ەلباسى قازاقستاننىڭ الەۋمەتتىك-ەكونوميكالىق دامۋ ماسەلەلەرى جونىندە كەڭەس وتكىزدى. بۇل تۋرالى "قامشى" پورتالى اقوردا باسپا ءسوز قىزمەتىنە سىلتەمە جاساپ حابارلايدى. 

كەڭەسكە پرەمەر-مينيستر ب.ساعىنتايەۆ، پرەزيدەنت اكىمشىلىگىنىڭ باسشىسى ءا.جاقسىبەكوۆ، ۇلتتىق بانك ءتوراعاسى د.اقىشيەۆ، پرەمەر-مينيستردىڭ ءبىرىنشى ورىنباسارى ا.مامين، پرەمەر-مينيستردىڭ ورىنباسارى - اۋىل شارۋاشىلىعى ءمينيسترى ا.مىرزاحمەتوۆ، پرەمەر-مينيستردىڭ ورىنباسارى ي.تاسماعامبەتوۆ، پرەزيدەنتتىڭ كومەكشىسى ءا.سمايىلوۆ، دەنساۋلىق ساقتاۋ جانە الەۋمەتتىك دامۋ ءمينيسترى ت.دۇيسەنوۆا، قارجى ءمينيسترى ب.سۇلتانوۆ، ۇلتتىق ەكونوميكا ءمينيسترى ق.بيشىمبايەۆ قاتىستى.

ءىس-شارا بارىسىندا ماڭىزدى باعدارلامالىق قۇجاتتارعا قاتىستى نەگىزگى ۇستانىمدار قاراستىرىلدى.

مەملەكەت باسشىسى جينالعاندارعا ارناعان سوزىندە بيىلعى قىركۇيەكتە ۇكىمەتتىڭ كەڭەيتىلگەن وتىرىسىندا ءتيىستى تاپسىرمالار بەرىلگەنىن ايتتى.

نۇرسۇلتان نازاربايەۆ اگرارلىق سالا ماسەلەلەرى جان-جاقتى قاراستىرۋدى تالاپ ەتەتىنىن اتاپ ءوتتى. ءونىم كولەمىن ۇلعايتۋ، ونىمدىلىكتى ارتتىرۋ، اۋىل شارۋاشىلىعى ءوندىرىسىن ءارتاراپتاندىرۋ، ازىق-تۇلىك يمپورتىن ازايتۋ، وڭدەلگەن ءونىم ەكسپورتىن كوبەيتۋ جانە اۋىل شارۋاشىلىعى كووپەراسياسىن جەتىلدىرۋ اگروونەركاسىپ كەشەنىن دامىتۋ جونىندەگى مەملەكەتتىك باعدارلامانىڭ باسىمدىعى بار باعىتتارى بولىپ سانالادى.

"ءبىزدىڭ وڭدەۋشى كاسىپورىندارىمىز 30-40 پايىز جۇكتەمەمەن جۇمىس جۇرگىزۋدە. ولاردىڭ جۇمىسىنىڭ تولىق قۋاتتىلىعىنا جەتۋىن قامتاماسىز ەتۋ ءۇشىن شيكىزات كەرەك، ونىڭ جەتكىزىلەتىن مولشەرىن ارتتىرۋ ءۇشىن اۋىل شارۋاشىلىعى كووپەراسياسىن دامىتۋ قاجەت"، - دەدى قازاقستان پرەزيدەنتى.

سونداي-اق، ەلباسى ءوزىن-وزى جۇمىسپەن ءتيىمسىز قامتىپ وتىرعانداردىڭ ۇلەسى ەداۋىر ەكەنىن اتاپ ءوتتى.

"حالىقتىڭ بۇل ساناتى ءوزىن-وزى جۇمىسپەن ءتيىمدى تۇردە قامتۋ ءۇشىن جۇيەلى شارالار قابىلداۋ قاجەت. جۇمىسسىزداردى بوس جۇمىس ورىندارى بار جەرلەرگە تارتۋ كەرەك. وڭىرلەردەگى ازاماتتار جۇمىسپەن قامتۋ باعدارلامالارى جانە بوس ورىندار تۋرالى بىلۋگە ءتيىس"، - دەدى مەملەكەت باسشىسى.

سونىمەن بىرگە، نۇرسۇلتان نازاربايەۆ اۋىل جاستارىن قايتا دايارلاۋ جانە اۋىلداعى جۇمىسپەن قامتىلۋ دەڭگەيىن ارتتىرۋدىڭ ماڭىزدىلىعىنا توقتالدى.

كەڭەس اياسىندا پرەمەر-مينيستردىڭ ورىنباسارى - اۋىل شارۋاشىلىعى ءمينيسترى ا.مىرزاحمەتوۆ، دەنساۋلىق ساقتاۋ جانە الەۋمەتتىك دامۋ ءمينيسترى ت.دۇيسەنوۆا جانە ۇلتتىق ەكونوميكا ءمينيسترى ق.بيشىمبايەۆ بايانداما جاسادى.

كەڭەس قورىتىندىسى بويىنشا نۇرسۇلتان نازاربايەۆ ازىرلەنىپ جاتقان باعدارلامالىق قۇجاتتاردىڭ تۇجىرىمدىق ۇستانىمدارىن ماقۇلداپ، بارلىق ماسەلەنى مۇددەلى تاراپتارمەن ءوزارا كەلىسىپ، مۇقيات قاراستىرۋدى تاپسىردى.