بۇل تۋرالى اقوردانىڭ باسپا ءسوز قىزمەتى حابارلادى.
ءراسىم بارىسىندا قازاقستان پرەزيدەنتىنە اۆستريا رەسپۋبليكاسىنىڭ توتەنشە جانە وكىلەتتى ەلشىسى گەرحارد سايللەر، ۆاتيكاننىڭ توتەنشە جانە وكىلەتتى ەلشىسى فرەنسيس اسسيزي چۋلليكاتت، گەرمانيا فەدەراتيۆتىك رەسپۋبليكاسىنىڭ توتەنشە جانە وكىلەتتى ەلشىسى رولف مافاەل، گرەكيا رەسپۋبليكاسىنىڭ توتەنشە جانە وكىلەتتى ەلشىسى الەكساندروس كاترانيس، قاتار مەملەكەتىنىڭ توتەنشە جانە وكىلەتتى ەلشىسى احماد بەن ءالي ءابدۋرراحمان ءال-دجاميل ءال-تاميمي، نيدەرلاند كورولدىگىنىڭ توتەنشە جانە وكىلەتتى ەلشىسى ديرك يان كوپ، شۆەيساريانىڭ توتەنشە جانە وكىلەتتى ەلشىسى ۋرس شميد، جاپونيانىڭ توتەنشە جانە وكىلەتتى ەلشىسى يتيرو كاۆاباتا سەنىم گراموتالارىن تاپسىردى.
نۇرسۇلتان نازاربايەۆ ەلشىلەردى قازاقستانداعى ديپلوماتيالىق ميسسيالارىنىڭ رەسمي تۇردە باستالۋىمەن قۇتتىقتاپ، ولاردىڭ قىزمەتى ەلدەرىمىز اراسىنداعى ىنتىماقتاستىق اياسىن ودان ءارى نىعايتۋعا تىڭ سەرپىن بەرەتىنىنە سەنىم ءبىلدىردى.
قازاقستان پرەزيدەنتى ديپلوماتتاردىڭ استاناداعى جۇمىسى ماڭىزدى مەرەكە – ەل تاۋەلسىزدىگىنىڭ 25 جىلدىعى قارساڭىندا باستالۋىنىڭ سيمۆولدىق ءمانى بار ەكەنىن اتاپ ءوتتى.
– ءبىزدىڭ ەلىمىز بۇل مەرەكەلىك مەجەگە جاقسى ناتيجەلەرمەن جەتىپ وتىر. قازاقستان شيرەك عاسىردا دامۋدىڭ كۇردەلى كەزەڭىنەن ءوتتى. قول جەتكىزگەن جەتىستىكتەرمەن شەكتەلمەي، ەل ىرگەسىن بەكەمدەۋ ءۇشىن كەلەسى كەزەڭگە ارنالعان جاڭا ماقسات-مىندەتتەر بەلگىلەدىك، – دەدى نۇرسۇلتان نازاربايەۆ.
مەملەكەت باسشىسى ەلىمىزدىڭ سىندارلى جانە بەيبىت باستامالار، ۇيلەسىمدى كوپجاقتى سىرتقى ساياسات ارقىلى حالىقارالىق ارەنادا زور بەدەلگە يە بولعانىن ايتىپ ءوتتى.
– بۇعان قازاقستاننىڭ 2017-2018 جىلدارداعى بىرىككەن ۇلتتار ۇيىمى قاۋىپسىزدىك كەڭەسىنىڭ مۇشەسى بولىپ سايلانۋى دالەل. ءبىز قاۋىپسىزدىك كەڭەسىنىڭ مۇشەسى رەتىندە الەم نازارىن ءوز وڭىرىمىزگە اۋدارىپ، ورتالىق ازيا ءۇشىن وزەكتى ماسەلەلەردى كوتەرەتىن بولامىز، – دەدى قازاقستان پرەزيدەنتى.
نۇرسۇلتان نازاربايەۆ قازاقستاننىڭ جاھاندىق انتيادرولىق قوزعالىسقا باستاماشى بولىپ، ونىڭ كوشباسشىسىنا اينالعانىنا نازار اۋداردى.
– وسى رەتتە، ءبىز جاڭا باستاما كوتەردىك. مەن يادرولىق قارۋسىزدانۋ مەن جاھاندىق قاۋىپسىزدىككە قوسقان ۇلەسى ءۇشىن حالىقارالىق سىيلىق تاعايىنداۋ جونىندە شەشىم قابىلدادىم. اتالعان سىيلىقتىڭ العاشقى لاۋرەاتى بولىپ يوردانيا كورولى ءىى ابداللا تاڭدالدى. بۇدان كەيىن ارناۋلى كوميتەت قۇرىلىپ، ونىڭ شەشىمىمەن سىيلىق جىل سايىن سەمەي پوليگونىنىڭ جابىلعانى كۇنى – 29 تامىزدا تاپسىرىلاتىن بولادى، – دەدى ەلباسى.
مەملەكەت باسشىسى قازاقستاننىڭ جاپونيامەن ىنتىماقتاستىعىنىڭ ستراتەگيالىق ماڭىزىن اتاپ ءوتتى.
– پرەمەر-مينيستر سيندزو ابەنىڭ بىلتىرعى قازانداعى استاناعا العاشقى ساپارى ايتۋلى وقيعا بولدى. مەنىڭ توكيوعا بيىلعى قاراشاداعى ساپارىم قارىم-قاتىناسىمىزدى جاڭا ساپالى دەڭگەيگە شىعارۋعا ىقپال ەتەدى دەپ سەنەمىن، – دەدى نۇرسۇلتان نازاربايەۆ.
قازاقستان پرەزيدەنتى گرەكيامەن بايلانىستارىمىزدى دامىتۋدىڭ ەلەۋلى پەرسپەكتيۆالارىنا توقتالدى.
– گرەك ارىپتەستەرىمىزدىڭ ساياسي، ساۋدا-ەكونوميكالىق جانە مادەني-گۋمانيتارلىق ءوزارا ءىس-قيمىلدى جانداندىرۋ نيەتىن قولدايمىز، – دەدى مەملەكەت باسشىسى.
ەلباسى گەرمانيامەن ءوزارا ءىس-قيمىل قازاقستان ءۇشىن ەۋروپالىق باعىتتاعى ىنتىماقتاستىقتا ەرەكشە ماڭىزعا يە بولىپ وتىرعانىن ايتتى.
– ءبىز اسا جەمىستى جانە ءوزارا سەنىمگە نەگىزدەلگەن بيىك دەڭگەيدەگى ديالوگتى جوعارى باعالايمىز. بەرلينگە 2012، 2015 جىلدارداعى ساپارلارىم جانە فەدەرالدىق كانسلەر انگەلا مەركەلدىڭ استاناعا 2010 جىلعى ساپارى ەكىجاقتى قارىم-قاتىناستى جاڭا ساپالى دەڭگەيگە كوتەردى. ىنتىماقتاستىق بارىسىندا شيكىزات، ونەركاسىپ جانە تەحنولوگيا سالالارىنداعى كەلىسىمنىڭ جانە قازاقستاندا گەرمانيانىڭ دۋالدى ءبىلىم بەرۋ مودەلىن ەنگىزۋ تۋرالى كەلىسىمنىڭ جۇزەگە اسۋىنىڭ ءمانى ەرەكشە زور. ەۋروپاداعى قاۋىپسىزدىك جانە ىنتىماقتاستىق ۇيىمىنداعى بيىلعى گەرمانيا ءتوراعالىعىنىڭ باسىمدىعى بار باعىتتارىن جانە بەرليننىڭ وسى ۇيىمعا قاتىسۋشى ەلدەر اراسىنداعى ءوزارا سەنىمدى قايتا قالپىنا كەلتىرۋ جونىندەگى كۇش-جىگەرىن قولدايمىز، – دەدى نۇرسۇلتان نازاربايەۆ.
مەملەكەت باسشىسى قازاقستاننىڭ شۆەيساريا ەلىمەن ديالوگى قارقىندى دامىپ كەلە جاتقانىن اتاپ ءوتتى.
– ەكونوميكا جانە ينۆەستيسيا سالالارىندا ايتارلىقتاي الەۋەت بار. 2016 جىلدىڭ 7 ايىنىڭ ىشىندە ەكىجاقتى تاۋار اينالىمى 2،2 ميلليارد اقش دوللارىنا جەتتى. وسى مىندەتتى جۇزەگە اسىرۋعا ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيا مەن قازاقستان-شۆەيساريا ىسكەرلىك كەڭەسى ءوز ۇلەسىن قوسۋعا ءتيىس، – دەدى قازاقستان پرەزيدەنتى.
نۇرسۇلتان نازاربايەۆ نيدەرلاندتىڭ ءبىزدىڭ وتاندىق ەكونوميكاعا قوسقان ايتۋلى ۇلەسىنە نازار اۋداردى.
– نيدەرلاند ءبىزدىڭ ەكونوميكاداعى شەتەلدىك ينۆەستورلاردىڭ كوشىن باستاپ تۇر. گااگاعا 2014 جىلعى ساپارىم جانە پرەمەر-مينيستر مارك ريۋتتەنىڭ بىلتىرعى جەلتوقسانداعى استاناعا ساپارى ەكىجاقتى ءوزارا ءىس-قيمىلدى نىعايتۋعا تىڭ سەرپىن بەردى. نيدەرلاندتى بىرىككەن ۇلتتار ۇيىمى قاۋىپسىزدىك كەڭەسىنىڭ 2018 جىلعى تۇراقتى ەمەس مۇشەلىگىنە سايلانۋىمەن قۇتتىقتايمىن، – دەدى مەملەكەت باسشىسى.
قازاقستان پرەزيدەنتى ەلىمىزدىڭ ۆاتيكانمەن اراداعى قارىم-قاتىناستى ايرىقشا باعالايتىنىن ايتتى.
– ريم پاپاسى II يوانن پاۆەلدىڭ 2001 جىلعى قىركۇيەكتەگى قازاقستانعا ساپارى بارلىعىمىز ءۇشىن ايتۋلى وقيعا بولدى. سول جولى ول قازاقستان جەرىندە «زورلىق-زومبىلىقسىز الەم» قۇرۋعا شاقىرعان بولاتىن. الەمدىك جانە ءداستۇرلى دىندەر ليدەرلەرى سەزى جۇمىسىنا ۆاتيكاننىڭ مارتەبەلى وكىلدەرىنىڭ بەلسەنە قاتىسقانىن جوعارى باعالاپ، ريزاشىلىق بىلدىرەمىز، – دەدى نۇرسۇلتان نازاربايەۆ.
مەملەكەت باسشىسى اۆستريامەن ارادا جەمىستى ديالوگ ورناعانىن اتاپ ءوتتى.
– وسى ايدا وتەتىن قازاقستان مەن اۆستريا ۇكىمەتارالىق كوميسسياسى مەن ىسكەرلىك كەڭەستىڭ كەزەكتى وتىرىسىنا زور ءمان بەرەمىز. اۆسترياداعى ارىپتەستەرگە 2017 جىلى ەۋروپا قاۋىپسىزدىك جانە ىنتىماقتاستىق ۇيىمىنا ءتوراعالىق ەتۋ بارىسىندا تابىس تىلەيمىز. ءبىز قاۋىپسىزدىكتى قامتاماسىز ەتۋ، باتىس پەن شىعىس اراسىنداعى ديالوگتى نىعايتۋ ماسەلەسى بويىنشا ىنتىماقتاسۋعا ءازىرمىز، – دەدى قازاقستان پرەزيدەنتى.
بۇدان بولەك، نۇرسۇلتان نازاربايەۆ كاتاردى قازاقستاننىڭ سىرتقى ساياسي باستامالارىن ءاردايىم قولدايتىن اراب جانە مۇسىلمان الەمىندەگى ماڭىزدى ارىپتەس رەتىندە قاراستىراتىنىن جەتكىزدى.
– قاتار ءامىرىنىڭ 2014 جىلعى استاناعا ساپارى، مەنىڭ بىلتىرعى دوحاعا ساپارىم ەكىجاقتى ساپالى ءوزارا ءىس-قيمىلدى نىعايتۋعا سەپتىگىن تيگىزدى. ەكونوميكالىق ىنتىماقتاستىق اياسىن كەڭەيتە ءتۇسۋ ءۇشىن پارسى شىعاناعىمەن بايلانىستىراتىن «قازاقستان – تۇرىكمەنستان – يران» تەمىرجولىنىڭ مۇمكىندىگىن پايدالانۋ ماڭىزدى، – دەدى نۇرسۇلتان نازاربايەۆ.
سوڭىندا قازاقستان پرەزيدەنتى راسىمگە قاتىسۋشىلاردى استاناداعى ديپلوماتيالىق قىزمەتتەرىنىڭ باستالۋىمەن تاعى دا قۇتتىقتاپ، ولارعا جانە وتباسىلارىنا زور دەنساۋلىق، تابىس تىلەدى.
