تاياۋ شىعىستاعى كاتار مەن قازاقستان اراسىندا جوعارى ساياسي دەڭگەيدەگى ءوزارا سەنىمدى قارىم-قاتىناس قالىپتاسىپ ۇلگەردى. ەندى بۇل ەل قازاقستاندا يسلام بانكينگىن دامىتۋ ماسەلەلەرىن تالقىلاماق. كاتار قازاقستاندا بانك سەكتورىنا ينۆەستيسيا سالۋدى قاراستىرۋدا. بۇل تۋرالى استانادا كاتار مەملەكەتىندەگى ق ر توتەنشە جانە وكىلەتتى ەلشىسى اسقار شوقىبايەۆتىڭ قاتىسۋىمەن وتكەن باسپا ءسوز ءماسليحاتىندا ءمالىم بولدى. اتاپ ايتقاندا، مەملەكەت باسشىسى ن.نازاربايەۆتىڭ 2015 جىلدىڭ قازانىندا دوحاعا رەسمي ساپارى بارىسىندا 2016 جىلى قازاقستانعا كاتاردىڭ ءىرى بيزنەس وكىلدەرىنىڭ ساپارى تۋرالى كەلىسىم جاسالعان بولاتىن. وسى رەتتە ەلشىلىك تاراپىنان اتالعان ەلدىڭ مەملەكەتتىك ورگاندارى مەن ىسكەر توپتارىمەن ءبىرقاتار كەزدەسۋلەر وتكىزىلدى.
«كاتار جاعى قازاقستانعا ساپارمەن كەلىپ، ىنتىماقتاستىقتى نىعايتۋعا ازىرلىگىن ءبىلدىرىپ وتىر. كاتار ورتالىق بانكى ءتوراعاسىنىڭ جەتەكشىلىگىمەن ءىرى بانكتەر باسشىلارىنان قۇرالعان توپ ەلىمىزگە بيىلعى تامىزدىڭ اياعىندا ساپارلايدى. ولار قازاقستاننىڭ بانك سەكتورىنا ينۆەستيسيا سالۋ، سونداي-اق ەلىمىزدە كاتارلىق بانكتەر فيليالدارىن اشۋ، يسلام بانكينگىن دامىتۋ ماسەلەلەرىن تالقىلاۋعا نيەتتى»،-دەلىنگەن ق ر سىرتقى ىستەر مينيسترلىگى مالىمەتىندە.
سونىمەن قاتار كاتار مەملەكەتى قازاقستانعا تۇراقتى تۇردە ەكى ەلدىڭ سىرتقى ىستەر مينيسترلىكتەرى اراسىندا ساياسي كەڭەسۋلەر وتكىزۋدى ۇسىندى. بۇل تۋرالى استانادا وتكەن باسپا ءسوز ءماسليحاتىندا كاتار مەملەكەتىندەگى ق ر توتەنشە جانە وكىلەتتى ەلشىسى اسقار شوقىبايەۆ ءمالىم ەتتى. «ىنتىماقتاستىق باعىتىندا كوپتەگەن وي-پىكىرلەرىمىز جانە جوسپارلارىمىز بار. قازىرگى كەزدە كاتار مەملەكەتى بىزگە تۇراقتى تۇردە ەكى ەلدىڭ سىرتقى ىستەر مينيسترلىكتەرى اراسىندا ساياسي كەڭەسۋلەر وتكىزۋدى ۇسىنىپ وتىر. ياعني، كەڭەسۋلەردى سىرتقى ىستەر مينيسترلەرى ورىنباسارلارى دەڭگەيىندە تالقىلاۋ ۇسىنىلدى. ءبىزدىڭ سىرتقى ساياسي ۆەدومستۆومىزدا وسى ۇسىنىس قاراستىرىلىپ جاتىر. وسى رەتتە وڭتايلى شەشىم بولادى دەگەن سەنىمدەمىز»، - دەپ توقتالدى ەلشى. ونىڭ سوزىنە قاراعاندا، قازىرگى كەزدە كاتارلىق ءسىم وكىلدەرى قازاقستان تاراپىنىڭ جاۋابىن كۇتىپ وتىر. ايتا كەتەيىك، 1993 جىلدىڭ 1 شىلدەسىندە قازاقستان مەن كاتار اراسىندا ديپلوماتيالىق قاتىناستاردى ورناتۋ تۋرالى بىرلەسكەن كومميۋنيكەگە قول قويىلدى. ق ر ەلشىلىگى كاتاردا 2007 جىلدىڭ مامىرىندا اشىلدى، ال قازاقستانداعى كاتار ەلشىلىگى 2008 جىلدىڭ ناۋرىزىنان قىزمەت ەتۋدە.
اتالعان ەلدىڭ قازاقستاندىق ينفراقۇرىلىمدىق قورىنا كىرۋى تۋرالى كەلىسسوزدەر تاياۋدا اياقتالماق. ياعني، كاتار تاراپى قازاقستاندىق ينفراقۇرىلىمدىق قورىنا 100 ملن. اقش دوللارى كولەمىندەگى ينۆەستيسيامەن كىرمەك. بۇل تۋرالى استانادا وتكەن باسپا ءسوز ءماسليحاتىندا كاتار مەملەكەتىندەگى ق ر توتەنشە جانە وكىلەتتى ەلشىسى اسقار شوقىبايەۆ ءمالىم ەتتى.
«وتكەن جىلى استاناعا كاتار ينۆەستيسيالىق قورىنىڭ باسشىسى ساپارمەن كەلدى. ول ەلىمىزدىڭ رەسمي تۇلعالارىمەن ايتارلىقتاي جەمىستى كەلىسسوزدەر جۇرگىزدى. قازىرگى كەزدە بىزدە كاتاردىڭ كازاقستاندىق ينفراقۇرىلىمدىق قورعا 100 ملن. اقش دوللارى ۇلەسىمەن كىرۋى تۇرعىسىنداعى ماڭىزدى جوبا بار. بۇگىندە وسى باعىتتا كەلىسسوزدەر ءجۇرىپ جاتىر. جاقىن ارادا بۇل ماسەلە شەشىلەدى دەگەن ۇمىتتەمىن»،-دەدى ەلشى. تاراتىلعان مالىمەتتەرگە قاراعاندا، كاتار ينۆەستيسيالىق قورى قازاقستاندا باسقا دا اۋقىمدى جوبالاردى قاراستىرۋعا دايار. وسى رەتتە قور اۋىل شارۋاشىلىعى سالاسىنا قىزىعۋشىلىق تانىتىپ وتىر. ەلشىنىڭ ايتۋىنشا، جاھاندىق ەكونوميكالىق داعدارىسقا قاراماستان، كاتار تاراپى ينۆەستيسيا سالۋداعى بەلسەندىگىن جوعالتقان جوق.
سونداي-اق كاتار ەلى سەمەيدە يادرولىق سىناقتاردان زارداپ شەككەندەر ءۇشىن ساۋىقتىرۋ ورتالىعىن سالۋ بويىنشا كەلىسسوزدەردى جانداندىرۋعا ءازىر. بۇل تۋرالى استانادا وتكەن باسپا ءسوز ءماسليحاتىندا كاتار مەملەكەتىندەگى ق ر توتەنشە جانە وكىلەتتى ەلشىسى اسقار شوقىبايەۆ ءمالىم ەتتى. اتاپ ايتقاندا، بۇل جوبا كاتار دامۋ قورىنىڭ قاراۋىندا جاتىر. «بۇل تۇرعىدا جوبالىق-سمەتالىق قۇجاتناما بويىنشا ماسەلە تۋىندادى. كاتار تاراپى بۇل جوباعا 20 ملن. دوللار بولۋگە دايار، ياعني وسى قارجى ورتالىقتىڭ قۇرىلىسىن جۇزەگە اسىرۋعا جەتكىلىكتى بولسا. سوندىقتان وسى جوباعا جاۋاپتى شىعىس قازاقستان وبلىسىنىڭ نەمەسە سەمەيدىڭ اكىمدىگى، سونداي-اق ەلىمىزدىڭ باسقا دا ورگاندارى اتالعان ينۆەستيسياعا ورتالىقتى سالۋعا دايار بولسا، وندا كاتار جاعى كەلىسسوزدەردى جانداندىرۋعا ءازىر»،-دەدى ول.
ق ر مەن سينگاپۋردىڭ ىنتىماقتاستىق پەرسپەكتيۆالارى دا نازاردان تىس قالماۋدا. ۇكىمەت ۇيىندە ق ر پرەمەر-مينيسترىنىڭ ءبىرىنشى ورىنباسارى باقىتجان ساعىنتايەۆ سينگاپۋر رەسپۋبليكاسى مەملەكەتتىك ساۋدا جانە يندۋستريا ءمينيسترى، مەملەكەتتىك ۇلتتىق دامۋ ءمينيسترى كو پو كۋنمەن كەزدەسۋ وتكىزدى. تاراپتار قازاقستان مەن سينگاپۋردىڭ اراسىنداعى ەكى جاقتى قاتىناستاردى دامىتۋدىڭ جاعدايى مەن پەرسپەكتيۆالارىن قارادى. باقىتجان ساعىنتايەۆ پەن كو پو كۋن ءوزارا ساۋدا-ەكونوميكالىق جانە ينۆەستيسيالىق ءىس-قيمىلدى ارتتىرۋ قاجەتتىگىن ايتتى. پرەمەر-مينيستردىڭ ءبىرىنشى ورىنباسارى قازاقستان الەۋمەتتىك-ەكونوميكالىق دامۋدىڭ وزىق تاجىريبەسىن بەلسەندى بەيىمدەپ كەلە جاتقان ەلدەردىڭ ءبىرى ەكەنىن ايتىپ ءوتتى. اتاپ ايتقاندا، «سامۇرىق-قازىنا» ۇلتتىق ءال-اۋقات قورىن قۇرۋ، مەملەكەتتىك قىزمەتتىڭ جاڭا ۇلگىسىن ەنگىزۋ، ەلەكتروندى ۇكىمەتتى دامىتۋ جانە ت.ب. كەلىسسوزدەر بارىسىندا ونەركاسىپتىك ىنتىماقتاستىق، ينفراقۇرىلىمدىق جوبالار اياسىنداعى، قارجى سالاسىنداعى ءوزارا ءىس-قيمىل ماسەلەلەرى تالقىلاندى.
