تاۋەلسىزدىك جىلدارىنداعى جەتىستىكتەردى بايانداعان ت.تەلعارايەۆ اۋداننىڭ جالپى وڭىرلىك ءونىمى 74،2 ملرد. تەڭگەگە جەتىپ، 30،6 ەسەگە، ال ونەركاسىپ ءونىمىنىڭ كولەمى 4 431،7 ملن. تەڭگەگە جەتىپ، 45،8 ەسەگە ارتقانىن ايتتى. وسى جىلدار ىشىندە قازىعۇرتقا جالپى 102،7 ملرد. تەڭگە ينۆەستيسيا تارتىلسا، 2016 جىلى 13 963،3 ملن. تەڭگەگە دەيىن وسكەنىن باياندادى.

«بيزنەستىڭ جول كارتاسى – 2020» باعدارلاماسى اياسىندا 2012 جىلدان بەرى جالپى سانى 28 جوبا قولداۋ تاپقان. اۋداندا شىعارىلعان ءونىم كولەمى جانە كورسەتىلگەن قىزمەت پەن جۇمىس كولەمدەرى 33،3 ملرد تەڭگە بولىپ، 1991 جىلمەن سالىستىرعاندا 51 ەسەگە ارتتى. كاسىپكەرلىكتى دامىتۋعا 6 نەسيە بەرۋ ۇيىمدارى ارقىلى، 2009 جىلدان بەرى اۋدان كاسىپكەرلەرىنە 9،8 ملرد.تەڭگە قارجى بەرىلگەن»،- دەدى اۋدان باسشىسى.

باسپا ءسوز ءماسليحاتىندا بەلگىلى بولعانداي اۋداندا تامشىلاتىپ سۋارۋ ءادىسىنىڭ جالپى كولەمى 2384 گەكتارعا، ال جىلىجايلار كولەمى 88،9 گەكتارعا جەتكەن. وسى جىلىجايلاردان بيىل 4،5 مىڭ توننا كوكونىس ونىمدەرى جينالعان. ال ەگىس كولەمى وتكەن جىلدان 2290 گەكتارعا ارتىپ، 83908 گەكتاردى قۇراپ وتىر.

سپيكەردىڭ مالىمدەۋىنشە، وسى جىلى داندىك جۇگەرىدەن 2061،2 توننا، كوكونىستەن 10397 توننا، باقشادان 2550 توننا، كارتوپتان 5189 توننا، ماساقتى داقىلداردان 113251 توننا ءونىم جينالعان. ال، بيدايدىڭ ورتاشا ونىمدىلىگى 26،9 سەنتنەردى قۇرادى.