استانادا تۇراتىن كالكۋلياتور بالا رەسەيلىك تەلەشوۋدىڭ قازىلار القاسى مەن كورەرمەندەرىن تاڭ قالدىردى. 10 جاستاعى وقۋشى ماتەماتيكالىق ەسەپتەردى شەمىشكەشە شاعادى،- دەپ حابارلايدى Qamshy.kz Baq.kz-كە سىلتەمە جاساپ.
«روسسيا 1» ارناسىنىڭ «ۋديۆيتەلنىە ليۋدي» جوباسىندا ءىلياس ءۇش سىناقتان دا سۇرىنبەي وتكەن: الدىمەن ول بىرنەشە سەكۋندتا ەكى جانە ءۇش تاڭبالى ساندى قوسىپ، كەيىن ەكى قوس تاڭبالى ساننىڭ كۆادراتىن تاۋىپ. ارتىنشا وسى سانداردىڭ ايىرماسىن ەسەپتەپ بەردى. بالانىڭ تاپقىرلىعىنا ريزا بولعان كورەرمەندەر ورىندارىنان ورە تۇرەگەلىپ، قول شاپالاقتادى. اتالعان شوۋدىڭ جازباسى Youtube حوستينگىندە جاريالاندى.
10 جاستاعى ءىلياس توقتارحاندى «كالكۋلياتور ادام» دەپ اتايتىن كورىنەدى.
«مەنى كالكۋلياتور ادام دەپ اتايدى، ويتكەنى مەن ويشا بارلىعىنان جاقسى ەسەپتەيمىن. مەن ەكى، ءۇش، ءتورت تاڭبالى سانداردىڭ بىرنەشە قاتارىن ەسەپتەي الامىن، ەكى جانە ءۇش تاڭبالى سانداردى كوبەيتىپ، ءبولىپ، كۆادرات ءتۇبىرىن شىعارامىن. ماتەماتيكالىق يكەمىم مەن كىلەڭ بەسكە وقيتىنىما ماقتانامىن»، - دەدى ول تەلەجوبا كەزىندە.
«مەن جاي عانا ەسەپتەر مەن اباكۋستى ەلەستەتىپ، ەسەپتى شەشەمىن»، - دەپ ءتۇسىندىردى وقۋشى ءوزىنىڭ ەرەكشە قابىلەتىن.
ونىڭ ايتۋىنشا، 9 جاسىندا ول نيۋ-دەليدە مەنتال اريفمەتيكادان وتكەن جارىستا توپ جارعان. دوداعا الەمنىڭ 52 ەلىنەن 12 مىڭ ادام قاتىسقان.
«مەنىڭ بۇل قابىلەتىم دۇكەنگە بارعاندا، شەتەلگە شىققان كەزدە كوپ كومەكتەسەدى. ۆاليۋتا باعامىن كالكۋلياتورسىز-اق ەسەپتەي بەرەمىن. بولاشاقتا IT مامانى بولعىم كەلەدى. 3D-ويىندارىنىڭ باعدارلاماسىن، روبوتتار مەن سايتتار جاساپ، فوتوشوپتى مەڭگەرگىم كەلەدى. ماعان بۇل جوبا ماتەماتيكالىق قابىلەتىمدى كورسەتىپ، بارلىعىن تاڭداندىرۋ ءۇشىن كەرەك»، - دەيدى ءىلياس توقتارحان.
«ۋديۆيتەلنىە ليۋدي» تەلەشوۋى – 2011 جىلى گەرمانيادا ءساتتى باستاۋ الىپ، جۇڭگو، اقش، فرانسيا، يتاليا مەن يسپانيانى قوسا العاندا كوپتەگەن ەلدەردە تارالعان he Brain شوۋىنىڭ رەسەيلىك نۇسقاسى.
