرعان يننوۆاسيالىق جوبالاردىڭ ماڭىزدىلىعىن ايتا كەلە، اسىرەسە تۋعانىنا 150 جىل تولىپ وتىرعان الاش ارىسى ءاليحان بوكەيحانوۆتىڭ ءومىرى مەن ەڭبەگىن جاس ۇرپاققا ناسيحاتتايتىن العاشقى جوبانىڭ ماڭىزىنا توقتالدى.
– بيىل الاش قوزعالىسىنا 100 جىل تولادى. قازاق حالقىنىڭ تاۋەلسىز ەل بولۋىن ارمانداپ، بار ءومىرىن سوعان ارناعان ءاليحان بوكەيحانوۆ، ءمىرجاقىپ دۋلاتوۆ، ماعجان جۇمابايەۆ سياقتى ۇلتىمىزدىڭ ارداقتى ۇلدارىنىڭ اسىل ارمانى ورىندالىپ، قازاقستان تاۋەلسىز مەملەكەت بولدى. كەلەشەك ۇرپاق قازاق اۆتونومياسىن قۇرۋعا تالپىنىپ، سول جولدا ۇلكەن ەڭبەك سىڭىرگەن الاشتىڭ ارداقتىلارىن ءبىلىپ ءوسۋى قاجەت، – دەدى ق.ءابۋوۆ.
مۋزەي ۇيىمداستىرعان يننوۆاسيالىق تاعى ءبىر جوبا – قازاقتىڭ ۇلتتىق كيىمدەرىنىڭ ۇلگىسى. ءار جىلدارى مۋزەيگە ازاماتتاردىڭ تاپسىرعان وتكەن عاسىرلارداعى ۇلتتىق كيىمدەرى از ەمەس. مۋزەي قىزمەتكەرلەرى كيىپ شىققان بۇل كيىم ۇلگىلەرىنىڭ اسەمدىگى مەن تارتىمدىلىعى ءوز الدىنا. ولار قىمبات جانە تازا تابيعي ماتەريالدان تىگىلگەندىگىمەن دە ەرەكشەلەنەدى.
سونىمەن قاتار شاراعا قاتىسۋشىلار ەلىمىز تاۋەلسىزدىگىنىڭ ايشىقتى بەلگىسى ىسپەتتى العاشقى ۇلتتىق ۆاليۋتامىز – تەڭگەنىڭ شىعۋ تاريحىنان سىر شەرتەتىن مۇراعاتتارمەن دە تانىستى. 1993 جىلى قاراشا ايىندا اينالىسقا ەنگەن تۇڭعىش ۇلتتىق ۆاليۋتامىزدىڭ ديزاينىن جاساعان اۆتورلارى مەن بانكنوتتار تۋرالى مۋزەي قىزمەتكەرى جان-جاقتى اڭگىمەلەپ بەردى.
