كۇيەۋى باقىتبەك ەسەنتايەۆتىڭ 9 جىلعا باس بوستاندىعىنان ايىرىلعانىنا قاتىستى بايان ەسەنتايەۆا ينستاگرام پاراقشاسىندا ءوز پىكىرىن ءبىلدىردى،- دەپ حابارلايدى Qamshy.kz.

پروديۋسەر وندا بىلاي دەپ جازعان: «مەن كەشىرگەنىممەن، زاڭ كەشىرمەدى. ءومىر وسىلاي، ءبىزدىڭ جانە بالالارىمىزدىڭ  تاعدىرى وسىلاي بولدى. بولعان وقيعا ءۇشىن  ءبىر-بىرىمىزدى تۇسىنە الماعانىمىز، بالالاردىڭ كوز جاسى، ويلانباي جاساعان شەشىمدىر ءۇشىن مەنىڭ جانىم اۋىرۋدا. مەن سىنعا، قوعامنىڭ پىكىرىنە ۇيرەنىپ كەتكەلى قاشان، ءاردايىم تەرىس پىكىردەگى ادامدار بولادى، ەشكىم ءوز ءومىرىن بولجاي المايدى، ءبارىمىز دە پەندەمىز،  ءارقايسىسىمىزدىڭ قاتەلەسۋگە قاقىمىز بار.  ومىرىمدە ورىن العان بۇل وقيعانىڭ دۇرىس-بۇرىستىعىن بىلمەيمىن، مۇنى تەك ۋاقىت كورسەتەدى.  جۇرەكتىڭ اقىلعا باعىنبايتىن كەزى بولادى، مەنىڭ باسىمدا دا وسىنداي جاعداي.  ءارقايسىسىمىز ءوز جازامىزدى الدىق. زاڭ بارىنە بىردەي. 22 جىل بىرگە تۇرعان ومىرىمىزدە، ونىڭ جاقسى اكە ەكەنىن سەنىمدى تۇردە ايتا الامىن. ارينە بالالاردى جالعىز تاربيەلەۋ ماعان قيىن، ءبىراق مەن بارىنە شىدايمىن، بارىنە دە  توزەمىن!  مەن ەشقاشان وزىمە قۇربان ادام رەتىندە ساناعان ەمەسپىن.  مەنىڭ جانە مەنىڭ بۇرىنعى جارىمنىڭ حيكاياسى اياقتالماعانىنا سەنىمدىمىن، ول وتە مىقتى ادام،  وعان  دەنساۋلىق پەن كۇش-قايرات تىلەيمىن، الدا جاقسى ومىرگە دەگەن ءۇمىت بار. مەن ايتارىمدى ايتتىم، وسى ماسەلەگە بايلانىستى  ب ا ق وكىلدەرىنىڭ ەندى مەنى مازالاماۋىن وتىنەمىن!»  

ەستەرىڭىزگە سالساق،  بۇگىن تالدىقورعان قالاسىندا ءوتىپ جاتقان الماتى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا سۋديا بەرىكجان ءبايجۇنىسوۆ باقىتبەك ەسەنتايەۆقا قاتىستى سوت ۇكىمىن جاريا ەتكەن بولاتىن. پروديۋسەردىڭ بۇرىنعى كۇيەۋى 9 جىلعا قاتاڭ رەجىمدى كولونياعا جىبەرىلدى. الايدا ەسەنتايەۆتىڭ ءوزى سوت بارىسىندا كىنالى ەمەستىگىن ايتقان.سونداي-اق، ول اپپەلياسيالىق شاعىم تۇسىرمەك.