پرەمەر-مينيستردىڭ ورىنباسارى – اۋىل شارۋاشىلىعى ءمينيسترى اسقار مىرزاحمەتوۆتىڭ توراعالىعىمەن سەلەكتورلىق رەجيمدە جامبىل وبلىسى اۋىل شارۋاشىلىعى سالاسىنىڭ اعىمداعى جاي-كۇيى مەن پروبلەمالىق ءماسەلەلەرىنە ارنالعان وتىرىس وتكىزىلدى. بۇل تۋرالى اۋىل شارۋاشىلىعى مينيسترلىگىنىڭ باسپا ءسوز قىزمەتى حابارلادى.
جيىنعا اۋىل شارۋاشىلىعىنىڭ ۆيسە-مينيسترلەرى مەن ۆەدومستۆالىق كوميتەتتەر جانە دەپارتامەنتتەر باسشىلارى، جامبىل وبلىسى اكىمىنىڭ ورىنباسارى مەن وبلىستىق اۋىل شارۋاشىلىعى قۇرىلىمدارىنىڭ قىزمەتكەرلەرى جانە دە «قازاگرو» ۇلتتىق باسقارۋشى حولدينگى» اق ەنشىلەس ۇيىمدارىنىڭ وكىلدەرى قاتىستى.
«ەلىمىزدىڭ بارلىق وڭىرلەرىنەن كۇن تارتىبىندە تۇرعان اگروونەركاسىپتىك كەشەننىڭ وزەكتى پروبلەمالىق ماسەلەلەرىن جيناقتادىق. وسى ماتەريالداردىڭ نەگىزىندە ارنايى كەستە ءتۇزىلىپ، بۇگىننەن باستاپ ءار ايماقتىڭ تۇيتكىلدەرىن جەكە دارا بەينەكونفەرەنسيالىق بايلانىس ارقىلى قاراۋدى باستايمىز. بۇل شارالاردىڭ باستى ماقساتى – ماسەلەلەردى كوتەرىپ قانا قويماي، ناقتى شەشىمدەر قابىلداۋ جانە اۋىل شارۋاشىلىعى مينيسترلىگى مەن ايماقتىق اتقارۋشى ورگاندار اراسىندا ءتيىمدى قارىم-قاتىناس جۇيەسىن قالىپتاستىرۋ بولىپ تابىلادى»، – دەپ اتاپ ءوتتى ا.مىرزاحمەتوۆ.
جاڭا فورماتتاعى بۇل ءۇردىس جامبىل وبلىسىنىڭ ماسەلەلەرىن تالقىلاۋدان باستالدى.
بەينەبايلانىس بارىسىندا جامبىلدىقتار تاراپىنان ءبىرىنشى كەزەكتەگى ماسەلە رەتىندە مال شارۋاشىلىعى سالاسىنا سۋبسيديانىڭ جەتىسپەۋشىلىگى، تيىمدىلىگى ايتىلدى. ولاردىڭ حابارلاۋىنشا، اعىمداعى جىلى جامبىل وبلىسىنىڭ مال شارۋاشىلىعىن سۋبسيديالاۋ باعدارلاماسىنا قوسىمشا 2،1 ملرد. تەڭگە، ال اوك سۋبەكتىلەرىنە ينسۆەستيسيالىق سۋبسيديالاۋ ءۇشىن 2،8 ملرد. تەڭگە قاجەت.
بۇعان جاۋاپ رەتىندە، اۋىل شارۋاشىلىعى مينيسترلىگىنىڭ وكىلدەرى ەكونوميكالىق ءوسىم مەن 2016 جىلعى جۇمىسپەن قامتۋ اۋقىمىن ۇلعايتۋ اياسىندا مينيسترلىكتىڭ وبلىس اكىمدىكتەرىمەن بىرلەسىپ مال شارۋاشىلىعىن دامىتۋدى سۋبسيديالاۋ ءۇشىن قوسىمشا 30،2 ملرد. تەڭگە سوماسىندا قارجى ءبولۋ بويىنشا بيۋدجەتتىك سۇرانىم ازىرلەگەنىن اتاپ ءوتتى. ونىڭ ىشىندە جامبىل وڭىرىنە 5،7 ملرد. تەڭگە ءبولۋ قاراستىرىلعانى جانە دە سۇرانىمنىڭ ۇلتتىق ەكونوميكا، قارجى مينيسترلىكتەرى تاراپىنان قولداۋ تاۋىپ وتىرعاندىعى ايتىلدى.
سونداي-اق، جامبىل وبلىسى شارۋالارىن مازالاپ وتىرعان تاعى ءبىر تۇيتكىل – ليزينگكە تەحنيكا بەرۋ ەرەجەسىن ەلەپ-ەكشەۋ ماسەلەسى قىزۋ تالقىلاندى. ءوڭىر وكىلدەرىنىڭ پىكىرىنە سۇيەنسەك، ءار ءوڭىردىڭ وزىندىك ەرەكشەلىكتەرىنە سايكەس ليزينگتىك تالاپتاردى قازاقستان بويىنشا ءبىرىڭعاي قولدانۋعا كەلمەيدى. ماسەلەن، ءبىر تەحنيكاعا بايلانىستى جەردىڭ كولەمى وڭتۇستىكتە سولتۇستىككە قاراعاندا الدەقايدا تومەن. سوندىقتان دا وسىنى ەسكەرۋ كەرەك. گەوگرافيالىق ەرەكشەلىكتەرگە قاراي مۇندا كولەم مەن كورسەتكىشتەرگە بايلانىستى ءبىرقاتار قيىندىقتار بار.
ءوز كەزەگىندە سىندارلى ۇسىنىستاردى قابىلداۋعا ءازىر ەكەندىگىن اتاپ وتكەن اۋىل شارۋاشىلىعى ءمينيسترى، ءوز قىزمەتكەرلەرىنە ليزينگتىك تالاپتاردى ءار ءوڭىردىڭ ەرەكشەلىگىنە قاراي قايتا قاراستىرۋعا تاپسىرما بەردى.
تاعى ءبىر تالقىلانعان وزەكتى ماسەلە – مالعا ارنالعان نومىرلەنگەن قۇلاق بەلگىلەرىنىڭ جەتكىزىلۋى بولدى. 2015-2016 جىلداردىڭ ءوتىنىمى بويىنشا سۇرالعان سىرعالار باعىتتالعان جەرىنە ۋاقىتىلى جەتكىزىلمەگەن.
بۇل ورايدا ا.مىرزاحمەتوۆ جاۋاپتى قۇرىلىمدارعا اتالعان ولقىلىقتىڭ الداعى ۋاقىتتا قايتالانباۋىن قاتاڭ ەسكەرتىپ، مۇنداي بەلگىلەردىڭ قورى جاسالۋىن جانە دە ءار جىلدىڭ 1 ناۋرىزىنا دەيىن سىرعالاردىڭ ءتيىستى ورىندارعا جەتكىزۋ مىندەتىن قولدانىستاعى ەرەجەگە ەنگىزۋدى تاپسىردى.
سونداي-اق وتىرىستا جامبىل وبلىسىنىڭ اۋىل شارۋاشىلىعىنا بايلانىستى باسقا دا ءبىرقاتار ماسەلەلەر قارالدى.
جيىن سوڭىندا جامبىل وبلىسى اكىمىنىڭ ورىنباسارى ابدالى نۇرالييەۆ بارلىق قۇزىرلى تاراپتاردىڭ ءبىر ۇستەلدە باس قوسىپ، ورتاق ماسەلەلەردى تالقىلاۋعا مۇمكىندىك بەرەتىن مۇنداي ءتيىمدىلىگى جوعارى جاڭا فورماتتاعى بەينەبايلانىستىڭ وتە قاجەت ەكەندىگىن باسا ايتىپ، العىس ءبىلدىردى.
بوتاگوز ابدىرەي قىزى، ەكونوميكا گازەتى
