پاۆلودارعا جۇمىس ساپارى بارىسىندا ەلباسى جاڭادان سالىنعان پاۆلودار-اقسۋ كوپىرىمەن تانىسىپ، وعان ات قويدى، - دەپ حابارلايدى Qamshy.kz pavon.kz– كە سىلتەمە جاساپ.

اقسۋ وزەنىنىڭ ۇستىنە سالىنىپ جاتقان ورتالىق ازياداعى ەڭ ءىرى كوپىردى پرەزيدەنت پاۆلودار قالاسىنىڭ قۇرمەتتى ازاماتى امانجول اۋباكىروۆتىڭ «قازاقستان تاۋەلسىزدىگىنىڭ 25 جىلدىعى» دەپ اتاۋ تۋرالى ۇسىنىسىن قولداپ، بەكىتىپ بەرىپتى.

«ەگەر وڭىردە جاقسى جولدار بولسا، قالالارمەن، ەلدەرمەن بايلانىس بولادى، ەكونوميكا داميدى»، - دەپتى ەلباسى كوپىر باسىندا.

ءقازىر الىپ كوپىردىڭ قۇرىلىسى ءبىتىپ، سىرلاۋ جۇمىستارى اياقتالۋعا جاقىن قالعان. جىل سوڭىنا دەيىن كوپىر پايدالانۋعا بەرىلەدى دەپ جوسپارلانۋدا.

وسى ورايدا، پاۆلودار قالاسىنىڭ اتىن اۋىستىرۋ تۋرالى ماسەلە بىرنەشە جىلدان بەرى كوتەرىلىپ كەلە جاتقانىن ايتا كەتۋ كەرەك. جەرگىلىكتى تۇرعىندار تاراپىنان ەشقانداي نارازىلىق بولماسا دا، بيلىك كەرەكۋگە قازاقى ات بەرۋگە اسىعار ەمەس. ءتىپتى، ءبىر جىلدارى بەلسەندىلەردىڭ «پاۆلوداردى نۇرشاھار دەپ اتايىق» دەگەن ۇسىنىسىنا دا يلىكپەدى.

ەل تاۋەلسىزدىگىنىڭ 25 جىلدىعىمەن قاتار، ۇلت-ازاتتىق كوتەرىلىستىڭ 100 جىلدىعى، يساتاي-ماحامبەت باستاعان كوتەرىلىستىڭ 180 جىلدىعى، الاش ارىسى ءاليحان بوكەيحاننىڭ 150 جىلدىعى، ۇلت ۇستازى ىبىراي التىنساريننىڭ 175 جىلدىعى، تاعى باسقا اتاۋلى داتالاردى پايدالانىپ، ءبىرقاتار ەلدى-مەكەندەردىڭ ورىسشا اتاۋلارىن وزگەرتىپ الساق ارتىق بولماس ەدى.