وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ ءىس-شارادا جاۋراپ تۇرعان قىزداردى كورىپ، جانى اشىپ كەتتى دەپ حابارلايدى nur.kz.
جانسەيىت تۇيمەبايەۆ وڭتۇستىك قازاقستان وبلىسىنا قاراستى ارىس قالاسىنداعى جاڭا دەندروساياباقتىڭ لەنتاسىن قيدى. دەمالىس ورنىنىڭ اشىلۋ سالتاناتىنا جينالعان قاتىسۋشىلاردىڭ كۇننىڭ سۋىعىندا جەڭىل كويلەكپەن جاۋراپ تۇرعان قىزداردى نازارىنا العان تۇيمەبايەۆقا شارانى ۇيىمداستىرۋشىلار جاقپاي قالدى.
كەز كەلگەن ۇلتتىق كيىمنىڭ جازدىق جانە قىستىق ءتۇرى بولاتىنىن ەسكە سالعان ايماق باسشىسى بۇل ارەكەتتى اسىرا سىلتەۋشىلىك دەپ، كونسەرتتىك باعدارلامانى توقتاتىپ تاستادى.
"اعايىندار-تۋعاندار، كەز كەلگەن ۇلت جازدا جازدىق، قىستا قىستىق كيىممەن شىعادى. سىزدەردىڭ كيگەندەرىڭىز جازدىق كيىمدەر. قىزدارىمىز ءبۇرىسىپ تۇر. بۇنداي اسىرا سىلتەۋ بولماسىن. بارلىقتارىڭىزعا اماندىق تىلەيمىن"، - دەگەن وبلىس اكىمى دەندروساياباقتا اعاش وتىرعىزدى.
ايتا كەتەيىك، لەنتاسى قيىلعان دەندروساياباقتىڭ قۇرىلىسى وتكەن جىلدىڭ تامىز ايىندا باستالىپ، تۋرا ءبىر جىل ىشىندە قۇرىلىس جۇمىستارى اياقتالعان. الايدا كوپشىلىك سەرۋەندەۋگە ارنالعان ورىن قىستىڭ قاقاعان سۋىعىندا پايدالانۋعا بەرىلدى.
