«قازاق گازەتتەرى» مەن «جاس وركەن» جاۋاپكەرشىلىگى شەكتەۋلى سەرىكتەستىكتەرىنىڭ ۇجىمدارى جاڭادان كوشىپ بارعان عيماراتىندا تۇساۋكەسەر ءراسىمىن وتكىزدى. سالتاناتتى جيىنعا قازاق ءباسپاسوزىنىڭ ارداگەرلەرى، سەرىكتەستىككە قاراستى باسىلىمدارىڭ ەڭبەك ۇجىمدارى قاتىستى.
العاشقى قۇتتىقتاۋ ءسوز «قازاق گازەتتەرى» ءجشس-نىڭ باس ديرەكتورى – رەداكتورلار كەڭەسىنىڭ ءتوراعاسى جۇمابەك كەنجالينگە بەرىلدى. ج.كەنجالين ارىپتەستەرىن وسىناۋ ايتۋلى كۇنمەن قۇتتىقتاي وتىرىپ، ۇجىمنىڭ «قازاقستان» تەلەراديوكورپوراسياسىنىڭ عيماراتىنا قونىس اۋدارۋى اقپارات جانە كوممۋنيكاسيالار مينيسترلىگىنىڭ تىكەلەي قولداۋىنىڭ ارقاسىندا جۇزەگە اسقانىن جەتكىزدى. وسى ورايدا قازاقستان رەسپۋبليكاسى اقپارات جانە كوممۋنيكاسيالار ءمينيسترى داۋرەن ابايەۆتىڭ جولداعان قۇتتىقتاۋ حاتىن وقىپ بەردى.
بۇدان ءبىراز بۇرىن جاڭا قىزمەتكە تاعايىندالىسىمەن مينيستر ءوز ۆەدومستۆوسىنا قاراستى مەكەمەلەر مەن ۇيىمداردا بولىپ، وندا شەشۋىن كۇتكەن ماسەلەلەردى كوتەرىپ، ۇجىم مۇشەلەرىمەن القالى كەڭەس قۇرعان بولاتىن. سونداي ءبىر كەڭەستىڭ ءساتى «قازاق گازەتتەرى» جانە «جاس وركەن» سەرىكتەستىكتەرىندە دە ءوتىپ ەدى. ساليقالى اڭگىمەدە مينيستر ۇجىمدار وتىرعان عيماراتتى ارالاپ كورىپ، ءونىمدى جۇمىس ىستەۋ ءۇشىن شىعارماشىلىق ۇجىمدارعا ءتيىستى جاعداي جاسالۋ قاجەتتىگىنە نازار اۋداردى. ءسويتىپ، جۋرناليستەردىڭ بولاشاقتا جاڭا قونىستا بولاتىندىعىنا، مۇنىڭ ءوزى ءونىمدى ەڭبەكتىڭ ءبىر كەپىلى ەكەندىگىنە توقتالدى. مينيستر ايتقان سوزىندە تۇردى. مىنە، سونىڭ ناتيجەسىندە ەكى ۇجىم الماتىداعى جەلتوقسان كوشەسىنىڭ بويىندا ورنالاسقان راديو ءۇيىنىڭ كەڭسە بولمەلەرىنە قونىستاندى. ءتيىستى اكتەۋ-جوندەۋ جۇمىستارىنان سوڭ ۋاقىت وزدىرماي، جاڭا مەكەنگە جايعاسقان جۋرناليستەر ەجەلگى ءداستۇر بويىنشا مۇندا تۇساۋكەسەر وتكىزۋدى دە ۇمىتپادى.
ءمينيستردىڭ قۇتتىقتاۋ حاتىندا «قازاق گازەتتەرى» جشس-نە قاراستى «انا ءتىلى»، «ەكونوميكا»، «اقيقات»، «مىسل»، «ۋيعۋر اۆازي»، «ۇركەر» باسىلىمدارىنىڭ ەل رۋحانياتىنداعى الاتىن ورنى، ەلباسىنىڭ سىندارلى ساياساتىن جۇزەگە اسىرۋعا، ەلىمىزدىڭ رۋحاني-مادەني بولمىسىن قالىپتاستىرۋعا قوسىپ جاتقان ۇلەستەرى، سونىمەن قاتار حالقىمىزدىڭ بىرلىگىن نىعايتۋ، تاۋەلسىزدىگىمىزدىڭ تۇعىرىن بەكىتۋ جولىنداعى ەسەلى ەڭبەكتەرى ايرىقشا اتاپ وتىلگەن.
حاتتىڭ سوڭى: «ەل دامۋىنا ولشەۋسىز ۇلەس قوسىپ كەلە جاتقان ۇلتتىق باسپاسوزگە قولداۋ كورسەتۋ – اقپارات جانە كوممۋنيكاسيالار مينيسترلىگى ءۇشىن كوكەيكەستى ماسەلە. سىزدەر قىزمەت ەتەتىن باسىلىمداردىڭ مينيسترلىكتىڭ تىكەلەي ىقپال ەتۋىمەن جاڭا عيماراتقا ورنالاسۋى سونىڭ ءبىر مىسالى. وسى جاڭالىق شىعارماشىلىق ۇجىمنىڭ تىڭ ىزدەنىستەرىنە باستاۋ بولارىنا سەنىمىم مول. قونىستارىڭىز قۇتتى بولسىن! ەلگە قىزمەت ەتۋ جولىندا ۇلكەن جەتىستىكتەرگە جەتە بەرۋلەرىڭىزگە شىنايى تىلەكتەستىگىمدى بىلدىرەمىن!» دەگەن ىزگى لەبىزگە تولى سوزدەرمەن اياقتالعان.
سونىمەن قاتار جۇمابەك ومار ۇلى قازاقستان رەسپۋبليكاسى پرەزيدەنتى باسپا ءسوز حاتشىسىنىڭ ورىنباسارى، ق ر ۇعا كوررەسپوندەنت-مۇشەسى، فيلولوگيا عىلىمىنىڭ دوكتورى، پروفەسسور باۋىرجان وماروۆتىڭ اتىنان كەلگەن قۇتتىقتاۋ حاتتى دا وقىپ بەردى.
سالتاناتتى جيىندا «جاس وركەن» جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى جۇسىپبەك قورعاسبەك، قازاق ءباسپاسوزىنىڭ ارداگەرلەرى سارباس اقتايەۆ، ورازاقىن اسقار، «قازاقستان» تەلەراديوكورپوراسياسىنىڭ الماتى قالاسىنداعى فيليالى ديرەكتورىنىڭ ورىنباسارى قالامقاس حاسەنوۆا ءسوز سويلەدى. تۇساۋكەسەر شاراسىندا «بالدىرعان» جۋرنالىنىڭ قىزمەتكەرى قۇل-كەرىم ەلەمەس، جاس ونەرپاز، اقىن امانگەلدى سەيىتحان دومبىرامەن ءان سالدى.
جاڭا قونىستىڭ تۇساۋكەسەر لەنتاسىن وتاندىق جۋرناليستكانىڭ مايتالماندارى – س.اقتايەۆ، و.اسقار، يۋ.ازاماتوۆ، س.قالي ۇلى قيدى. سوڭىنان شاشۋ شاشىلىپ، فۋرشەت ۇيىمداستىرىلدى.
ءداۋىرجان تولەبايەۆ
