وڭتۇستىك كورەيانىڭ 64 جاستاعى پرەزيدەنتى پاك كىن حەگە دەگەن حالىقتىڭ سەنىمى تومەندەپ بارادى. وسى اپتادا ونىڭ ەل باسشىسى رەتىندەگى رەيتينگى 17 پايىزعا دەيىن تومەندەگەن. بۇنىڭ باستى سەبەبى پاك كىن حە باياندامالارىنىڭ ءماتىنىن تۇزەتۋمەن اينالىساتىن جاقىن قۇربىسىمەن بايلانىستى داۋدا بولسا كەرەك. پرەزيدەنتتى سىناۋشىلار ۇكىمەتتە قىزمەت ىستەمەيتىن ادامعا ماڭىزدى قۇجاتتاردى بەرۋ مەملەكەتتىك قۇپيانىڭ جاريا بولۋىنا اكەپ سوعاتىنىن ەسكەرتۋدە.  

پاك كىن حە كورەيا رەسپۋبليكاسىنىڭ 11ء-شى پرەزيدەنتى. ول بۇرىنعى پرەزيدەنت پاك چون حيءدىڭ قىزى. پاك كىن حە ەل باسشىسى لاۋازىمىنا 2013 جىلدىڭ 25 اقپانىندا وتىرعان.  

پاك كىن حە 1952  جىلى 2 اقپاندا تەگۋدە دۇنيەگە كەلگەن. ول پرەزيدەنت اۋلەتىندەگى تۇڭعىش بالا. پاك چي مان ەسىمدى ءىنىسى جانە  پاك سە ءون دەگەن ءسىڭلىسى بار.

پاك كىن حە سەۋلدەگى ورتا مەكتەپتى 1970 جىلى بىتىرگەن سوڭ سوگان ۋنيۆەرسيتەتىندە ينجەنەر-ەلەكترونيك ماماندىعى بويىنشا باكالاۆر دارەجەسىن العان. ال 1987 جىلى تايۆاندىق جۇڭگو مادەنيەتى ۋنيۆەرسيتەتىن بىتىرگەن. ول سونداي-اق كورەيا جەتەكشى عىلىمي-تەحنيكالىق ينستيتۋتى مەن سوگان ۋنيۆەرسيتەتىندە ءتۇرلى عىلىمي دارەجەلەرگە يە بولعان.  

1981 جىلى پاك كىن حە ءدىني وقۋ ورنىندا ءبىر سەمەستر ءبىلىم الىپ، حريستيان ءدىنىن زەرتتەگەن. بۇدان كەيىن ول ساياسي جولعا تۇسكەن.

1974 جىلى  15 تامىزدا پاك چون حي اۋلەتىنە قاستاندىق جاسالادى. پرەزيدەنتتىڭ ايەلى يۋك ءون سۋ وسى وقيعا كەزىندە مەرت بوپ، ەلدىڭ «ءبىرىنشى حانىمى» تيتۋلى پرەزيدەنتتىڭ قىزى پاك كىن حەگە وتەدى. پرەزيدەنت پاك چون حي ايەلى قازا تاپقان سوڭ ۇيلەنبەگەن. 1979 جىلى پاك چون حي ۇلتتىق بارلاۋ اگەنتتىگىنىڭ ديرەكتورى كيم دجە گيۋدىڭ قولىنان قازا تابادى.

1998 جىلى ۇلتتىق جينالىس (پارلامەنت) سايلاۋىندا پاك كىن حە ۇلى ەل پارتياسى اتىنان تەگۋ ايماعىنان سايلانادى. بۇدان كەيىن ول 2008 جىلعا دەيىن وسى ايماق بويىنشا ءۇش مارتە دەپۋتات اتانادى.   

2004–2006  جىلدارى  پاك كىن حە ۇلى ەل پارتياسىن باسقارادى. بارلىق سايلاۋدا اتالمىش پارتيانىڭ وكىلدەرى جەڭگەندىكتەن پاك كىن حە ەل اراسىندا «سايلاۋ حانشايىمى» دەگەن اتقا يە بولادى. 2007 جىلى پاك كىن حە پرەزيدەنت سايلاۋىنا تۇسەدى. الايدا پارتيا ىشىندەگى سايلاۋدا لي ءمون باكتان جەڭىلەدى. 2011 جىلى رەيتينگىنىڭ تومەندەۋىنە بايلانىستى پارتيا اتاۋى سەنۋري بولىپ وزگەرتىلەدى. 2011 جىلى 19 جەلتوقساندا پاك كىن حە پارتيانىڭ توتەنشە كوميتەتىنىڭ باسشىسى بولىپ سايلانادى. ال 2012 سەنۋري پارتياسى جەڭىسكە جەتىپ، پاك كىن حە پرەزيدەنت تاعى ءۇشىن سايلاۋعا تۇسەدى.

2012 جىلعى پارلامەنت سايلاۋىندا پاك كىن حەنىڭ پارتياسى جەڭىسكە جەتىپ، پارلامەنتتەگى 300 ورىننىڭ 152ء-سىن يەلەنەدى.  

2012 جىلى 20 تامىزدا  پارتيا ىشىندەگى پرەزيدەنت سايلاۋىندا پاك كىن حە باسەكەلەستەرىن باسىپ وزىپ، 83،97 % داۋىسقا يە بولادى. ءسويتىپ ول پرەزيدەنت تاعىنان ۇمىتكەر اتانادى.

19 جەلتوقسانداعى سايلاۋدا پاك كىن حە سايلاۋشىلاردىڭ 51،55% داۋسىن جينايدى. ءسويتىپ ول وڭتۇستىك كورەيا تاريحىنداعى العاشقى ايەل پرەزيدەنت اتانادى.

پاك كىن حە پرەزيدەنت تاعىنا رەسمي تۇردە 2013 جىلدىڭ 25 اقپانىندا وتىرادى.

پاك كىن حەنىڭ وتباسىلىق جاعدايىنا كەلسەك، ول ۇيلەنبەگەن، بالاسى جوق.

شارافات جىلقىبايەۆا