فۋتبولدان قازاقستان قۇراماسىنىڭ باس باپكەرى تالعات بايسۋفينوۆ 2018 جىلعى الەم چەمپيوناتى ءتۋرنيرىنىڭ ىرىكتەۋ كەزەڭىندەگى چەرنوگوريا قۇراماسىنا قارسى كەزدەسۋدەن كەيىن ويىن تۋرالى ءوز پىكىرىمەن ءبولىسىپ، جۋرناليستەردىڭ ساۋالدارىنا جاۋاپ بەردى، دەپ حابارلايدى Qamshy.kz قازاقستان فۋتبول فەدەراسياسىنىڭ باسپا ءسوز قىزمەتىنە سىلتەمە جاساپ.
«ءبىرىنشى تايمنان كەيىن الاڭنىڭ ورتاسىنا قاراي جانە شابۋىل شەبىنە جىلدام پاستىڭ جەتىسپەگەنىن بايقادىق. مۇنى سپورتشىلارعا ايتتىق. قاقپاعا ءبىر گولدى وتكىزىپ الدىق، الايدا بۇل جاعدايدى تۇزەتۋگە بولادى دەپ ەسەپتەدىك. كەزدەسۋدىڭ ەكىنشى كەزەڭىندە نە بولعانىن ايتا المايمىن. ويىندى قاراپ، ءار ءساتتى ءجىتى قاراپ، ءتيىستى شارالاردى قابىلداۋىمىز كەرەك. بىزگە سەرگەكتىك، جيناقىلىق جەتىسپەگەنى كورىنىپ تۇردى.
- ويىننىڭ ءساتسىز ءوتۋ سەبەپتەرىنىڭ ءبىرى الاڭ بولۋى مۇمكىن بە؟
- چەرنوگوريا قۇراماسى ءوز الاڭىندا وينادى، بۇل قارسىلاس كوماندا ءۇشىن، ارينە، ۇلكەن قولداۋ. ۇيدەگى الاڭ ءبىز ءۇشىن دە باسىمدىق بەرەدى. دەگەنمەن، بار كىنانى الاڭنىڭ ساپاسىنا ارتىپ قويۋ دۇرىس ەمەس. ەندى كەلەسى ويىندارعا دايىندالاتىن بولامىز.
- ناعىز جانكۇيەرلەر ويىنشىلاردى سابىرعا شاقىرىپ، كەلەسى ويىنعا دۇرىس باعىت بەرەتىنىڭىزگە ۇمىتتەنۋدە. مويىماي، سىننان وتەتىندەرىڭىزگە سەنگىمىز كەلەدى...
- تىلەگىڭىزگە راحمەت، الايدا مەنىڭ قانشا ۋاقىت جۇمىس ىستەيتىنىمدى جۇمىس بەرۋشىم بىلەدى. ءار ويىن الدىندا ويىنشىلارعا باعىت كورسەتىپ، كەڭەس بەرەمىز، ولار الاڭعا شىعىپ، جەڭىس ءۇشىن كۇرەسەدى. وكىنىشكە قاراي، بۇگىنگى ويىندا وڭ ناتيجەگە قول جەتكىزە المادىق. بۇل ءۇشىن كىنانى ءوز موينىما الامىن. ەكى كۇننەن كەيىن ءوز الاڭىمىزدا رۋمىنياعا قارسى وينايمىز. بۇل ويىنعا دەگەن دايىندىقتى باستاپ كەتتىك.
