كامەلەتتىك جاسقا تولعان بالالاردى جالداپ، ولارعا 19 ساعات جۇمىس جاساتقىزعان دەگەن ايىپپەن قىتايدا كيىم تىگەتىن جاسىرىن فابريكالاردىڭ بىرىندە قىزمەت اتقارعان بريگادير ۇستالدى دەگەن اقپارت بۇگىن bbc.com سايتىندا پايدا بولعان بولاتىن. qamshy.kz سايتى بولعان جايت تۋرالى حاباردى قازاقشاعا اۋدارىپ، وقىرمان نازارىنا ۇسىنۋدى ءجون سانادى.

قىتايلىق باق-تىڭ مالىمەتىنە سۇيەنسەك، لاس، قاراڭعى جەردە ورنالاسقان فابريكاعا جۇمىس جاساۋعا 13 جاستاعى بالالار الىنعان.  Pear Video دەگەن جۇڭگو سايتى چاشۋ قالاسىنداعى فابريكا جەلىلەرى جايىندا التى مينۋتتىق بەينەەسەپ جاريالادى. ۆيدەونى تاساداعى جۋرناليست تۇسىرگەن.

جۇرگىزىلگەن زەرتتەۋگە سەنسەك، شەبەرحانالاردا قىتايدىڭ الەۋەتى تومەن وڭتۇستىك ەلدى-مەكەندەرىنىڭ تۇرعىندارى جۇمىس جاساعان.

بالالاردىڭ جۇمىس كۇنى كۇن سايىن تاڭعى 07:30-دا باستالعان ەكەن. كۇندىزگى نورمانى ورىنداماي ولار جۇمىستان كەتە المايتىن بولعان. كەيدە جۇمىس كۇندەرى تۇنگى ۇشتە اياقتالاتىن. بالالار ايىنا 28 كۇن تالماي ەڭبەكتەنۋگە ءماجبۇر بولعان.

فابريكا يەلەرىنىڭ ءبىرى جۇمىسشىلاردى 1000-3000 يۋانعا (145-435 دوللار) «ساتىپ العانىن» ايتتى. تاعى ءبىر باستىق بالالار ەشقانداي كەلىسىمشارتسىز جۇمىس جاساپ جاتقانىن حابارلادى.

جۋرناليستىك زەرتتەۋدىڭ ناتيجەسىندە بالالاردىڭ قۇجاتتارى مەن ۇيالى تەلەفوندارىن باسشىلىق فابريكادان قاشىپ كەتپەۋى ماقساتىندا تارتىپ العانىن انىقتادى.

سيۋجەت شىعىسىمەن قالا بيلىگى كيىم تىگەتىن شەبەرحانالاردىڭ جۇمىسىنا تەكسەرۋ جۇرگىزە وتىرىپ جوعارىدا ايتىلعان جاسىرىن فابريكانى تاۋىپ الدى.

اۋدارعان: جازيرا بايدالى