جاڭاوزەندەگى مۇنايشىلاردىڭ ەرەۋىلىنە ۇكىمەت ارالاستى. بۇگىن «بۇرعىلاۋ» دەپ اتالاتىن جەكە مەنشىك كومپانيانىڭ جۇزدەگەن جۇمىسشىسىنىڭ شۋىنا قاتىستى دەنساۋلىق ساقتاۋ جانە الەۋمەتتىك دامۋ ءمينيسترى مالىمدەمە جاسادى، - دەپ حابارلايدى Qamshy.kz كتك ارناسىنا سىلتەمە جاساپ.

تامارا دۇيسەنوۆانىڭ ايتۋىنشا، 6 كۇن بويى قارسىلىق ءبىلدىرىپ جاتقانداردىڭ تالابىن ورىنداۋ قيىن. دەگەنمەن، ءقازىر مۇنايشىلارمەن كەلىسىمگە كەلۋ ماسەلەسى قارالىپ جاتىر ەكەن.

تامارا دۇيسەنوۆا، ق ر دەنساۋلىق ساقتاۋ جانە الەۋمەتتىك دامۋ ءمينيسترى:

-جۇمىس ورنىنداعى ازاماتتار «قازمۇنايگازداعى» سياقتى بىردەي ەڭبەكاقى تولەۋ جۇيەسىنە ءوتۋ ماسەلەسىن كوتەرىپ وتىر. ەڭبەك زاڭىنا سايكەس، بۇل «قازمۇنايگازدىڭ» مەكەمەلەرىنە عانا ءتيىستى. ەگەر دە باسقا مەكەمەلەردە وسىنداي ءبىرىڭعاي جۇيەدەگى ەڭبەكاقىعا ءوتۋى ءۇشىن ولاردا سالالىق كەلىسىم شارتتا بەلگىلەنۋى كەرەك. ەگەر سالالىق كەلىسىم شارتتا بۇل قارالاتىن بولسا، بۇل مەكەمەلەردىڭ بارىنە وسىنداي جاڭا جۇيەنى ەنگىزۋگە بولادى.

ياعني، جۇمىسشىلاردىڭ تالابىن ورىنداۋ وڭايعا سوقپايدى. ول ءۇشىن ەڭبەك كودەكسىنە وزگەرتۋلەر ەنگىزۋ قاجەت دەيدى مينيستر. سول ءۇشىن ماڭعىستاۋ وبلىسىنىڭ اكىمى اليك ايداربايەۆ مۇنايشىلارمەن تاتۋلاسۋدىڭ باسقا جولدارىن ىزدەۋگە كىرىسكەن. ايماق باسشىسى بۇگىن جاڭاوزەنگە كەلىپ ەرەۋىلشىلەردىڭ بەلسەندىلەرى مەن كومپانيا جەتەكشىلەرىنىڭ باسىن قوسىپ، جيىن وتكىزىپ جاتىر. ءبىراق قانداي كەلىسىم جاسالعانى ازىرگە بەلگىسىز. ويتكەنى، جيىن جابىق وتۋدە. ال، باسشىلىقتان اقشالارىن كوتەرۋدى تالاپ ەتىپ، جۇمىسقا شىعۋدى قويعان مۇنايشىلار كەڭسەلەرىنىڭ الدىنان كەتەر ەمەس. جۇمىسشىلاردىڭ تالابى بۇرىنعىداي، ۇلتتىق كومپانيالارداعىداي جالاقى تولەۋدىڭ ءبىرىڭعاي جۇيەسىن ەنگىزۋ.