قاراعاندىنىڭ مايقۇدىق اۋدانىندا ءبىراز ۋاقىتتان بەرى جۇمىس ىستەپ تۇرعان «وپتوۆكا» قارجى كومپانياسى جابىلىپ قالدى. بۇل جايىندا Baq.kz رەداكسياسىنا الدانىپ قالعانىندارىنا شاعىمدانعان قاراعاندىلىق تۇرعىندار حابارلاسقان،- دەپ حابارلايدى Qamshy.kz.

دەگەنمەن، بۇل قارجى پيراميداسىنىڭ دا عۇمىرى ۇزاققا بارمادى. «وپتوۆكا» قارجى كومپانياسىنىڭ جابىلىپ قالعانى جايلى وسى جۇيەگە اقشا سالىپ، سان سوعىپ قالعان قاراعاندىلىق تۇرعىن ايتىپ بەردى.

«وپتوۆكانىڭ» جابىلعاندىعى تۋرالى حابار حالىق اراسىندا تاڭەرتەڭ تارادى. سالعان اقشامدى ۋايىمداپ، جۇمىستان سۇرانىپ، وسىندا كەلگەن ەدىم. مەن سياقتى ادامدار مۇندا كوپ ەكەن. تۇستەن كەيىن قۇقىق قورعاۋ ورگاندارىنىڭ قىزمەتكەرلەرى كەلىپ، قارجى كومپانياسىنىڭ بارلىق قۇجاتتارىن، كومپيۋتەرلەرىن تاركىلەپ، باسشىسىن وزدەرىمەن بىرگە الىپ كەتتى. ءارى قاراي نە بولاتىنىن بىلمەيمىز»، - دەدى رەداكسيامىزعا حابارلاسقان جارقىن ەسىمدى ازامات.

«وپتوۆكانىڭ» الدىنداعى قارا قۇرىم حالىق كەش باتسا دا تارقار ەمەس. ولار سوتقا جۇگىنىپ، قارجى پيراميداسىنا سالعان اقشالارىن قايتارىپ بەرۋدى سۇراماقشى.

قاراعاندى وبلىسىنىڭ قۇقىق قورعاۋ ورگاندارى وسى ماسەلەگە قاتىستى ءالى رەسمي تۇسىنىكتەمە بەرگەن جوق.

ەستەرىڭىزدە بولسا، ءماۆروديدىڭ «ممم» پيراميداسى قانشاما ادامدى زار قاقساتسا، قازاقستاندا 1994 جىلى پايدا بولعان «سماعۇلوۆ جانە ك0» قارجىلىق پيراميداسى دا ەلدە ءبىراز شۋ تۋدىرعان بولاتىن.