يشيم (ق ر اۋماعىندا زاڭمەن تىيىم سالىنعان ۇيىم – رەد.) لاڭكەستەرىنىڭ تۇتقىنعا تۇسكەن قىز-كەلىنشەكتەردى ساۋد ارابياسىنداعى جاسىرىن اۋكسيونداردا ساۋدالاپ كەلگەنى بەلگىلى بولىپ وتىر. بۇل جايىندا يراك اسكەريلەرى دالەل كەلتىرىپ وتىر، - دەپ حابارلايدى Qamshy.kz muslim.kz – كە سىلتەمە جاساپ. 

يراك اسكەريلەرى اش-شيركات قالاسىن ازات ەتۋ بارىسىندا قازا تاپقان سودىرلاردىڭ ءبىرىنىڭ قالتا تەلەفونىنان «قىزدار ساۋداسىنىڭ» سۋرەتتەرىن تاۋىپ العان. سۋرەتتەگى ساتىپ الۋشىلاردىڭ ساۋديالىق ءداستۇرلى كيىمدە ەكەنى انىق اڭعارىلادى. بۇل جايىندا India Times باسپاسىنا سىلتەمە جاساي وتىرىپ، IslamNews سايتى حابار تاراتىپ وتىر.

«سۋرەتتەر ساۋد ارابياسىنداعى جاسىرىن اۋكسيوندا تۇسىرىلگەن. سونداي-اق، تەلەفون يەسىنىڭ قوناق ءۇي ىشىندە تۇتقىن ايەلدەرمەن بولعان ادەپسىز ارەكەتتەرىنىڭ دە سۋرەتتەرى دە بار. سۋرەتتەردىڭ تۇسىرىلىگەن ۋاقىتتارىنا سايكەس ونىڭ ۇزاق ۋاقىت بويى يشيم قۇرامىندا بولعانىن ايتۋعا بولادى»، – دەيدى يراكتىق اسكەري زەرتتەۋشى.

سەكس-قۇلدىققا تۇسكەن قىز-كەلىنشەكتەردى تەك ساۋديالىقتار عانا ەمەس، باتىس مەملەكەتتەرى مەن باسقا دا ەلدەردىڭ ازاماتتارى ساتىپ الاتىنى جايلى دەرەكتەر بار. جاقىندا عانا سەكس-قۇلدىقتان ازات ەتىلگەن 18-جاستاعى بويجەتكەن ءوزىن ساتىپ العان «قوجايىنى» مەن راديكال اراسىنداعى ديالوگتى قۇلاعى شالىپ قالعانىن ايتادى. الگى لاڭكەستىڭ ايتۋىنشا، «تەك سيريالىقتار مەن تۇرىكتەرگە جانە تاياۋ شىعىس مەملەكەتتەرىنىڭ ازاماتتارىنا عانا ءۇش ايەلدەن ارتىق ساتىلاتىن كورىنەدى».