مونعولياداعى ەتنيكالىق قازاق، بۇركىتشى قىز ايشولپان تۋرالى «بۇركىتشى قىز» ءفيلمى وسكارعا ۇسىنىلماق، دەپ حابارلايدى «قامشى» پورتالى ەگەمەن قازاقستانعا سىلتەمە جاساپ.

ءبارى بۇركىتشىلىككە ءتانتى اتاقتى امەريكالىق رەجيسسەر وتتو بەللدىڭ يزرايلدىك فوتوگراف اشەر سۆيدەنسكي تۇسىرگەن ايشولپاننىڭ سۋرەتىن كورگەن كەزدەن باستالىپتى. سول ساتتە وعان ايشولپان تۋرالى ءفيلمنىڭ يدەياسى كەلەدى.

ەكى جىلعا سوزىلعان جۇمىس اياقتالىپ، وتتو بەلل «بۇركىتشى قىز» (The Eagle Huntress) دەرەكتى ءفيلمىن قازان ايىندا كوپشىلىكتىڭ نازارىنا ۇسىندى. فيلم نيۋ-يورك پەن لوس-اندجەلەس كينوتەاترلارىندا 28 قازاننان كورسەتىلە باستادى. ءبىر جارىم ساعاتتىق تۋىن­دى اعىلشىنشا جانە كەيىپ­كەرلەردىڭ ءسوزى سۋبتيترلەرمەن بەرىلگەن.

بۇركىتپەن اڭ اۋلاۋ ەر ادامنىڭ ءىسى سانالاتىنى جايلى ەستىگەن فيلم اۆتورلارى اۋىل اقساقالدارىنا بارىپ، بۇل جايدىڭ ءمانىن سۇراعان. سونىمەن قاتار، وتتو بەلل ءداستۇردى ءبىل­مەيتىن كورەرمەن دۇرىس ءتۇسىن­بەي قالۋى مۇمكىن دەگەن ويمەن اڭشىلىقتىڭ كەي كورىنىستەرىن قىسقارتقانىن ايتقان.

ءفيلمنىڭ پروديۋسەرى ءارى دىبىستاۋشىسى «جۇلدىزدى سوعىس» («زۆەزدنىە ۆوينى») اكتريساسى دەيزي ريدلي بولدى. وتتو بەلل Business Insider پورتالىنا بەرگەن سۇحباتىندا ءريدليدىڭ ايشولپاننىڭ وقي­عاسىنا ەرەكشە تولقىعانىن ايتقان. Deadline باسىلىمىنا بەرگەن سۇحباتتا دەيزي ءوزى دە: «ايشولپاننىڭ وقيعاسى ماعان ەرەكشە اسەر ەتتى. سوندىقتان وسى ءفيلمنىڭ ءبىر قاتىسۋشىسى بولعىم كەلدى. جوباعا قاتىسقانىمدى ماقتان ەتەمىن»، – دەدى.

ءفيلمدى لاتىن امەريكاسى، جاڭا زەلانديا، گەرمانيا، اۋس­تراليا مەن ازيادا كورسەتۋ قۇ­قىعى Sony كومپانياسىنا تيەسىلى. 20th Century Fox Animation كارتيناعا رەمەيك ءتۇسىرۋ تۋرالى كەلىسوزدەر ءجۇر­گىزىپ جاتىر. ءبىراق بۇل يدەيانى جۇزەگە اسىرۋ ءۇشىن Sony Pictures كومپانياسىنىڭ كەلىسىمى كەرەك. ەكەۋى باسەكەلەس بولعاندىقتان، ازىرگە بولاشاعى بەلگىسىز. دەرەكتى فيلم نەگىزىندە انيماسيالىق فيلم جاساۋ قۇقىعى 2 ميلليون دوللارعا باعالانىپ وتىر. بۇل قۇقىق اياسىنا، سونداي-اق، الەمنىڭ ءبىرقاتار ەلدەرىنە تاراتۋ مۇمكىندىگى دە كىرەدى.

ايشولپان ءقازىر بايان-ولگيي قالاسىنداعى موڭعول-تۇرىك كول­لەدجىندە 10-سىنىپتا وقيدى.

1 قاراشا كۇنى «قازاقستاندىق بۇركىتشى قىز» دەپ ماقالا جاريالاعان «New York Times» ەكى كۇننەن كەيىن قاتەلەسكەندەرىن جازىپ، موڭعوليادا تۇراتىن قازاق قىزى ەكەنىن ايتىپ، تۇزەتۋ جاريالادى. فيلم تۋرالى باسقا دا الەمدىك ب ا ق جازىپ جاتىر. كەيبىرى ايشولپاندى «عاسىرلار ءداستۇرىن بويىنا سىڭىرگەن ارۋ» اتادى.

ايشولپاندى ۇياڭ، نازىك ءارى باتىر قىز دەگەن North West Herald امەريكالىق باسىلىمى «بۇل فيلم كورەرمەندى اي­شولپاننىڭ الەمىنە اپارادى. ايشولپان وسكەندە دارىگەر بولۋدى ارماندايدى. ءبىراق بۇركىت­شىلىكتى تاستاعىسى كەل­مەيدى. «بۇركىت­ءشى قىز» – جاستارعا شابىت بەرەتىن، اسەرلى پەيزاجىمەن جۇرەكتەرگە جىلۋ بەرەتىن فيلم» دەپ جازدى.

Daily News «موڭعوليانىڭ باتىسىنداعى التاي تاۋلارىندا تۇسىرىلگەن فيلم بۇركىتپەن ساياتشىلىق جاساۋ ءداستۇرىن كورسەتەدى. بۇل كوشپەندى قازاق­تاردىڭ ۇرپاقتان ۇرپاققا مۇرا ەتىپ كەلە جاتقان ونەرى. ايشولپان – وسى ءداستۇردى مەڭگەرگەن ەرەكشە قىز» دەپ جازدى.

ايتا كەتەيىك، وتتو بەلل «بۇركىتشى قىزدى» «وسكارعا» ۇسىنعالى وتىر.