رەسەيلىك تانىمال ءانشى ۆالەريي مەلادزە استانادا وتكىزگەن كونسەرتىندە جۇبايىنىڭ قازاق ەكەنىن ايتىپ، جانكۇيەرلەرىنە ەرسى قىلىقتار جاساماۋدى، ءانشىنىڭ بەتىنەن ءسۇيىپ تۇرعان سۋرەتتەردى جەلىدە جاريالاماۋدى ءوتىندى.

استانا تۇرعىندارى مەلادزەنى قۇشاق جايا قارسى الدى. اسىرەسە، نازىك جاندىلاردىڭ انشىگە دەگەن ىقىلاسى ەرەكشە بايقالدى، دەپ حابارلايدى  Qamshy.kz  Stan.kz -كە سىلتەمە جاساپ.

دەسە دە، مەلادزە وزىمەن سۋرەتكە تۇسكىسى كەلىپ، بەتىنەن سۇيۋگە نيەت بىلدىرگەندەردىڭ بەتىن قايتارعان جوق. تەك: «ايەلىم – قازاق. ءسۇيىپ تۇرعان سۋرەتتەرىڭىزدى جەلىگە جاريالاماڭىزدار»، – دەپ ەسكەرتتى.

ەكى ساعات بويى رەسەيلىك ءانشى تالماي، شارشاماي، تەك جاندى داۋىستا ءان ايتتى. ايتا كەتەتىن جايت، مەلادزە 25 جىلدان بەرى وزىمەن بىرگە ساحناعا شىعاتىن مۋزىكانتتاردى اۋىستىرعان ەمەس.

كونسەرت بارىسىندا ۆالەريي مەلادزە گرۋزين تىلىندە ءان ورىندادى. ءسوز اراسىندا ءانشى قاي ەلگە بارسا دا ءوزىن شەتەلدىك سەزىنەتىنىن، الايدا قازاقستان وعان ەكىنشى وتانىنداي بولىپ كەتكەنىن ايتتى.

«قازاقستاندا ءوزىمدى شەتەلدىك سەزىنبەيمىن»، – دەدى ول.

«تري رەكي» ءانىن ورىنداۋ ءۇشىن مەلادزە كورەرمەندەر اراسىنان ءۇش ارۋدى ساحناعا شىعۋعا شاقىردى. الايدا نيەت بىلدىرگەندەر سانى 3 ەمەس، 33-تەن استى. ماەسترو تاڭدانىسىن جاسىرمادى:

«قىزداردىڭ كوپتىگى مۇحيتتاي»، – دەپ اتاپ ءوتتى ول.

ايتا كەتەيىك، ۆالەريي مەلادزە العاشقىلاردىڭ ءبىرى بولىپ باتىرحان شۇكەنوۆتىڭ ۇلىنا كومەك قولىن سوزعان. ول كىشى شۇكەنوۆتىڭ وقۋ اقىسىن تولەپ بەردى. ال مارقۇم بولعان باتىرحانمەن ول جاقىن دوس بولعان. جۋىردا عانا الماتىعا كەلگەن مەلادزە شۇكەنوۆكە ارنالعان فوتوكورمەگە اتباسىن بۇردى.