بۇگىن استانا قالاسىندا تۇراتىن كادىم قىزى ورىنباسار ءۇشىن اق تۇيەنىڭ قارنى جارىلعان كۇن بولدى، - دەپ حابارلايدى Qamshy.kz Muslim.kz-كە سىلتەمە جاساپ.
قالا شەتىندەگى جالداپ تۇرىپ جاتقان قۋىقتاي بولمەسىنە قمدب-نىڭ ءتوراعاسى، باس ءمۇفتي ەرجان قاجى مالعاجى ۇلى كەلەدى دەپ كەيۋانا مۇلدەم ويلاماسا كەرەك. ارا-تۇرا حال-جاعدايىن سۇراپ، كومەكتەسىپ كەتىپ تۇراتىن «ازىرەت سۇلتان» مەشىتىنىڭ قىزمەتكەرلەرىمەن بىرگە جاڭبىرلى كۇنى ۇيىنە كىرىپ كەلگەن ءدىنباسىن كورگەنىندە، تىپتەن، ابدىراپ قالدى. كوزىندە جالت ەتە قالعان قۋانىش ۇشقىنىمەن بىرگە، تاڭدانىس تابى دا جوق ەمەس.
الايدا، قۋانىشتىڭ كوكەسى ءالى الدا ەدى. قارت اجەيگە قۇرمەتىن كورسەتىپ، قوناق بولىپ كەلىپ قالعان باس ءمۇفتيدىڭ قارياعا ارناعان توسىنسىيى تاعى بار ەكەن. الدىمىزدا كەلە جاتقان 1-قازان «قارتتار كۇنىنە» وراي كادىم قىزى ورىنباسار اپامىزدى مەرەكەمەن قۇتتىقتاپ وتكەن باس ءمۇفتي «قاجىلىق سەرتيفيكاتىن» تابىستاعان ساتتە اپامىز شىداماستان ەكى كوزىنە ەرىك بەردى.
وسىدان بىرنەشە اي بۇرىن وتاندىق تەلەارنالاردىڭ بىرىندە باعدارلاما قوناعى بولعان اپامىز ءوزىنىڭ اسىل ارمانى – قاجىلىق ساپارى جايلى ايتىپ، تۇرمىس تاۋقىمەتى تۇرالاتقان مىنا زاماندا سول ارمانىم ورىندالماي كەتەتىن شىعار دەپ كۇرسىنگەن ەدى. ويلاماعان جەردەن ولجالى بولىپ، كوڭىلى شارىقتاعان قارت اجەي كەلگەن قوناقتارعا اق تىلەگىن جاۋدىرىپ، كوڭىلىن بوساتتى.
بۇدان بولەك، ورىنباسار اجەيگە «ازىرەت سۇلتان» مەشىتى اتىنان 100 000 تەڭگە كولەمىندە قارجىلاي كومەك پەن ازىق-تۇلىك قورى تارتۋ ەتىلدى.
