الماتى قالاسىنىڭ اكىمى باۋىرجان بايبەك بۇگىن جۇرناعى دا جوق جۇيەگە تيەسىلى مەيرام — 9-مامىردى دۇركىرەتىپ وتكىزۋگە بار كۇشىن سالىپ، ال ۇلت-ازاتتىق كوتەرىلىستىڭ 100 جىلدىعى سىندى قايتا جاڭعىرعان قازاقتىڭ تاريحي وقيعاسىن اتاپ وتۋگە نەگە قۇلىقسىز؟..

الماتى قالاسىنىڭ اكىمى باۋىرجان بايبەك پەن ونىڭ ىشكى ساياسات بويىنشا  ورىنباسارى ارمان قىرىقبايەۆتى وسى ماسەلەگە باستى نازار اۋدارۋعا شاقىرعان قوعام قايراتكەرى مۇحتار تايجان ورتاعا ۇسىنىس تاستادى.

ءوز ۇسىنىسى تۋرالى مۇحتار تايجان Facebook-تەگى جەكە پاراقشاسىندا جازىپتى دەپ حابارلايدى kaz.365info.kz سايتى.

«ارينە، ارىقتاردى تازالاۋ كەرەك، سەلدەن قورعانۋ ءۇشىن بەكىنىس ورناتۋ قاجەت، قالامىز ادەمى بولۋ ءۇشىن باقتارعا قوقىس جاشىگىن قويىپ، تازالاق جۇرگىزۋ كەرەك. مۇنىڭ ءبارىن كورىپ ءجۇرمىز، دۇرىس قوي، تۇسىنەمىز. ءتۇرلى مادەني شارالار وتكىزىلەدى. ءادىل بولۋ ءۇشىن اتقارىپ جاتقان وسى ىستەرىڭىزگە توقتالا كەتۋدى ءجون كوردىم.

الايدا باسقا دا ماڭىزدى ماسەلەلەر بار عوي…

مىسالى، سىزدەر قالادا 2-3 جىلدا اراكىدىك ءبىر اكسيا وتكىزەسىزدەر. 9-مامىردان باسقاسىن.

ال 9-مامىردا جىلدا اسكەري كيىمدەگى ادامدار كوشەدە مارشقا شىعادى، ميلليونداعان قازاقتى قىرعان قىزىل يمپەريانىڭ شەن-شەكپەنىن تاققاندار ورتامىزدا جۇرەدى، كەڭىنەن ناسيحاتتالادى.

قىزىلدىڭ زامانىندا ارالىمىزدان ايىرىلدىق، 7 ۇلكەن سىناق الاڭىندا اتوم جانە گەپتيل بومبالارى سىنالىپ، ءبىزدىڭ جەرىمىزدىڭ تۋ تالاقايى شىقتى. قازاق مەكتەپتەرى جابىلدى، قازاقتىڭ زيالىلارى اتىلدى. ونى ءبىز ۇمىتقانىمىز جوق. وندايدى ۇمىتۋ مۇمكىن ەمەس.

مىنە، وسىنداي اكسيالارعا مۇعالىممەن وقۋشىلاردى قوساقتاپ، كۋرسانتتاردى جىبەرەسىز، اسكەري وركەستر ۇيىمداستىراسىزدار.

شىنىڭىزدى ايتىڭىزشى، ءسىز مۇنداي اكسيادان قانداي ءلاززات الاسىز؟ مەنىڭشە، بۇل — تاريحي ستوكگولم سيندرومىنىڭ بەلگىسى.

ءسىز شىنىمەن دە تاريحتى قۇرمەت تۇتاسىز با؟.. ولاي بولسا، 1916 جىلعى ۇلت-ازاتتىق كوتەرىلىستىڭ 100 جىلدىعى قۇرمەتىنە نەگە وسىلاي اسكەري شەرۋ وتكىزبەيمىز؟ ءاليحاننىڭ 150 جىلدىعىنا ولاي ەتۋگە بولماي ما؟ نەگە بالالارعا تاريحتىڭ ءبىر جەرىن ۋاعىزداپ، ال تاعى ءبىر جەرى تۋرالى جاسىرىپ قالاسىز.

ءداتىڭىز جەتپەسە، بىزگە رۇقسات بەرىڭىز.

ءبىز اشتان، رەپرەسسيادان قىرىلعان، كەڭەس يمپەرياسى قۇرامىندا ەكولوگيا قۇرباندارى بولعان ميلليونداعان قازاقتىڭ ارۋاعىن ەسكە الاتىن شەرۋدى ءوزىمىز-اق ۇيىمداستىرا الامىز. تەك رۇقسات بەرسەڭىز، بولعانى…»

اۆتور: كامشات ساتييەۆا