جاڭا قونىسقا كىرگەنىمىزدە اعايىن-تۋىستار مەن كورشى-قولاڭدى شاقىرىپ، داستارقان جايۋ قازاقي ءداستۇرىمىز. بۇل شاريعات بويىنشا شاقىرىلعاندا بارۋ مۇستاحاب بولىپ تابىلاتىن بەس توي-تومالاقتىڭ قاتارىنا جاتادى. شاريعاتتا بۇل قوناق اسىن ۋاكيرا دەپ اتايدى. ۋاكيرا – ءۇي قۇرىلىسى بىتۋىنە وراي جايىلعان داستارقان. سونىمەن بىرگە، تومەندەگىدەي امالداردى جاساعان ءجون:

1. شاڭىراققا كىرگەندە دۇعا وقۋ. حاديستە ريۋايات ەتىلگەن دۇعا مىناداي: «ءاۋزۋ بيكاليماتيل ءلاھي ءات-تامما مين ءشارري ءما ءحولاق» (ماعىناسى: اللا جاراتقان بارلىق ماقۇلىقتاردىڭ زيانكەسىنەن اللا تاعالانىڭ بارشا سوزدەرىمەن پانا سۇرايمىن). ءحاۋلا حاكيم قىزى (ر.ا.) ريۋايات ەتكەن حاديستە: «كىمدە-كىم ءبىر ۇيگە كىرەتىن بولسا، «ءاۋزۋ بيكاليماتيل ءلاھي ءات-تامما مين ءشارري ءما ءحولاق» دەپ ايتسىن. مىنە، سوندا ول جەردەن كوشىپ كەتكەنشە ەشبىر زياندىق كورمەيدى[1]»، – دەپ ايتىلعان.

2. باقارا سۇرەسىن وقۋ. ءابۋ ھۋرايرا (ر.ا.) ريۋايات ەتكەن حاديستە: «ۇيلەرىڭدى بەيىت سياقتى ەتىپ جىبەرمەڭدەر. شىندىعىندا، باقارا سۇرەسى وقىلعان شاڭىراقتان شايتان قاشادى[2]»، – دەپ ايتىلعان.

3. تاڭەرتەڭگىلىك جانە كەشكى دۇعالاردى وقىپ ءجۇرۋ؛

4. امانشىلىق بولسىن ءارى ءتۇرلى زيانكەستەن ساقتاسىن دەگەن نيەتپەن ساداقا بەرۋ جانە نىعمەتتەر ءۇشىن جاراتقانعا شۇكىرشىلىك ەتۋ.

دەرەككوز: muslim.kz