بۇعان دەيىن وزبەكستاننىڭ 2 اي بۇرىن قايتىس بولعان ۇزاق جىلدار باسقارعان پرەزيدەنتى يلسام كاريموۆتىڭ قىزى گۇلنارا كاريموۆا قايتىس بولدى دەگەن اقپارات تاراعانىن جازعان ەدىك. گۇلنارا كاريموۆانىڭ ۇلى يسلام كاريموۆ BBC وزبەك قىزمەتىنە بەرگەن سۇحتانىدا اناسىنىڭ ءولىمى تۋرالى حاباردى جوققا شىعارعان. "انام 2014 جىلدىڭ اقپانىنان بەرى ءۇي قاماۋىندا. قارىنداسىم قاماۋدا ەمەس، ءبىراق ەلدەن كەتە المايدى. ءوزىم ءقازىر لوندوندامىن"، - دەپ مالىمدەگەن كاريموۆ Tengrinews.kz اۋدارعان اقپاراتتا.
ول وسىعان دەيىن Facebook جەلىسىندەگى "دەتي كاريموۆا" پاراقشاسىندا جاريالانعان حاتىن ءوزى جازعانىن راستادى. حاتىندا ول اناسىمەن حابارلاسا الماعانىن جازادى. ال ءتىرى ەكەنىن قارىنداسى يماننان ءبىلىپتى. "مەن وزبەكستاننىڭ لوندونداعى ەلشىلىگىنە حابارلاسقىم كەلدى، ءبىراق قارىنداسىم حابارلاسىپ، بارلىق قاۋەسەتتى تەرىستەدى. جۇرتقا ايتقىم كەلەتىنى انام قارىنداسىممەن بىرگە تاشكەنتتە جانە ونىڭ جاعدايى جاقسى. انامدى ەشكىم دە جىندىحاناعا جاتقىزعان جوق. ول وزبەكستاننان كەتكەن جوق. وسى ۋاقىت بويى يمانمەن بىرگە تاشكەنتتە بولدى"، - دەپ سەندىردى يسلام كاريموۆ.
ەسكە سالايىق، وسىعان دەيىن باق-تار وزبەكستاننىڭ ۇلتتىق قاۋىپسىزدىك قىزمەتىندەگى دەرەككوزگە سىلتەمە جاساي وتىرىپ، گۇلنارا كاريموۆان قايتىس بولدى دەپ حابار تاراتقان ەدى. وزبەكستاننىڭ قايتىس بولعان پرەزيدەنتىنىڭ ۇلكەن قىزى 5 قاراشادا ۋلانىپ ءولدى دەلىنىپ، سول كۇنى تاشكەنتتەگى "مينور" زيراتىندا جەرلەندى دەلىنگەن بولاتىن.
