رۋدنىيدا قىلمىسكەرلەر كۇزەتشىگە جانە ونىڭ ۆاگونداعى دوسىنا شابۋىل جاساپ، ۇرىپ-سوعىپ، ۇستىلەرىنە جانارماي قۇيىپ، ورتەپ جىبەرگەن. بۇل تۋرالى وبلىستىق سوتتىڭ باسپا ءسوز قىزمەتىنە سىلتەمە جاساپ قوستاناي تاڭى باسىلىمى مالىمدەدى،- دەپ حابارلايدى Qamshy.kz .

"ايىپتاۋ بولجامىنا سايكەس، بەس جاس جىگىت رۋدنىيداعى كافەلەردىڭ بىرىندە اراق ءىشىپ العان. ولاردىڭ ءبىرى "سسكوب" اق كارەرىندە قارا جانە ءتۇستى مەتالل جيناۋشى بولىپ جۇمىس ىستەگەن. جىگىتتەردىڭ ءبىرى قاسىنداعىلارعا مەتالل ۇرلاۋعا ۇسىنىس جاسايدى. بوتەلكەلەستەرى كەلىسە كەتىپ، تاكسي شاقىرىپ، ءدارىحاناعا بارادى.

ودان مەديسينالىق ماسكا مەن سكوچ ساتىپ الىپ، ءارى قاراي باۋ-باقشالىق شارۋاشىلىققا بەت الادى. سول جەردە ورنالاسقان ارنايى ۆاگوندا كۇزەتشى دوسىمەن بىرگە الاڭسىز وتىرعان. قاسكۇنەمدەر ىشكە كىرىپ، ولاردان قويما كىلتىن تالاپ ەتىپ، سوققىعا جىعادى. الايدا كۇزەتشىدە كىلت بولماعان. سول كەزدە قىلمىسكەرلەر قۇرباندارىن دالاعا الىپ شىعىپ، قول-اياقتارىن سكوچپەن ماتاپ، ۇستىلەرىنە جانارماي قۇيىپ، ورتەپ جىبەرگەن.

كەيىن ءورتتى ءسوندىرىپ، ايىپكەرلەر جالپى قۇنى 96 مىڭ بولاتىن 80 كەلى مەتالل سىنىقتارىن ۇرلايدى. ال جابىرلەنۋشىلەردى ەس-جادى بار كۇيىندە بريگادا جۇمىسشىلارى تاۋىپ الىپ، رۋدنىي قالالىق اۋرۋحاناسىنا جەتكىزدى. الايدا ولار كوماعا ەنىپ، ەستەرىن جيماعان قالپىندا جان تاپسىردى"، - دەلىنگەن حابارلامادا.

مارقۇمدار ءولىم الدىندا پوليسەيلەرگە قىلمىسكەرلەر تۋرالى ايتىپ ۇلگەرگەن. ءتارتىپ ساقشىلارى جەدەل ىسكە كىرىسىپ، كۇدىكتىلەردى قولعا ءتۇسىردى.