بۇعان دەيىن ينتەرنەتتە ءوزىن داۋلەت تۇرلىحانوۆ دەپ تانىستىرعان ادامنىڭ ەربولاتقا «Ninety One» توبى ءۇشىن سوگىس ايتقان تەلەفون ديالوگى تارالعان ەدى. بۇعان قاتىستى «قامشى» ءتىلشىسى ۇلت ماقتانىشى داۋلەت تۇرلىحانوۆقا ءمان-جايدىڭ انىق-قانىعىن ءبىلۋ ماقساتىندا قوڭىراۋ شالىپ، ماسەلەنىڭ انىعىن بىلگەن ەدى. قامشىگەر قوڭىراۋىنا داۋلەت تۇرلىحانوۆ: «بۇل بىرەۋدىڭ جاساعان ينتريگاسى. اۋديوجازبادا ءوزىن داۋلەت تۇرلىحانوۆ دەپ تانىستىرعان داۋىستىڭ يەسى مەن ەمەسپىن. ەربولات بەدەلحانمەن بۇل ماسەلە بويىنشا سويلەسكەن جوقپىن. كىم نە ءۇشىن، قانداي ماقساتتا مەنىڭ اتىمدى پايدالانىپ وتىر تۇسىنبەدىم. شىن ايتسام، «Ninety one» دەگەن توپ بارىن دا بىلمەپپىن. جاڭا عانا مادەنيەت جانە سپورت ءمينيسترى ارىستانبەك مۇحامەدي ۇلى ورىن العان جايتتى جوققا شىعارۋىمىز قاجەت دەپ حابارلاسقان بولاتىن. مەن تاعى دا قايتالاپ ايتايىن، بۇل بىرەۋدىڭ ينتريگاسى، قاتتى تاڭىرقاپ وتىرمىن»، - دەپ جاۋاپ بەرگەن بولاتىن.
كەيىننەن داۋلەت تۇرلىحانوۆ Instagram جەلىسىندەگى رەسمي پاراقشاسىندا دا بۇل اۋديو جازباداعى داۋىستىڭ وزىنە تيەسىلى ەمەس ەكەنىن ايتتى. "قۇرمەتتى وقىرماندار! مەن Ninety One توبىنا ەشقانداي دا سوگىس ايتقانىم جوق، توپ پروديۋسەرى ەربولات بەدەلحان ەكەۋمىزدىڭ ارامىزدا ەشقانداي دا اڭگىمە بولعان ەمەس"، - دەپ مالىمدەدى داۋلەت تۇرلىحانوۆ.
Tengrinews.kz حابارلاۋىنشا، Ninety One وكىلدەرى دە جەلىدە تاراعان اۋديوجازباعا قاتىستى پىكىر بىلدىرگەن: "ءقازىر توپتىڭ پروديۋسەرىنىڭ اينالسىندا بولىپ جاتقان وقيعانىڭ بارلىعى - قاستىق ارەكەتتەر. ونى كىمنىڭ جاساپ جاتقانىن ءبىز ازىرشە بىلمەيمىز. ەڭ قىزىعى ەربولات بەدەلحاننىڭ داۋسىن شەبەر سالىپتى، ءتىپتى ءبىزدىڭ ءوزىمىز ءوز قۇلاعىمىزعا سەنە المادىق. سوڭعى ۋاقىتتا ءبىزدىڭ اينالامىزدا شۋ شىعىپ جاتقانى ەشكىمگە دە جاسىرىن ەمەس. ءبىز بارلىعىنا دا ءتۇسىنىپ قارايمىز"، - دەپ اقتالعان توپتىڭ پروديۋسەرلىگىمەن اينالىساتىن Juz Media كومپانياسىنىڭ وكىلدەرى.
سونداي-اق، ولار توپ تارايدى دەگەن قاۋەسەتتى دە جوققا شىعارعان. "بارلىق جەتىستىككە ەڭبەكپەن، قاجىر-قايراتىمىزبەن جەتتىك. ءقازىر دە قاجىر-قايراتىمىز بار. ۇندەمەسەك، بۇل ساحنادان كەتۋىمىزدى بىلدىرمەيدى. ءبىز جۇمىس بارىسىندامىز، ەڭبەكتەنىپ جاتىرمىز، سەبەبى ماقساتقا جەتۋىمىز كەرەك. سوندىقتان رەسمي تۇردە ايتامىز، Niney One توبىن تاراتۋ ەربولات بەدەلحاننىڭ جوسپارىندا جوق. ءبىز ءبىر وتباسىمىز. بىرگە باستادىق، شوۋ-بيزنەستەگى جولىمىزدى بىرگە جالعاستىرامىز"، - دەپ پىكىر ءبىلدىرىپتى Niney One وكىلدەرى.
ايتا كەتەيىك، وسىعان دەيىن ينتەرنەتتە جاريالانعان اۋديوجازبادا ءوزىن داۋلەت تۇرلىحانوۆ دەپ تانىستىرعان ادام ەربولات بەدەلحانعا Ninety One توبى ءۇشىن سوگىس ايتادى. "نەمەنە شۋلاتىپ جۇرسىڭدەر، تەپسە تەمىر ۇزەتىن جىگىتتەر عوي بالالار، (...) شەتەلدىكتەرگە ۇقسايدى عوي تۇرلەرى، شەتەلگە كەتىپ قالسىن"، - دەيدى ەر ادام. بۇعان توپتىڭ پروديۋسەرى دەلىنگەن ادام ماقۇلداپ، كەلىسكەندەي بولادى.
