ءترانسۆيستيتتى ۇلتتىق ارنا ەفيرىنە شاقىرىپ باسى داۋعا قالعان ءلايلا سۇلتان قىزى وزىنە قاراتا ايتىلعان سىني پىكىرلەرگە جاۋاپ بەرىپ، كورەرمەندەرىنەن كومەك سۇرادى، - دەپ حابارلايدى Qamshy.kz  NUR.KZ-كە سىلتەمە جاساپ.

از ۋاقىت بۇرىن "قازاقستان" ارناسىنىڭ "ايەل باقىتى" باعدارلاماسىنىڭ كەزەكتى سانىندا جىنىس اۋىستىرۋ ماسەلەسىن ءسوز ەتىلگەن بولاتىن. قوناق رەتىندە باعدارلاماعا ترانسسەكسۋال شاقىرىلىپ، ول ءوزىنىڭ وقيعاسىن بايانداپ بەرگەن.

باعدارلامانىڭ بۇل سانىن كورگەن كورەرمەن الەۋمەتتىك جەلىدە، ب ا ق بەتتەرىندە جوبا اۆتورلارىنا، تەلەارنا باسشىلىعىنا قاراتا سىني پىكىرلەردى بوراتتى. ءتىپتى، ءلايلا سۇلتانقىزىنا قاتىستى كوپتەگەن جاعىمسىز پىكىرلەر ايتقان، ءجۋرناليستى جۇمىستان قۋۋدى تالاپ ەتكەندەر دە بولدى. ولاردىڭ ايتۋىنشا، بۇل باعدارلامانى جاساۋ ارقىلى "ءلايلا سۇلتان قىزى ۇلتتىق ارنانىڭ قاسىقتاپ جيعان ابىرويىن شەلەكتەپ توككەن".

ا. سولداتباي ەسىمدى جۋرناليست "قازاقستان" اق باسقارما ءتوراعاسى نۇرجان جالاۋقىزىنان ارنا "ابىرويىن توككەن" ءلايلا سۇلتانقىزىن جۇمىستان شىعارۋدى تالاپ ەتىپ، حات جازعان بولاتىن.

بۇل حاتپەن تانىسقان ءلايلا سۇلتان قىزى جەلىدە جاۋاپ جازىپ، كورەرمەندەرىنەن اقىل سۇرادى.

"مىنا ءبىر شىققان ماقالا اۆتورىنا نە قوسار ەدىڭىز؟ اردابەك سولداتباي ەسىمدى ءتىلشى ءوز ويىن وسىلاي بىلدىرگەن ەكەن. وسى كەزگە دەيىن ءۇشبۋدا قوعامدا بولىپ جاتقان نە ءبىر حاتتاردى وقىعان ەدىك. ەندى سول كەي حات يەلەرىن ەفيرگە شاقىرىپ، جۇرتقا كورسەتە باستاعان ەدىك... وتكەن ەفير سانى جىنىسىن اۋىستىرعان ترانسۆەستيتتى كورسەتكەن. سايتتاردا وسىنداي ماقالالار قاپتاپ كەتىپتى. الدە ءبىز ايتپاي، كورسەتپەي، كوزدى جۇمىپ قويىپ جۇرە بەرۋىمىز كەرەك پە ەدى؟ سونىمەن، ۇلتتىق ارنا ءلايلا سۇلتانقىزىن جۇمىستان شىعارسىن با؟ ءسىز نە ويلايسىز، قۇرمەتتى وقىرمان؟!"، - دەپ سۇرايدى ءلايلى سۇلتان قىزى وقىرماندارىنان.

ءلايلا سۇلتانقىزىنا وقىرماندارى ءتۇرلى پىكىرلەرىن جاۋدىردى. جەلى قولدانۋشىلار اراسىندا ونى جاقتاعاندار دا، داتتاعاندار دا تابىلدى.

"قازىرگى قوعامنىڭ وزەكتى پروبلەماسى عوي بۇل. وندا تۇرعان نە بار؟ سول ءۇشىن جۇمىستان شىعارۋ كەرەك پە؟ تاڭ قالىپ وتىرمىن، جۇمىستان شىعارۋ كەرەك دەگەنگە"، "باستىقتاردى ماقتاپ ءتىزىپ وتىرعىزىپ قويىپ، جينالىس جاساي بەرگەنشە ەلدىڭ اراسىنداعى كەم كەتىكتي ايتقاندا نە تۇر"، "قوعامنىڭ اۋرۋى بۇل، ال اۋرۋىن جاسىرعان ولەدى"، - دەپ جازدى قولدانۋشىلاردىڭ دەنى.

ترانسسەكسۋال جىگىتتى ەكرانعا شىعارعانى ءۇشىن ءلايلا حانىمعا سىن ايتىپ، ءجۋرناليستىڭ "ءسوزىنىڭ جانى بار" ەكەنىن ايتقاندار دا تابىلدى.