قارالى اي –

جەلتوقساندى اينالدىرىپ تويىنا:

جەندەتتەر-اي،

ىستەپ جاتقان،

نە كەلگەنىن

ويىنا!

ەكى بىردەي جەلتوقساندا، اققان قانىن قازاقتىڭ –

الاڭدار-اي

سىڭىرە الماي جاتىر ءالى بويىنا...

ازات بولۋ –

ارمانى ەدى،

جەلتوقسانشى جاستاردىڭ،

قاپى قالعان شىرماۋىندا –

قاندى قاقپان استاردىڭ...

ولىكتەردىڭ سۇيەگىنەن ساتى جاساپ ورمەلەۋ –

تاققا وتىرۋ،

ماقسات ەدى ارام ويلى باستاردىڭ!

وزگەرگەنى –

قوي تەرىسىن جامىلعاندى قاسقىرلار،

كوز جەتكەنى –

قانعا جەرىك، قاسقىردان دا قاسقىر بار.

ايداپ سالىپ،

اجالىنا

قولتىعىنا دەم بۇركىپ

قارالاعان جاستارىمدى، قارا الباستى باسقىرلار!

وزگەرگەنمەن –

تۋدىڭ ءتۇسى،

باياعىشا قالپىندا –

ازاتتىقتى تۇنشىقتىرۋ قالىپ قويعان سالتىندا:

ۇلت مۇددەسى قالدى ادىرا،

بيلىك –

بايۋ جولىندا

قارا شالا قيراندىسىن قالدىرماقشى ارتىندا.

قاس ادىلەت ورنامادى، سالتاناتىن قۇرمادى،

سورلاعان ۇلت بەلىن جازىپ، تىزەسىنەن تۇرمادى.

ايتشى ماعان،

ايتا الساڭ

جەلتوقساننىڭ قۇربانى

باقىتىڭدى بولاشاقتان كىمدەر سەنەن ۇرلادى؟

قارالى اي –

جەلتوقساندى،

اينالدىرعان تويىنا:

جەندەتتەر عوي،

ىستەپ جاتقان

نە كەلسە دە ويىنا.

ەكى بىردەي جەلتوقساننىڭ –

قانىن ءالى كەپپەگەن

تۋعان جەردىڭ توپىراعى سىڭىرمەپتى بويىنا...

قۋانىش مۇقتاي

14.12.16 جىل