وسى جىلدىڭ ءساۋىر ايىنىڭ ورتاسىنان باستالعان جەر داۋى قازاق جەرىنە قاتىستى كوپتەگەن بىلىقتىڭ بەتىن اشتى. سول كەزدەگى  ۇلتتىق ەكونوميكا ءمينيسترىنىڭ 1،7 ملن. گەكتار اۋىلشارۋاشىلىق جەرىنىڭ 01 شىلدەدەن باستاپ ساتىلىمعا شىعاتىنى جونىندەگى مالىمدەمەسى بۇكىل ەلدى الاڭداتىپ، الاڭعا بەت بۇرۋىنا  سەبەپ بولعانى بەلگىلى.

سول كۇننەن بەرگى جاعدايعا ءسال شولۋ جاساساق، قاراپايىم حالىق جەر ءۇشىن اشىق كۇرەسكە شىعىپ، «الاش جولى» ازاماتتىق قوزعالىسى قۇرىلىپ، ميلليونداعان ادام  «جەردى ساتپايمىز،ءتىلدى ساقتايمىز» دەپ ۇرانداتتى.

اتىراۋدا وتكەن بەيبىت ميتينگ ۇيقىدا جاتقان قازاق ساناسىنا سۋىق سۋ سەۋىپ جىبەرگەندەي ءدۇر سىلكىندىرىپ، جەر ءۇشىن بەيبىت جولمەن كۇرەسۋدىڭ تاماشا ۇلگىسىن پاش ەتتى. ونى ءىلىپ الىپ كەتكەن بىرنەشە قالالارداعى شاعىن ميتينگىلەر بيلىكتىڭ يمانىن ۇشىرىپ، «الاش جولى» قوزعالىسىنىڭ حالىق اتىنان بيلىككە قويعان بىرنەشە تالابىن ورىنداتۋعا قول جەتكىزدى. حالىق بىرىكسە كۇش بولا الاتىنىن، كۇشكە اينالسا بيلىككە ۇكىمىن جۇرگىزە الاتىنىن سەزىندى.   

سونىڭ ارقاسىندا   جەرگە قاتىستى بىرنەشە جەتىستىكتەرگە قول جەتكىزىلدى. اتاپ ايتقاندا:

ءبىرىنشى، بيلىك 1،7 ملن. گەكتار اۋىلشارۋاشىلىق جەرىن  01 شىلدەدەن باستاپ  ساتىلىمعا شىعارۋدان باس تارتتى.

ەكىنشى، مەملەكەت يەلىگىندەگى بارلىق اۋىلشارۋاشىلىق ماقساتىنداعى جەرلەردى ساتۋعا، جالعا بەرۋگە بەس جىلعا، ياعني  31 جەلتوقسان 2021 جىلعا دەيىن موراتوريي جاريالاندى.

ءۇشىنشى، «الاش جولى» قوزعالىسى مۇشەلەرىنىڭ، باسقا دا قوعام بەلسەندىلەرىنىڭ قاجىرلى ىزدەنىستەرى مەن زەرتتەۋلەرىنىڭ، تاباندى جۇمىسىنىڭ ناتيجەسىندە شىعىس قازاقستان، اقمولا، الماتى وبلىستارىندا شەتەلدىكتەردىڭ يەلىگى مەن ۇزاق جىلعا جالعا الۋىنا  زاڭسىز ءوتىپ كەتكەن اۋىلشارۋاشىلىق جەرلەرى انىقتالدى.

تاراتىپ ايتساق، شىعىس قازاقستان وبلىسىنىڭ ءۇرجار اۋدانىندا 45% ۇلەسى قىتايدىڭ «ۋەيز گرۋپ» جاۋاپكەرشىلىگى شەكتەۋلى سەرىكتەستىگىنە (باسشىسى-حاو بين) تيەسەلى «ءباتۋا» جاۋاپكەرشىلىگى شەكتەۋلى سەرىكتەستىگى ءتۇرلى جولمەن 91 432،5 گەكتار جەرگە يە بولعان.

شقو بەسقاراعاي اۋدانىندا ووو "التاي سينسزي مەجدۋنارودنايا تورگوۆايا كومپانيا" سەرىكتەستىگى مەن  ووو "يلۋن پودسولنەچنيك كومپانيا ۆ گورودە داان" سەرىكتەستىگى بىرلەسىپ قۇرعان «long حin» سەرىكتەستىگى 14754 گەكتار جەر العان.

اقمولا وبلىسىندا جالعىز قۇرىلتايشىسى رەتىندە گەرمانيا ازاماتى روبەرت شۋماحەر تىركەلگەن  «اق قۇلىن» سەرىكتەستىگىنە 34 155 گەكتار جەر تيەسەلى بولىپ شىقتى.

مۇنىڭ سىرتىندا الماتى وبلىسىدا، وڭتۇستىك قازاقستان وبلىسىندا شەتەلدىكتەرگە جالعا بەرىلگەن جەرلەر تۋرالى زەرتتەۋ جۇمىستارى جۇرگىزىلۋدە.

سول ۋاقىتتان بەرى «الاش جولى» ازاماتتىق قوزعالىسى، «ۇلى دالا قىراندارى» جانە «حالىق بىرلىگى» قوعامدىق بىرلەستىكتەرى جاساعان ۇلكەن جۇمىستارىنىڭ ناتيجەسىندە ق ر باس پروكۋراتۋراسىنىڭ، شقو پروكۋراتۋراسىنىڭ، اۋىل شارۋاشىلىق مينيسترلىگىنىڭ قولداۋىمەن بۇگىندە شقو ءۇرجار اۋدانىنداعى «ءباتۋا»، «ىرعىن»، «ءمانفاعات» ج ش س تاراپىنان زاڭبۇزۋشىلىق جولمەن جەر بەرىلگەنى انىقتالدى.

ق ر اۋىلشارۋاشىلىق مينيسترلىگىنىڭ جەر رەسۋرستارىن باسقارۋ كوميتەتى ارنايى تەكسەرۋ جۇرگىزىپ، كوميتەتتىڭ تەكسەرۋ قورىتىندىسى تۋرالى 2016 جىلدىڭ 22 شىلدەسىندەگى № 42-16-29-1/1 اكتىسىنە سايكەس شىعىس قازاقستان وبلىسى ءۇرجار اۋدانىنىڭ اكىمشىلىگى تاراپىنان «ءباتۋا» «ىرعىن»، «ءمانفاعات» ج ش س  91432،5 گەكتار جەردى زاڭسىز جالعا بەرگەنىن انىقتاعان.

ق ر باس پروكۋراتۋراسىنىڭ تاپسىرماسىمەن شقو پروكۋراتۋراسى «ءباتۋا»، «ىرعىن»، «ءمانفاعات» ج ش س ارەكەتتەرىنە ارنايى تەكسەرۋ جۇرگىزىپ، زاڭ بۇزۋشىلىقتاردى انىقتاعان.

سونىڭ ناتيجەسىندە اشم جەر رەسۋرستارىن باسقارۋ كوميتەتى اتالعان سەرىكتەستىكتەرگە جەر بەرۋ تۋرالى شقو ءۇرجار اۋدانىنىڭ جەر بەرۋ جونىندەگى قاۋلىلارىنىڭ كۇشىن جويۋ ءتىرالى سوتقا ارىز بەرگەن بولاتىن. ناتيجەسىندە، بۇگىن، ياعني 23 قاراشا 2016 جىلى شقو ارنايى مامانداندىرىلعان ەكونوميكالىق سوتىندا سۋديا جانار شاكەنوۆا ارنايى شەشىم قابىلداپ، اشم جەر رەسۋرستارىن باسقارۋ كوميتەتىنىڭ تالاپتارىن تولىقتاي قاناعاتتاندىردى.

بىلايشا ايتقاندا شقو ءۇرجار اۋدانى اكىمىنىڭ «ءباتۋا» ج ش س ءوتىپ كەتكەن «دارەمەت»، «ىرعىن»، «ءمانفاعات» ج ش س  91 432،5 گەكتار اۋىلشارۋاشىلىق جەرىن بەرۋ تۋرالى 6 قاۋلىسىنىڭ جانە 74 كەلىسىم شارتتىڭ كۇشىن جويۋ تۋرالى شەشىم شىعاردى.

ەندى بۇدان ءارى دە ادىلدىك ورناپ، جوعارى ساتىلى سوتتاردا دا اۋىل شارۋاشىلىق مينيسترلىگىنىڭ تالابى قاناعاتتاندىرىلسا 91 432،5 گەكتار جەر مەملەكەت يەلىگىنە قايتارىلادى.

قورىتا كەلگەندە ايتارىم، قازاق بالاسى ءۇشىن قاي زاماندا دا جەر كيەلى ەكەنى انىق. يەسى كەتكەن جەردىڭ كيەسى دە وشەدى. عاسىرلار بويى توگىلگەن اتانىڭ قانى، انانىڭ سۇتىمەن كەلگەن ءوز جەرىمىزگە ءوزىمىز يە بولايىق، اعايىن.

جەرى جوق ۇلتتىڭ ەلى دە، مەملەكەتى دە بولمايدى. ءوز مەملەكەتىمىزدىڭ يەسى، قوجاسى ءوزىمىز بولايىق. ول ءۇشىن ۇلتاراقتاي جەردىڭ دە شەتەلدىكتەردىڭ قانجاعاسىندا كەتپەۋى ءۇشىن جان اياماي كۇرەسەيىك. سولقىلداق زاڭ، سولاقاي ساياساتتىڭ كەسىرىنەن شەتەلدىكتەرگە ءوتىپ كەتكەن جەرلەردى مەملەكەتكە قايتارۋ ءاربىر قازاقستاندىق ازاماتتىڭ پارىزى بولۋى ءتيىس.

الدا ءالى ۇلكەن كۇرەستەر، جەر ءۇشىن كۇرەستەر تۇر. بۇگىن تەك ءبىر ءۇرجار اۋدانىنداعى 91 432،5 گەكتار جەردى قايتارۋ تۋرالى العاشقى شەشىم شىقسا، الدا ءالى سان مىڭداعان گەكتار جەردى قايتارۋ ءىسى تۇر.

وسى ىستە بەلسەنە، بىرلەسە، ات تىزەسىن قوسا ارەكەت ەتەيىك باۋىرلار. بۇگىنگى جەڭىس قۇتتى بولسىن!

ال قازىرشە، 90 مىڭنان اسا گەكتار جەردى مەملەكەتكە قايتارۋعا ۇلەس قوسقان ق ر پرەمەر-مينيسترىنىڭ ورىنباسارى-اۋىل شارۋاشىلىق ءمينيسترى اسقار مىرزاحمەتوۆكە، ءوزى تىكەلەي تەكسەرۋ جۇرگىزىپ، سوتقا باستان اياق قاتىسقان مينيسترلىكتىڭ ينسپەكتورى بەرىك مۇقانوۆقا، ق ر باس پروكۋرورى جاقىپ اسانوۆ پەن ونىڭ كەڭەسشىسى قابىلسايات ابىشيەۆكە، شىعىس قازاقستان وبلىسىنىڭ پروكۋرورى باعبان تايمبەتوۆكە، پروكۋرور ت. تۋركينوۆاعا، شقو ارنايى مامانداندىرىلعان ەكونوميكالىق سوتىنىڭ سۋدياسى جانار  شاكەنوۆاعا جانە باسقا ازاماتتارعا زور ريزاشىلىق بىلدىرەمىن.

ارينە، ءقازىر اتىراۋدا سوتى ءجۇرىپ جاتقان، قانشا ادىلەتسىزدىك كورىپ، ءتۇرلى قىسىمدى باستان كەشىپ جاتسا دا مويىماعان، تايسالماعان، جەر ءۇشىن باسىن بايگەگە تىگىپ، بەيبىت شەرۋ وتكىزۋدىڭ وزىق ۇلگىسىن كورسەتكەن قازاقتىڭ ۇلتتىق باتىرلارى ماكس بوكايەۆ پەن تالعات ايانعا ايتار العىسىم شەكسىز. مەن ول ازاماتتاردى ماقتان تۇتامىن. ولارعا بوستاندىق بەرىلسىن!

جەر ماسەلەسىن ءبىرىنشى بولىپ كوتەرىپ، «الاش جولى» قوزعالىسىنىڭ قۇرىلۋىنا ولشەۋسىز ۇلەس قوسقان، شىعىس قازاقستاندى جاياۋ جالپىلاي   بىرگە ارالاپ، ماعان جاقىن باۋىر، سەنىمدى سەرىك، اينىماس دوس بولا بىلگەن، ءارى ۇلكەن زاڭگەرلىك كومەك كورسەتكەن ماقسات ءىلياسۇلىنا ايرىقشا العىس بىلدىرەمىن.

«ۇلى دالا قىراندارى» رقب ءتوراعاسى سادىبەك تۇگەلگە، تاعى باسقا كوپتەگەن ۇلكەن جۇرەكتەرى جەرىم دەپ سوققان ۇلتشىل ازاماتتارعا، جەر ءۇشىن كۇرەسىپ جۇرگەن بارشا حالىققا  زور ريزاشىلىق بىلدىرەمىن.

وسى شاعىن بولسا دا جەڭىسىمىز قۇتتى بولسىن اعايىن، بۇدان ءارى دە ۇلكەن جەڭىستەرگە بىرگە جەتىپ، جەرىمىزدىڭ تۇتاستىعى ءۇشىن، ۇرپاعىمىزدىڭ تىنىش تا، بەيبىت، باي-قۋاتتى بولۋى جولىندا  ءوز ۇلەسىمىزدى قوسا بەرەيىك. العا قازاق ەلى، العا قازاق باۋىرلار! 

قۇرمەتپەن، شىعىس قازاقستان وبلىسى، وسكەمەن قالاسىنان  ايدىن ەگەۋبايەۆ