وسى اپتادا الماتى قالاسىندا حالىقارالىق تابيعي اپات ءقاۋپىن ازايتۋ كۇنىنە وراي بۇۇ-نىڭ وكىلدىگى مەن ق ر ىشكى ىستەر مينيسترلىگى توتەنشە جاعدايلار دەپارتامەنتىنىڭ ۇيىمداستىرۋىمەن القالى باس قوسۋ ءوتتى. تابيعي اپات ءقاۋپىن ازايتۋعا قاتىستى شارانىڭ تاقىرىبى «LivetoTell» — ايتۋ ءۇشىن ءومىر ءسۇرۋ. جيىننىڭ باستى ماقساتى تابيعي اپات ورىن العان جاعدايدا ادام شىعىنىن بولدىرماۋ ءۇشىن كوپشىلىكتى ساقتانۋ امالدارىمەن كەڭىنەن تانىستىرۋ.

بۇۇ-نىڭ باس حاتشىسى پان گي مۋن حالىقارالىق تابيعي اپات ءقاۋپىن ازايتۋ كۇنىنە ارنالعان جولداۋىندا بىلاي دەدى: «بۇگىنگى حالىقارالىق تابيعي اپات ءقاۋپىن ازايتۋ كۇنىندە مەن اپاتتى باسقارۋدان قاۋىپ-قاتەردى باسقارۋعا كوشۋ ماقساتىندا بارلىق ۇكىمەت  ورگاندارىن ازاماتتىق قوعاممەن جانە جەكە سەكتورمەن ىنتىماقتاسۋعا شاقىرامىن. ارەكەت ەتۋدەن گورى ءقاۋىپتىڭ الدىن الۋعا كوشەيىك».

حالىقارالىق تابيعي اپات ءقاۋپىن ازايتۋ كۇنى بيىل 25ء-شى رەت اتالىپ وتۋدە. وسى ۋاقىت ارالاعىندا بۇل جاھاندىق ماڭىزى بار شاراعا اينالدى. بيىلعى جيىنعا الماتى قالاسى توتەنشە جاعدايلار باسقارماسىنىڭ وكىلدەرى قاتىسىپ، اپاتتىڭ الدىن الۋعا باعىتتالعان ىس-جوسپارلارمەن تانىستىردى. 

ق ر ىشكى ىستەر مينيسترلىگى توتەنشە جاعدايلار جونىندەگى كوميتەتتىڭ جەدەل قۇتقارۋ وتريادىنىڭ بولىمشە باستىعى ءسابيت قوبجانوۆ بۇل باعىتتاعى جۇمىستار «ادام ءومىرىن اراشالاۋداعى ناقتى وقيعالار» دەگەن ۇرانمەن جۇرگىزىلىپ جاتقانىن ەسكە سالدى.  

جيىن بارىسىندا بۇۇ-نىڭ يۋنەسكو، UNISDR، يۋنيسەف، UN-WOMEN، UNDP وكىلدىكتەرى مەن قوعامدىق اقپارات دەپارتامەنتىنىڭ ماماندارى بايانداما جاسادى. بۇۇ ماماندارى ورتا ازيا مەن كاۆكاز ايماعىندا توتەنشە جاعدايلار كەزىندە ادام شىعىنىن بولدىرماۋعا قاتىستى باعدارلامالاردىڭ ماڭىزىنا توقتالدى. جيىندا سونداي-اق قازاقستاننىڭ قىزىل جارتى اي قوعامىنىڭ وكىلدەرى 2015 جىلى الماتى قالاسى مەن جاقىن اۋدانداردا وتكەن سەل كەزىندە تۇرعىنداردى قۇتقارۋ تاجىريبەلەرىمەن ءبولىسىپ، ۆيدەوروليكتەر كورسەتتى.

شارافات جىلقىبايەۆا