ەكونوميكالىق جانە سىبايلاس جەمقورلىققا قارسى كۇرەس اگەنتتىگى قارجى پيراميداسىن ۇيىمداستىرعاندارعا قىلمىستىق ءىس قوزعاۋ جونىندە زاڭعا وزگەرىستەر ەنگىزۋ تۋرالى ۇسىنىس جاسادى. وزگەرىستەر مەن تولىقتىرۋلار ەنگىزىلگەن جاڭا زاڭ بويىنشا قارجى پيراميداسىنىڭ قىزمەتى الاياقتىققا جاتاتىن بولادى.
وتكەن عاسىردىڭ توقسانىنشى جىلدارىندا ەلدى دۇرلىكتىرگەن «سماعۇلوۆ ك» كومپانياسىنىڭ قارجى پيراميداسى رەسەيلىك سەرگەي ماۆرودي تۇرمەدەن شىققاننان كەيىن «ممم - 2011» دەگەن اتپەن قازاقستاندا قايتا پايدا بولدى. بۇرىنعى «ممم دوللارلار» ماۆرو دەپ وزگەرتىلىپ، ماۆرودي بەلگىلەگەن باعامەن، ۇنەمى باعامى ءوسىپ وتىراتىن قۇندى قاعاز رەتىندە ساتىلدى. اي سايىن ون پايىزعا باعامى ءوسىپ وتىراتىن ماۆرو-نى پايدا تابۋ ءۇشىن ساتىپ الۋشىلار كوبەيدى. ممم - 2011 جۇمىسىن «اسا ءىرى كولەمدە ۇيىمداسقان توپپەن جاسالعان الاياقتىق» دەپ تاپقان ماسكەۋ پوليسياسى بيىلعى جىلدىڭ 7 ماۋسىمىندا بەلگىسىز تۇلعالارعا قاتىستى قىلمىستىق ءىس قوزعاعان. ممم - 2011 قازاقستانعا كەلىسىمەن قارجى پوليسياسى ونىڭ جۇمىسى قارجى پيراميداسىنا ۇقساس ەكەنىن ەسكەرتە باستاعان. الايدا وسى كەزگە دەيىن ممم - 2011 ۇستىنەن قارجى پوليسياسىنا ەشكىم شاعىم تۇسىرمەگەن. دەگەنمەن ساق بولعان ءجون، رەسەيلىكتەر ممم - 2011ء-دى قارجى پيراميداسى رەتىندە تانىپ، قىلمىستىق ءىس قوزعاپ جاتسا، ونىڭ ارتى بىلىق دەگەن ءسوز. قارجى پوليسياسىنىڭ رەسمي وكىلى مۇرات جۇمانبايدىڭ مالىمدەۋىنشە، سوڭعى ءۇش جىلدىڭ ىشىندە رەسپۋبليكا بويىنشا 17 قارجى پيراميداسى توقتاتىلعان. وسى ۋاقىتتىڭ ىشىندە پيراميدانى ۇيىمداستىرۋشىلار بەس مىڭعا جۋىق قازاقستاندىقتى تاقىرعا وتىرعىزعان. قازاقستان زاڭىندا قارجى پيراميداسى تۋرالى ناقتى انىقتاما جوق جانە مۇنداي قۇرىلىمداردىڭ قىزمەتىنە زاڭمەن تىكەلەي تىيىم سالىنباعان. سوندىقتان مۇنداي قۇرىلىمداردىڭ قىزمەتى الاياقتىققا جاتقىزىلۋى ءتيىس. ول ءۇشىن قارجى پوليسياسى قارجى پيراميداسىن ۇيىمداستىرۋشىلاردىڭ ارەكەتتەرىن قىلمىستىق كودەكستەگى 177-باپقا (الاياقتىق) سايكەستەندىرۋدى ۇسىنىپ وتىر. بۇدان بۇرىن كوكشەتاۋ، پەتروپاۆل قالالارىندا قارجى پيراميداسىنا قاتىستى داۋ شىعىپ، قۇقىق قورعاۋ ورگاندارىنىڭ ارالاسۋىمەن «ميكروكرەديتنايا ورگانيزاسيا «كازروسينۆەستپروەكت» ج ش س قىزمەتى ارەڭ توقتاتىلعان بولاتىن. سول كەزدەردە ءماجىلىس دەپۋتاتى مەرۋەرت قازبەكوۆا قازاقستاندا قارجى پيراميداسىنا زاڭ جۇزىندە تىيىم سالۋ جونىندە پرەمەر-مينيستر كارىم ماسىموۆكە دەپۋتاتتىق ساۋال جولداعان بولاتىن. ەندى قارجى پوليسياسىنان ۇكىمەتكە زاڭعا وزگەرتۋلەر ەنگىزۋ تۋرالى ۇسىنىس تۇسەدى. قايىرجان تورەجانوۆ
"ايقىن" گازەتى
سۋرەت: mobime.ru
پىكىر قالدىرۋ